༢༠༡༠ ཟླ་ ༤ ཚེས་ ༣༠ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༢༩ ཉིན་འཕགས་ཡུལ་ཇོ་ནང་མ་དགོན་མཁན་ལས་རྣམ་པས་གོ་སྒྲིག་ཐོག་ཇོ་ནང་འགྲོ་ཕན་ལྷན་ཚོགས་དབུ་བརྙེས་པའི་མཛད་སྒོ་ཞིག་སྤྱི་ཐབ་ཡང་སྟེང་དུ་ཚོགས་ཡོད།
དེ་ཉིན་སྔ་དྲོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་འཕགས་ཡུལ་ཇོ་ནང་མ་དགོན་གྱི་མཁན་ཟུར་ཆོས་ཀྱི་སྣང་བ་རྣམ་གཉིས་ནས་ཇོ་ནང་འགྲོ་ཕན་ལྷན་ཚོགས་ཀྱི་ལས་ཁུངས་དབུ་འབྱེད་གྲུབ་བསྟུན་ཆུ་ཚོད་ ༡༠།༣༠ ཐོག་སྤྱི་ཐབ་ཚོགས་ཁང་དུ་སྐུ་མགྲོན་གཙོ་བོ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག ཆོས་བརྒྱུད་ཁག་གི་སྤྱི་འཐུས་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། འགྲོ་ཕན་ལྷན་ཚོགས་ཀྱི་ཚོགས་མི་བཅས་མི་གྲངས་ ༡༠༠ བརྒལ་བ་ལྷན་འཛོམས་ཐོག་ཡུལ་ཤུལ་དུ་བྱུང་བའི་ཡ་ང་བའི་རྐྱེན་ངན་གོད་ཆག་ཁྲོད་རང་རིགས་སྤུན་ཟླ་འདས་གསོན་ཡོངས་ལ་གདུང་སེམས་མཉམ་སྐྱེ་དང་སྐྱིད་སྡུག་མཉམ་མྱོང་ཆེད་སྐར་མ་གཅིག་རིང་མྱ་ངན་དང་། དེ་ནས་སྐར་མ་ལྔའི་རིང་བསྔོ་བ་སྨོན་ལམ་གནང་མཚམས་སྐུ་མགྲོན་གཙོ་བོ་མཆོག་དང་། དམིགས་བསལ་སྐུ་མགྲོན་མཆོག ཇོ་ནང་མ་དགོན་གྱི་མཁན་ཟུར་ཆོས་ཀྱི་སྣང་བ་བཅས་ནས་རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་སྣང་གསལ་ཞལ་ཕྱེ་གནང་རྗེས་རྟེན་འབྱུང་གསོལ་ཇ་དང་འབྲས་སིལ་ཕུལ། དེ་ནས་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་སྐབས་དང་པའི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་ལྷན་ཚོགས་དབུ་འཛུགས་དགོས་པའི་ངོ་སྤྲོད་གསུང་བཤད་གནང་གྲུབ་བསྟུན་ལྷན་ཚོགས་ཀྱི་སློབ་སྟོན་པ་འོད་ཟེར་རིན་པོ་ཆེས་སློབ་སྟོན་པ་རྣམས་ཀྱི་ཚབ་ཞུས་ཏེ་གསུང་བཤད་གནང་མཚམས་ཇོ་ནང་མ་དགོན་གྱི་མཁན་ཟུར་ཆོས་ཀྱི་སྣང་བས་འགན་འཛིན་ལྷན་ཚོགས་ཀྱི་ཚབ་ཞུས་ཏེ་གསུང་བཤད་གནང་། དེ་ནས་དམིགས་བསལ་སྐུ་མགྲོན་མཆོག་གི་གསུང་བཤད་གནང་དོན།
