༢༠༡༥ ཟླ་ ༡༡ ཚེས་ ༡༢ རེས་གཟའ་ཕུར་བུ།

༄༅། །ཕྱི་ལོ་ ༢༠༡༥ ཟླ་ ༡༡ ཚེས་ ༡༠ ནས་ ༡༤ བར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གོ་སྒྲིག་འོག རྒྱ་གར་ལྷོ་ཕྱོགས་སྦེང་ལོར་ནང་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བྱིས་པའི་ཀློག་རྩལ་ཁྲིད་ཐབས་ཀྱི་ཟབ་སྦྱོང་གནང་བཞིན་ཡོད། དེ་ཡང་ཟབ་སྦྱོང་ཐོག་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་དང་། བོད་སློབ་འཛིན་ཚོགས་ཁྱབ་ཁོངས། རྡ་ས་བོད་ཁྱིམ་བཅས་ཀྱི་སློབ་གྲྭ་ཁག་གི་གཞི་རིམ་འོག་མའི་དགེ་རྒན་ཁྱོན་གྲངས་ ༢༣ མཉམ་ཞུགས་གནང་འདུག

ཐེངས་འདིའི་ཟབ་སྦྱོང་གི་དགོས་དམིགས་གཙོ་བོ་ནི་བྱིས་པའི་ཀློག་རྩལ་ཁྲིད་ཐབས་ཡར་རྒྱས་གཏོང་ཕྱོགས་གང་འདྲ་ཡིན་མིན་སྐོར་གཞི་རིམ་འོག་མའི་དགེ་རྒན་ཚོར་རྒྱུས་མངའ་ལྡན་པ་ཞིག་བཟོ་ཆེད་ཡིན་པ་དང་། ཤེས་རིག་ལས་ཁུངས་ནས་ཀློག་རྩལ་ཁྲིད་ཐབས་གོང་སྤེལ་གྱིས་ལམ་ནས་བོད་པའི་སློབ་གྲྭ་ཁག་གི་ནང་ཀློག་རྩལ་ཡར་རྒྱས་གཏོང་རྒྱུ་དང་ལྷན་དམིགས་བསལ་གཞི་རིམ་འོག་མའི་སློབ་ཕྲུག་ཚོར་ཀློག་རྩལ་དང་ཀློག་རྩལ་གྱི་གོམས་གཤིས་རྒྱུད་ལ་འཇགས་ཐབས་བྱེད་རྒྱུའི་ལས་འཆར་ཞིག་ཡིན་འདུག ཐེངས་འདིའི་ཟབ་སྦྱོང་ཐོག་མཉམ་ཞུགས་གནང་མཁན་དགེ་རྒན་རྣམས་ཀྱིས་ཟབ་སྦྱོང་འདི་འདོད་བློ་ཚིམས་པ་དང་ཕན་ཐོགས་ཆེན་པོ་བྱུང་ཡོད་སྐོར་གྱི་རྣམ་འགྱུར་བསྟན་ཡོད་པ། ལྷག་པར་དགེ་རྒན་ཚོའི་སློབ་ཁྲིད་རྒྱུད་རིམ་གྱི་ཉམས་མྱོང་དང་འབྲེལ་ཕྱིས་སུ་སློབ་ཕྲུག་ཚོའི་རྒྱུད་ལ་ཀློག་རྩལ་གྱི་གོམས་གཤིས་འཇགས་ཐབས་ཐད་སློབ་ཁྲིད་ཐབས་ལམ་བཅོས་སྒྱུར་ཐུབ་པ་ཞིག་བྱུང་ཐུབ་ངེས་ཡིན་སྐོར་གྱི་བསམ་ཚུལ་ཡང་བྱུང་ཡོད་འདུག

ཟབ་ཁྲིད་གནང་མཁན་ལྡི་ལི་གཙུག་ལག་སློབ་གཉེར་ཁང་གི་ལྕམ་སྐུ་མཁས་དབང་ལ་ཏི་ཀ་གུཔྟཱ་ Dr. Latika Gupta ལགས་ཡིན།  ཟབ་སྦྱོང་འདི་བཞིན་ཨ་རི་བོད་ཀྱི་ཐེབས་རྩ་བརྒྱུད་ཨ་རི་ USAID རོགས་ཚོགས་ནས་མཐུན་འགྱུར་གནང་བ་ཞིག་ཡིན་འདུག