༢༠༡༥ ཟླ་ ༡༠ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༡༠ ཚེས་ ༡༥ ནས་ཕྱི་ཚེས་ ༡༧ བར་ཉིན་གྲངས་གསུམ་རིང་དབུས་བོད་ཀྱི་སྨན་རྩི་ཁང་ཚོགས་ཁང་དུ་བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱིས་གོ་སྒྲིག་འོག་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་གསུམ་པ་དབུ་འབྱེད་ཀྱི་མཛད་སྒོ་ཞིག་ཚོགས་སོང་། དེ་ཡང་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། བོད་མིའི་སྒྲིག་འཛུགས་ཀྱི་འཕྲོད་བསྟེན་དང་ཆོས་རིག་དྲུང་ཆེ་རྣམ་གཉིས། བོད་ཀྱི་སྨན་རྩིས་ཁང་གི་འགན་འཛིན། དེ་བཞིན་བགྲོ་གླེང་དེར་ལྷན་བཞུགས་གནང་མཁན་དཔལ་ལྡན་རྒྱུད་སྟོད་གྲྭ་ཚང་གི་མཁན་པོ་བྱ་དོ་རིན་པོ་ཆེ་མཆོག དོལ་པོ་སྤྲུལ་སྐུ་ལགས། སྨན་རམས་པ་གནས་ཤར་རྡོ་རྗེ་རབ་བརྟན་ལགས། སྨན་རྩིས་པ་ཨེ་པ་བསོད་ནམས་རིན་ཆེན་ལགས། སྨན་རམས་པ་བསོད་ནམས་ལྷ་མོ་ལགས། རྩིས་རམས་པ་བསོད་ནམས་དཔལ་མོ་ལགས། འབུམ་རམ་པ་སོ་ནྣི་ཝིདྷན་ Sonnee Weeden ལགས། ཊེ་རི་ཨི་གྷན་ Terry Eagan ལགས་བཅས་དང་། དེ་བཞིན་ཚོགས་བཅར་བ་སློབ་ཕྲུག ལས་བྱེད། གསར་འགོད་པ་བཅས་ཁྱོན་མི་གྲྭངས་ ༢༠༠ བརྒལ་བ་འདུ་འཛོམས་གནང་ཡོད།
མཛད་སྒོའི་ཐོག་མར་སྤྱི་འཐུས་ཚོགས་གཙོ་མཆོག་གིས་སྣང་གསལ་ཞལ་ཕྱེ་གྲུབ་བསྟུན་བོད་བསྟན་སྲིད་ཆེད་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་རྒྱལ་གཅེས་པ་རྣམས་ལ་མྱ་ངན་གུས་འདུད་ཞུས་པ་དང་། དེ་རྗེས་གཡུ་ཐོག་གསོལ་འདེབས་རྟ་དབྱངས་དང་བཅས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས། དེ་ནས་ལུས་སེམས་སྲོག་གི་འགན་འཛིན་དགེ་བཤེས་བསྟན་པ་བཀྲ་ཤིས་ལགས་ཀྱིས་བགྲོ་གླེང་དང་འབྲེལ་ཕེབས་བསུའི་གསུང་བཤད་གནང་། དེ་རྗེས་སྐུ་མགྲོན་གཙོ་བོ་སྤྱི་འཐུས་ཚོགས་གཙོ་མཆོག་གིས་ཚོགས་བཅར་བ་ཡོངས་ལ་འཚམས་འདྲི་གནང་བ་དང་ཆབས་ཅིག་གསུང་བཤད་གནང་དོན། རྣམ་པ་ཚོས་ཚོགས་ཆེན་ཐེངས་གསུམ་