ཕྱི་ལོ་ ༢༠༡༥ ཟླ་ ༡༠ ཚེས་ ༢༦ རེས་གཟའ་ཟླ་བ།

༄༅། །ཕྱི་ལོ་ ༢༠༡༥ ཟླ་ ༡༠ ཚེས་ ༢༦ ཉིན་བོད་ཀྱི་དཔེ་མཛོད་ཁང་གི་ཚོགས་ཁང་ནང་རྒྱལ་སྤྱིའི་ངོས་འཛིན་ཐོབ་པའི་སྒྱུ་རྩལ་བ་ཇོན་ཀོལ་ཀིན་ Jon kolkin ལགས་ཀྱིས་༼ནང་གི་གཞི་མཐུན༽ ནང་པའི་སེམས་ཁམས་ཀྱི་བློ་སྐྱེད་ཞེས་པའི་བརྗོད་གཞི་ཅན་གྱི་པལེ་ཌི་ཡམ་ Palladium print photograph སྒང་པར་ཤུས་བྱས་པའི་པར་རིགས་གྲངས་ ༤༣ ཙམ་ཞིག་འགྲེམས་སྟོན་གནང་ཡོད།

དེ་ཡང་གོང་ཚེས་ཉིན་གྱི་ཆུ་ཚོད་ ༡༠ ཐོག་སྐུ་མགྲོན་གཙོ་བོ་གནས་ཆུང་སྐུ་རྟེན་ཐུབ་བསྟན་དངོས་གྲུབ་མཆོག་གིས་པར་རིགས་འགྲེམས་སྟོན་དབུ་འབྱེད་གནང་སྟེ་པར་རིགས་ཁག་ལ་གཟིགས་ཞིབ་གནང་ཡོད། ཐེངས་འདིའི་འགྲེམས་སྟོན་ནང་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་བོད་ཀྱི་དཔེ་མཛོད་ཁང་གི་དབུ་འཛིན་གཙོས་པའི་ལས་བྱེད་དང་། ཕྱི་ནང་གི་གསར་འགོད་པ་བཅས་ཁྱོན་མི་གྲངས་བརྒྱ་ཙམ་འདུ་འཛོམས་གནང་ཡོད།

ཐེངས་འདིའི་པར་རིགས་འགྲེམས་སྟོན་གྱི་བརྗོད་གཞི་༼ནང་གི་གཞི་མཐུན༽ཞེས་ནང་པའི་སེམས་ཁམས་ཀྱི་བློ་སྐྱེད་ཞེས་པ་འདི་ཧ་ཅང་གི་ཁྱད་པར་དུ་འཕགས་པའི་ལས་གཞི་ཞིག་ཡིན་པ་དང་། ལས་གཞི་འདིའི་ཁོངས་ཁོང་གི་ལོ་ལྔ་ལྷག་གི་རིང་འབྲུག་དང་། རྒྱ་གར། རྒྱ་ནག མཡེན་མཱར་བཅས་ཡུལ་གྲུ་ཁག་གི་ནང་གནས་སྡོད་བྱེད་སྐབས་སུ་ལེན་པའི་པར་རིགས་པལེ་ཌི་ཡམ་ Palladium print photograph སྒང་པར་ཤུས་བྱས་པ་དང་། སྐབས་དེ་དུས་ཁོང་གི་ཉེ་འཁོར་དུ་བཅའ་སྡོད་བྱེད་མཁན་གྱི་གང་ཟག་ཚོའི་ཁོར་ཡུག་ཙམ་མིན་པར་ནང་སེམས་ཀྱི་རྩ་ཆེའི་བར་སྟོང་དག་ཡུད་ཙམ་མཇལ་ནས་པར་ལེན་རྒྱུའི་གོ་སྐབས་ཐོབ་བྱུང་ཞེས་དང་། སྤྱིར་ཇོན་ཀོལ་ཀིན་ལགས་ནི་རྒྱལ་སྤྱིའི་སྟེང་ངོས་འཛིན་ཡོད་པའི་སྒྱུ་རྩལ་བ་གྲགས་ཅན་ཞིག་ཡིན་པ་མ་ཟད། ཤེས་ཡོན་སློབ་སྟོན་པ། སྨན་པ། འཕྲོད་བསྟེན་སྦྱོང་བརྡར་པ། ནང་ཚང་གི་མི། རྩལ་འགྲན་པ། འགྲོ་བ་མིའི་བདེ་སྡུག་ལ་སེམས་ཁུར་ཡོད་མཁན་དང་། མཐུན་རྐྱེན་ཞན་པའི་འཛམ་གླིང་ས་ཁུལ་ཁག་གི་ནང་མི་ལོ་ ༢༡ ལྷག་རིང་སྨན་གྱི་སློབ་ཁྲིད་གནང་བའི་ཉམས་མྱོང་ཡོད་པ། ཁོང་གི་པར་རིགས་ཁག་འཛམ་གླིང་ཁྱོན་ཡོངས་ཀྱི་སྒེར་པ་དང་ཚོང་ལས་སྡེ་ཚན་གཉིས་ཀའི་པར་རིགས་ཕྱོགས་བསྡུས་ནང་བསླེབས་ཡོད་པ་དང་། སྙན་གྲགས་ཅན་གྱི་འགྲེམས་སྟོན་ཁང་མང་པོས་སྒྲིག་གཤོམ་བྱས་ཡོད་འདུག

