༢༠༡༥ ཟླ་ ༡༢ ཚེས་ ༢ རེས་གཟའ་ལྷག་པ།
༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ (COP21) སྐབས་མཐོ་སྒང་བོད་ཀྱི་ཁོར་ཡུག་སྲུང་སྐྱོབ་ཆེད་བོད་མིའི་སྒྲིག་འཛུགས་ཀྱིས་ཞུ་སྐུལ་ལས་འགུལ་སྤེལ་བའི་ཆ་ཤས་སུ། ཕྱི་ལོ་ ༢༠༡༥ ཟླ་ ༡༡ ཚེས་ ༢༨ དང་ ༢༩ བཅས་ཉིན་གྲངས་གཉིས་རིང་སྨན་པར་ཕན་བདེ་གླིང་བོད་མིའི་གཞིས་ཆགས་སུ་བོད་ཀྱི་ཁོར་ཡུག ཅེས་པའི་བརྗོད་གཞིའི་ཐོག་རི་མོའི་འགྲན་བསྡུར་དང་གསུང་བཤད་ཀྱི་ལས་རིམ་གོ་སྒྲིག་ཞུས་འདུག རི་མོའི་འགྲན་བསྡུར་ནང་འཛིན་རིམ་དང་པོ་ནས་ལྔ་པ་བར་གྱི་སློབ་ཕྲུག་རྣམས་ཀྱིས་མཉམ་ཞུགས་གནང་ཡོད།
སྐབས་དེར་སློབ་ཕྲུག་ཚོར་མཐོ་སྒང་བོད་ཀྱི་ཁོར་ཡུག་འདི་བཞིན་འཛམ་གླིང་ཁྱོན་ཡོངས་ལ་གལ་གནད་ཆེ་ཚུལ་དང་། རྒྱ་ནག་གཞུང་གི་སྲིད་བྱུས་ལ་བརྟེན་ནས་བོད་ནང་གི་ཁོར་ཡུག་མྱུར་ཚད་མཐོ་པོའི་ཐོག་ནས་ཉམས་རྒུད་འགྲོ་བཞིན་ཡོད་སྐོར། ཕྱོགས་མཚུངས་སྐབས་དེར་བོད་མིའི་སྒྲིག་འཛུགས་ཀྱི་ཕྱི་དྲིལ་ཁོར་ཡུག་ཚན་པའི་བཟོས་པའི་བོད་ནག་གི་ཁོར་ཡུག་གནས་སྟངས་སྐོར་གྱི་གནས་ཚུལ་ཕྱོགས་སྒྲིག་ཞུས་པ་པ་ཞིག་ཀམ་པུ་ཊར་བརྒྱུད་ངོ་སྤྲོད་གནང་འདུག རི་མོའི་འགྲན་བསྡུར་ཁོངས་སུ་རྒྱལ་ཁ་ཐོབ་མཁན་རྣམས་སློབ་གྲྭའི་ཞོགས་ཚོགས་སྐབས་བྱ་དགའ་གནང་ཡོད་པ་བཅས།།