དེ་རིང་གི་མཛད་སྒོའི་ཐོག་ཆེད་དུ་ཕེབས་པའི་སྐུ་མགྲོན་གཙོ་བོ་རང་གཞུང་དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་། བཀའ་ཟུར་ཨ་ལགས་འཇིགས་མེད་རིན་པོ་ཆེ་མཆོག སློབ་སྟོན་པའི་སྐུ་ཚབ་སྨར་ཁམས་འོད་ཟེར་རིན་པོ་ཆེ་མཆོག ཇོ་ནང་བསྟན་པའི་མངའ་བདག་སྐྱབས་མགོན་རྗེ་བཙུན་དམ་པ་རིན་པོ་ཆེ་མཆོག སྤྲུལ་སྐུ་བཀྲ་ཤིས་རྒྱལ་མཚན་མཆོག དེ་བཞིན་ཇོ་ནང་མ་དགོན་གྱི་རྡོ་རྗེ་སློབ་དཔོན་ཆེན་པོ་ཆོས་ཀྱི་སྣང་བའི་གཙོས་བོད་ཕྱི་ནང་གཉིས་སུ་ཡོད་པའི་ཇོ་ནང་བ་སེར་སྐྱ་མི་མང་ཡོངས་ལ་ངས་དེ་རིང་འདིར་བོད་མི་མང་སྤྱི་འཐུས་ལྷན་ཁང་གི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་པ་དེ་རིང་དབུ་འབྱེད་གནང་བ་དང་། ཚོགས་པའི་དམིགས་ཡུལ། ལས་འཆར་སོགས་ཡིག་ཐོག་ཡོད་པར་ང་ཚོས་བསྔགས་བརྗོད་དང་འབྲེལ། དེ་བཞིན་སྒྲུབ་ཐུབ་རྒྱུའི་སྨོན་འདུན་དང་རེ་བ་བྱེད་ཀྱི་ཡོད། འདིར་སྤྱི་འཐུས་ལྷན་ཚོགས་ནས་གནད་དོན་ཁ་ཤས་ཐོག་གསལ་པོ་བཟོས་ཐུབ་ན་བསམ་བྱུང་། ད་ལྟ་དཔལ་ཇོ་ནང་བར་བོད་མི་མང་སྤྱི་འཐུས་ལྷན་ཚོགས་ཀྱི་ནང་ཆོས་ལུགས་ཆོས་བརྒྱུད་གཞན་ལྟར་ཐོབ་ཐང་དགོས་སྐོར་སྤྱི་འཐུས་ལྷན་ཚོགས་ལ་ལོ་ཤས་སྔོན་ནས་ཞུ་མཁན་བྱུང་བ་རེད། ཕྱོགས་གཅིག་ནས་བལྟས་ན་སྤྱི་འཐུས་ལྷན་ཚོགས་ཀྱི་བྱེད་བདེ་བོ་ཞིག་མཐོང་མདོག་ཁ་པོ་རེད། སྤྱིར་ཁྱེད་རང་ཚོས་མང་གཙོའི་འགྲོ་ལུགས་དེ་མཁྱེན་གྱི་ཡོད་པ་རེད། མི་མང་གི་འོས་འདེམས་བྱུང་བའི་སྤྱི་འཐུས་རྣམ་པ་གྲོས་ཚོགས་ཚོགས་སྐབས་ཁྲིམས་དང་། སྒྲིག་གཞི། བཅའ་ཁྲིམས་བསྐྱར་བཅོས། གྲོས་ཆོད་གང་ཞིག་འཇོག་དགོས་བྱུང་བ་ཡིན་ན་སྤྱི་འཐུས་ལྷན་ཚོགས་ལ་དཀའ་ངལ་ཡོད་པ་གསལ་པོ་རེད། དོན་གནད་གང་གི་ཐོག་ལ་ཡིན་ནའང་སྤྱི་འཐུས་ལྷན་ཚོགས་ཀྱི་ཚོགས་མི་ཡོངས་ནས་གང་གཟབ་ཀྱིས་གནད་དོན་གསལ་པོར་རྟོགས་ཏེ་ཐག་གཅོད་བྱེད་དགོས་རྒྱུ་ཞིག་ཡིན་པ་ངོས་འཛིན་བྱེད་ཀྱི་ཡོད། དེར་བརྟེན་དཔལ་ཇོ་ནང་བའི་སྐུ་ཚབ་བམ་འཐུས་མི་ཆོས་བརྒྱུད་གཞན་བཞིན་སྤྱི་འཐུས་ལྷན་ཚོགས་ནང་དགོས་ཀྱི་ཡོད་སྐོར་ཞུས་པ་དེ་ལ་ང་ཚོའི་ཐོག་ནས་བདག་པོ་རྩ་བ་ནས་མ་བརྒྱབ་པ་ཞིག་མིན་པ་ཚང་མས་མཁྱེན་གསལ་རེད། སྤྱི་འཐུས་ལྷན་ཚོགས་ནང་བསྐྱར་བཅོས་ཡིག་ཆ་སླེབས་པ་ཙམ་གྱི་འགྲིག་གི་མེེད། དེར་གསུམ་ཆ་གཉིས་ཀྱི་རྒྱབ་སྐྱོར་ངེས་པར་དུ་དགོས་ཀྱི་ཡོད། ༸གོང་ས་༸སྐྱབས་ཆེན་པོ་མཆོག་གི་དབུ་ཁྲིད་འོག་ང་རང་ཚོ་རྡོག་རྩ་ཆིག་སྒྲིལ་གནང་དགོས་ཀྱི་རེད། དེ་བཞིན་ཁྱེད་རང་ཚོའི་དམིགས་ཡུལ་ནང་ཆོས་བརྒྱུད་ཁག་དང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་དང་ལྷན་འབྲེལ་ལམ་དམ་གཟབ་གནང་རྒྱུ་སོགས་གསུངས་འདུག་པས་དེ་ཧ་ཅང་ཡག་པོ་རེད། ཅེས་གསུང་བཤད་གནང་། དེ་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན།དེ་རིང་འཕགས་ཡུལ་ཇོ་ནང་ལྷན་ཚོགས་ཀྱི་ཚོགས་འདུར་ཕེབས་པ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་ཚོགས་འདུ་འདི་ཧ་ཅང་གལ་གནད་ཆེན་པོ་རེད། ཚོགས་པ་འདི་འགོ་འབྱེད་བྱེད་རྒྱུའི་གོ་སྐབས་འདི་དུས་ཚོད་བཟང་པོ་ཞིག་ལ་ངོས་འཛིན་ཞུ་བཞིན་ཡོད། དེ་རིང་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་པ་དེ་ཡང་མཚན་དང་དོན་མཐུན་པ་ཡག་པོ་ཞིག་ཡོང་རྒྱུར་ངས་རེ་བ་ཞུ་གི་ཡོད། ང་ཚོ་བོད་གངས་ཅན་ལྗོངས་ཀྱི་མི་རིགས་ཤིག་ཆགས་ཡོད་པ་རེད། བོད་པའི་མི་རིགས་ཀྱི་ནང་བསམ་བློ་གཏོང་ཕྱོགས། དེ་བཞིན་ཤེས་རིག