དེ་བཞིན་ཐེངས་འདིའི་པར་རིགས་འགྲེམས་སྟོན་སྐོར་བོད་ཀྱི་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་ཀྱིས་གསར་འགོད་པའི་དྲི་བར་ལན་འདེབས་གནང་དོན། ང་རང་ཚོ་བོད་ཀྱི་རིག་གཞུང་ཉར་ཚགས་བྱ་རྒྱུ་ལས་འགན་ཆགས་ཡོད།

དེ་དང་ཕྱོགས་མཚུངས་དེང་དུས་ཀྱི་བརྒྱུད་ལམ་ཐོག་ནས་ང་ཚོའི་བློ་སྒོ་གསར་པ་ཕྱེ་རྒྱུ་དང་། བརྒྱུད་ལམ་དེ་དག་གི་ཐོག་ནས་དེང་སྐབས་དང་མཐུན་པའི་སྒོ་ནས་བོད་ཀྱི་རིག་གཞུང་ཉར་ཚགས་སྲུང་སྐྱོང་བྱ་རྒྱུའི་ལས་གཞི་མང་པོ་ཞིག་སྤེལ་གྱི་ཡོད། ལས་གཞི་དེ་དང་མཚུངས་པ་ཇོན་ཀོལ་ཀིན་ཁོང་གིས་ང་ཚོར་ལས་གཞི་དེ་འདྲ་ཞིག་མཉམ་རུབ་བྱེད་ཐུབ་པ་ཡིན་ན་ཡག་པོ་འདུག་ཅེས་གསུངས་པ་བཞིན་ངས་པར་རིགས་འགྲེམས་སྟོན་འདི་གོ་སྒྲིག་བྱེད་པའི་དམིགས་ཡུལ་དེ་ཡིན། ཇོན་ཀོལ་ཀིན་ཁོང་རང་གི་པར་རིགས་དེ་དག་སྤྱིར་ཚོས་གཞི་དཀར་ནག་ཙམ་ལས་མེད་ཀྱང་། པར་རེར་གྲ་སྒྲིག་བྱེད་པར་ཉིན་གྲངས་ཉི་ཤུ་ཐམ་པ་འགོར་གྱི་འདུག་ཅེས་བརྗོད་ཀྱི་འདུག གང་ལྟར་ཁོང་རང་གི་པར་རིགས་དེ་དག་གི་ཡང་སྙིང་དམིགས་ཡུལ་གཙོ་བོ་ནི་ནང་སེམས་ཀྱི་མཚོན་དོན་དེ་པར་རིགས་ཀྱི་ལམ་ནས་མངོན་ཐུབ་པ་བྱ་རྒྱུ་དེ་ཡིན་འདུག་ཅེས་གསུངས་སོང་། །