༢༠༡༥ ཟླ་ ༡༡ ཚེས་ ༣༠ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༥ ཟླ་ ༡༡ ཚེས་ ༢༧ ཉིན་བོད་ཁམས་དཀར་མཛེས་རྫོང་། རྫ་ཁོག་ཤང་། ཁྲ་དྷབ་གྲོང་ནས་ཡིན་པ། མིང་ལ་སེང་གེ་ཟེར་བ་རང་ལོ་ཉེར་དགུར་སོན་པ་ཞིག་གིས་༸རྒྱལ་བ་བསྟན་འཛིན་རྒྱ་མཚོ་མཆོག་སྐུ་ཚེ་ཁྲི་ལོ་བརྟན་པར་ཤོག་ཟེར་ནས་རླུང་རྟ་གནམ་ལ་གཏོར་བཞིན་དཀར་མཛེས་རྫོང་གི་ཁྲོམ་གཞུང་དུ་སྐད་འབོད་ཤུགས་ཆེ་གནང་བར་བརྟེན། ཁོང་རྒྱ་གཞུང་གི་ཉེན་རྟོག་པས་གློ་བུར་དུ་འཛིན་བཟུང་བྱས་ཡོད་འདུག
རྒྱལ་གཅེས་པ་ཁོང་གིས་སྐད་འབོད་མ་གནང་གོང་གི་ཉིན་ཤས་སྔོན་༧སྐུ་མདུན་ཞབས་ཐང་དུ་ཕེབས་བཞིན་པའི་བརྙན་ཐུང་ཞིག་མཇལ་ཞོར་༧གོང་ས་མཆོག་དགུང་ལོ་བགྲེས་པོར་ཕེབས་ཡོང་གི་འདུག་ཅེས་དང་། བླ་མ་མ་མཇལ་ན་གསོན་པོར་འདུག་ཀྱང་སྙིང་པོ་མེད་ཚུལ་ཡང་ཡང་བཤད་ཞོར་ཐེངས་མང་ངུས་པ་རེད་ཅེས་གནས་ཚུལ་མཁོ་སྤྲོད་པས་བརྗོད་སོང་། ད་ལྟ་ནང་མི་དང་གཉེན་ཉེ་ཚོས་ཁོང་ས་གནས་གང་དུ་བཀག་ཉར་བྱེད་ཡོད་མེད་ཁ་གསལ་མ་ཤེས་པ་དང་། དེ་བཞིན་ཉེན་རྟོག་པས་བཙོན་ཁང་དུ་མནར་གཅོད་ཇི་འདྲ་གཏོང་ཐད་སེམས་ཁྲལ་ཆེན་པོ་བྱེད་བཞིན་ཡོད་པ་མ་ཟད། ང་ཚོས་ཁོང་ས་གནས་གང་དུ་བཀག་བསྐྱིལ་བྱེད་མིན་མི་ཤེས། འོན་ཀྱང་ཁོང་གི་གཟུགས་པོའི་འཕྲོད་བསྟེན་སྔར་བཞིན་གནས་ཐུབ་པའི་རེ་སྨོན་ཞུ་བཞིན་ཡོད།
སེང་གེ་ལགས་ནི་ཕ་བློ་དགའ་དང་མ་བོ་ཅག་གཉིས་ཀྱི་བུ་ཡིན་ལ། དཀར་མཛེས་རྫོང་གི་ཉེ་འདབས་དར་མདོ་གྲོང་རྡལ། རབ་དཀའ་གྲོང་དུ་མག་པར་བསླེབས་ཤིང་། ཁྱིམ་དུ་བཟའ་ཟླ་དང་། ཕྲུ་གུ་ཆུང་ཆུང་ཞིག བཟའ་ཟླའི་ཨ་མ་བཅས་ནང་མི་གསུམ་ཡོད་འདུག