ཁོར་ཡུག་ཆགས་སྟངས། བོད་ཀྱི་ཆོས་དང་རིག་གཞུང་། འཛིན་སྐྱོང་བྱེད་སྟངས། འཛམ་གླིང་རྒྱལ་ཁབ་གཞན་དང་མ་འདྲ་བའི་སྔོན་མའི་ཆོས་དང་རིག་གཞུང་གང་ཡོད་པ་དེ་འཛམ་བུ་གླིང་གཞན་གྱི་ཆོས་དང་རིག་གཞུང་དང་མ་འདྲ་བར་རྒྱུན་གནས་ཀྱིས་འཛིན་སྐྱོང་བྱེད་ཐུབ་མཁན་ཞིག་གི་ཐོག་བསམ་བློ་བཏང་བ་ཡིན་ན། ཕལ་ཆེར་ང་ཚོ་བོད་ནང་ལྟར་འཛམ་གླིང་འདིའི་ནང་མེད་པ་རེད་བསམ་གྱི་ཡོད། དེ་སྔ་ང་ཚོ་སྐྱབས་བཅོལ་དུ་འབྱོར་རྗེས་མི་གཞན་ལ་བོད་པ་ཡིན་ཟེར་རྒྱུ་ངོ་ཚ་བྱེད་དགོས་པ་ཆགས་ཡོད། འོན་ཀྱང་ད་ལྟ་ང་ཚོས་མི་ལ་བོད་པ་ཡིན་ཞེས་ཟེར་བ་མ་ཟད། ང་ཚོའི་ཉེ་འགྲམ་དུ་ཡོད་པའི་རྒྱལ་ཁབ་ནང་བོད་པའི་ཆོས་དང་རིག་གཞུང་གཅིག་མཚུངས་ཡིན་པའི་མི་ཚོས་ཀྱང་བོད་པའི་དཔྱ་ཁྲལ་ལག་དེབ་དང་ཕྱིར་བསྐྱོད་ལག་འཁྱེར་སེར་པོ་སོགས་ཞུས་པའི་དུས་ཚོད་ཅིག་ཆགས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེ་བཀའ་དྲིན་ལ་བརྟེན་ནས། ནང་པའི་ཆོས་འདིར་འཛམ་གླིང་མི་མང་ནས་དོ་སྣང་བྱ་རྒྱུའི་གནས་སྟངས་ཞིག་ཆགས་ཡོད། དེ་བཞིན་བཙན་བྱོལ་བོད་གཞུང་ཆོས་རིག་ལས་ཁུངས་ནས་ཀྱང་བཙན་བྱོལ་སྤྱི་ཚོགས་ཀྱི་ནང་དུ་ཞབས་ཕྱི་དང་གསོལ་འདེབས་ཇི་དགོས་ཞུ་བཞིན་ཡོད་པ་མ་གཏོགས་ཇོ་ནང་ལ་ཐོབ་སྐལ་བཅད་པ་དེ་འདྲ་བྱུང་མེད། ཁྱེད་རང་ཚོ་ཇོ་ནང་འགྲོ་ཕན་ལྷན་ཚོགས་ཞེས་པའི་ཚོགས་པ་སྐྱིད་སྡུག་འདི་གཞན་ལས་ལྷག་པ་གནང་རྒྱུའི་འབད་བརྩོན་གནང་རོགས་ཞེས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་ཡོད། དེ་ནས་ཇོ་ནང་འགྲོ་ཕན་ལྷན་ཚོགས་ཀྱི་སྐབས་དང་པོའི་ཚོགས་གཞོན་སེང་ཐར་ལགས་ཀྱི་ཐུགས་རྗེ་ཆེ་ཞུས་རྗེས་མཛད་སྒོ་གྲོལ། ཇོ་ནང་པ་ནི་དུས་རབས་བཅུ་གཉིས་པའི་ནང་ཀུན་སྤངས་ཐུགས་རྗེ་བརྩོན་འགྲུས་ཀྱིས་ཇོ་མོ་ནང་ཞེས་པའི་ས་ཆར་གདན་ས་མཛད་དེ་སློབ་ཚོགས་བསྐྱངས་པས་ས་མིང་བླ་མར་ཐོགས་པ་དང་། བླ་མའི་མཚན་ཆོས་རྒྱུད་ལ་ཐོགས་ནས་ད་བར་ཆོས་རྒྱུད་འདི་འཛིན་མཁན་ལ་དཔལ་རྒྱལ་བ་ཇོ་ནང་པ་ཞེས་ཐོགས་པ་དང་དེང་བོད་ཆོལ་ཁ་གསུམ་ན་དགོན་སྡེ་གྲངས་ ༩༠ ལྷག་ཡོད་པ་བཅས།
