༢༠༡༥ ཟླ་ ༡༠ ཚེས་ ༢༦ རེས་གཟའ་ཟླ་བ།
༄༅། །དམ་གཙང་དད་ལྡན་སྐྱེ་བོ་ཡོངས་ཀྱི་སྙན་དབང་ཟབ་མོའི་དྲུང་དུ། མདོ་སྟོད་ཤོད་ཆེན་བཅོ་བརྒྱད་ཀྱི་ཡ་གྱལ་རི་རྒྱལ་གཡག་ལ་སེ་བོའི་ཉེ་འགྲམ་དུ་ཆགས་པའི་བར་ཁམས་སོག་རྒན་ལྡིང་ཉི་ཤུ་རྩ་ལྔའི་ཁོངས་གཏོགས། གཞིས་བྱེས་གཉིས་ཀྱི་ཡུལ་སྡེ་མི་མང་གི་ངོ་ཚབ་བཞུགས་སྒར་ཕོ་བྲང་དུ་༸རྒྱལ་བ་ཡིད་བཞིན་ནོར་བུར་མཇལ་བཅར་བསྐལ་བཟང་དང་བསྟུན། འགྲོ་ཀུན་སྤྱི་དང་བོད་གངས་ཅན་པ། ཡང་སྒོས་བར་ཁམས་སོག་ཤོད་མི་མང་ཡོངས་ལ་བསྐྱངས་པའི་བཀའ་དྲིན་སྟོང་གསུམ་གསེར་ཕྱེས་བཀང་ནས་ཕུལ་ཡང་གཞལ་ཟླ་མ་མཆིས་པས། ༸གོང་ས་ཡིད་བཞིན་ནོར་བུ་མཆོག་སྐུ་ཚེ་མི་འགྱུར་རྟག་བརྟན་རྡོ་རྗེའི་གཤིས་སུ་བརྟན་ཕྱིར་བརྟན་བཞུགས་བསྟར་འབུལ་དང་མེ་ཏོག་ཆུང་ཡང་ལྷ་རྫས་ཀྱི་དཔེ་ལྟར།
བཀའ་དྲིན་རྗེས་དྲན་གསེར་གྱི་གཟེངས་རྟགས་འབུལ་བཞེས་མཛད་པའི་གསོལ་འདེབས་དང་ལྷན་ཅིག འབྱུང་འགྱུར་བར་ཁམས་སོག་ཤོད་ལུང་པའི་དད་ལྡན་མི་མང་རྣམས་ཀྱིས་ཕ་རབས་བུ་རྒྱུད་ནས་ཉམས་ལེན་བྱ་རྒྱུའི་ཆོས་སྐལ་དབུ་མ་རིགས་ཚོགས་དྲུག་དང། དབུ་མ་བཞི་བརྒྱ་པ། ལམ་རིམ་འཇམ་དཔལ་ཞལ་ལུང་གི་ཟིན་བྲིས་རྣམས་ལས་གང་རུང། དེ་བཞིན་རྟེན་འབྲེལ་བསྟོད་པ་སོགས་སྔ་རྗེས་རིམ་པ་བཞིན་དད་དམ་གཡོ་མེད་སྙིང་དབུས་ནས་ཞུས་པ་ལ། ༸སྤྱི་ནོར་༸རྒྱལ་བ་ཡིད་བཞིན་ནོར་བུ་མཆོག་སྐུ་གསུང་ཐུགས་ཀྱི་མཛད་བྲེལ་ཤིན་ཏུ་ཆེ་ན་ཡང། བོད་རྒྱལ་ལོ་ ༢༡༤༢ བོད་ཟླ་ ༩ ཚེས་ ༢༢ དང་། ཕྱི་ལོ་ ༢༠༡༥ ལོའི་ཟླ་བ་ ༡༡ པའི་ཚེས་ ༣ ཉིན། རྒྱལ་བ་ལྷ་ལས་བབ་པའི་དུས་ཁྱད་པར་ཅན་དང་གནས་ཁྱད་པར་ཅན་གྲུ་འཛིན་མགོན་པོའི་ཕོ་བྲང་བཞུགས་སྒར་ཐེག་ཆེན་གཙུག་ལག་ཁང་དུ་གསུང་ཁྱད་པར་ཅན་སྐྱབས་འགྲོ་སེམས་བསྐྱེད་དང། སྒྲོལ་དཀར་ཡིད་བཞིན་འཁོར་ལོའི་ཚེ་དབང་ཆོས་སྐལ་གནང་རྒྱུ་བཀའ་བཞེས་བཀའ་དྲིན་ཆེ་བ་དང་ཆབས་ཅིག ༸རྒྱལ་བ་གང་ཉིད་སྐུ་ཚེ་མི་ཤིག་༸རྒྱལ་བ་ཚེ་དཔག་མེད་ཀྱི་ངོ་བོར་བརྟན་པའི་རྟེན་འབྲེལ་མཚོན་རྟགས་སུ། ས་གསུམ་ན་རྙེད་པར་དཀའ་བའི་བརྟན་བཞུགས་བཀའ་གསུང་དྲོན་མོའི་ཞལ་བཞེས་བྱིན་བརླབས་བཀའ་དྲིན་ཆེ་བར་བརྟེན།
དམ་སྲི་དོལ་རྒྱལ་དང་འབྲེལ་བ་གཏན་ནས་མེད་པའི་འཛམ་གླིང་ཡོངས་ཀྱི་དད་ལྡན་མིའི་འགྲོ་བ་སྤྱི་དང་སྒོས་སུ་བོད་མིའི་སྒྲིག་འཛུགས་དང་ཚོགས་སྡེ་ཁག་གི་དབུ་ལས་རྣམ་པ། དད་ལྡན་མི་མང་ཡོངས་བཀའ་ཆོས་དང་བཀའ་དབང་རིན་པོ་ཆེ་ཞུ་ཕྱིར་དང། བརྟན་བཞུགས་ཀྱི་སྐུ་མགྲོན་དུ་ཕེབས་གནང་ཡོང་བ་དང་ཡང་སྒོས་སུ་༸རྒྱལ་མཆོག་སྐུ་ཕྲེང་ལྔ་པ་ནས་ལྷ་འབངས་སུ་གཏོགས་ཤིང། ༸རྒྱལ་བ་སྐུ་ཕྲེང་རིམ་བྱོན་དང། ༸རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཆོས་སྲིད་གཉིས་ཐད་ཀྱི་བཀའ་དགོངས་འོག་ཤར་བསྐྱོད་བྱས་དང་བྱེད་བཞིན་པ་བྱ་རྒྱུའི་དམ་བཅའ་བརྟན་ཅིང། ད་ཆར་གཞིས་བྱེས་གཉིས་སུ་དམ་སྲི་དོལ་རྒྱལ་དང་འབྲེལ་བ་གཏན་ནས་མེད་པར་ཁྱབ་པའི་བར་ཁམས་སོག་ཤོད་ལུང་པའི་ཁོངས་སུ་གཏོགས་པའི་དཀར་འཇམ་ཡུག་གཅིག་གི་ལྷ་སྡེ་མི་སྡེ་ཡོངས་སམ། བརྟན་བཞུགས་དང་གསུང་ཆོས་ཀྱི་སྦྱིན་བདག་རྣམ་པ་བཞུགས་སྒར་རྡ་རམ་ས་ལར་བཀྲ་ཤིས་ལྷན་འཛོམས་ལ་ངེས་ཕེབས་ཡོང་བའི་གསལ་བསྒྲགས་སུ། བར་ཁམས་སོག་ཤོད་གསུང་ཆོས་དང་བརྟན་བཞུགས་གོ་སྒྲིག་ཚོགས་པས།
ཕྱི་ལོ་ ༢༠༡༥ ལོའི་ཟླ་བ་ ༡༠ པའི་ཚེས་ ༢༦ ཉིན།