པ་དེ་འཚོགས་བཞིན་ཡོད། ཚོགས་ཆེན་འདི་ཚོགས་དགོས་པའི་དམིགས་ཡུལ་ཀློག་སྐབས་རྗེས་སུ་ཡི་རང་ཞུ་དགོས་པ་ཞིག་རེད། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་ནས་ལོ་བསྟུད་ནས་སྨན་རྩིས་ཁང་ལ་བཀའ་སློབ་རབ་དང་རིམ་པ་ཕེབས་ཡོད་པ་དེའི་ནང་ནས་སྒྲུབ་དགོས་པ་དང་ལག་བསྟར་བྱེད་དགོས་པ་དེ་ང་ཚོས་བྱེད་དགོས་པ་རེད་མ་གཏོགས། ༸རྒྱལ་བ་རིན་པོ་ཆེ་མཆོག་གིས་ཆ་ཚང་མཛད་ཐུབ་རྒྱུ་ཁག་པོ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་སྙིང་ལ་བཅངས་ནས་རྣམ་པ་ཚོས་འབད་བརྩོན་གནང་སྟེ།
ཕྱི་ལོ་ ༢༠༡༣ ནས་འགོ་བཙུགས་ནས་ལོ་བསྟུད་མར་ཚོགས་འདུ་གོ་སྒྲིག་ཞུ་རྒྱུ་དེ་ཧ་ཅང་གལ་ཆེན་པོ་རེད་འདུག ལྷག་པར་དེང་སྐབས་འཛམ་གླིང་ནང་འགྱུར་བ་ཤུགས་ཆེན་པོ་ཞིག་འགྲོ་བཞིན་ཡོད་སྟབས། མི་ཚོས་མི་ཚེ་སྐྱེལ་སྟངས་དང་བསམ་བློའི་འཁྱེར་སོ་གང་ཅིའི་ཐོག་ནས་འགྱུར་བ་ཤུགས་ཆེན་པོ་ཞིག་ཕྱིན་ཡོད། དེ་དང་བསྟུན་ནང་དོན་རིག་པའི་ཐོག་ནས་བསམ་བློའི་འཁྱེར་སོ་ག་རེ་ཆགས་ཀྱི་ཡོད་མེད། དེས་ཁྱད་པར་གང་བཟོ་གི་ཡོད་མེད། དེ་བཞིན་སྨན་གཞུང་གི་ཐོག་ནས་ལུས་སེམས་སྲོག་གི་གནས་སྟངས་དེ་ཚོའི་ངོ་བོ་འཛིན་སྟངས་དང་དེའི་ཐོག་ནས་འབྲེལ་བ་ཆགས་སྟངས། དེ་བཞིན་རྒྱུ་དང་རྐྱེན་གྱིས་ལུས་སེམས་འཁྲུག་རྒྱུའི་གནས་སྟངས་གང་འདྲ་ཆགས་ཀྱི་ཡོད་མེད་དང་། བཅོས་ཐབས་ཇི་ལྟར་བྱེད་དགོས་མིན་སོགས་ཀྱི་གནས་སྟངས་ཆ་ཚང་གི་ཐོག་ཚོགས་འདུ་དང་པོར་གོ་བསྡུར་གནང་འདུག དེ་བཞིན་ཚོགས་འདུ་གཉིས་པའི་ཐོག་རིག་པའི་གཞུང་ལུགས་མི་འདྲ་བ་ཁག་དང་། ལྷག་པར་སྨན་གྱི་གཞུང་ལུགས་མི་འདྲ་བའི་མཁས་དབང་མང་པོ་གདན་ཞུས་ཀྱིས་ཁོང་རྣམ་པ་ཚོ་དང་ལྷན་གོ་བསྡུར་ལྷུག་པོ་གནང་བ་དེས་ཏན་ཏན་ཐུགས་ཕན་གསོ་བ་བྱུང་ཡོད་ངེས་རེད། ད་ཐེངས་ཚོགས་ཐེངས་གསུམ་པའི་ཐོག་ལ་གཙོ་བོ་སེམས་ཁམས་ཐོག་བགྲོ་གླེང་གནང་རྒྱུ་ཡིན་སྟབས། དེས་མང་པོ་ཞིག་ལ་ཏན་ཏན་ཕན་ཐོགས་ཆེན་པོ་ཡོང་གི་རེད་བསམས་ཀྱི་ཡོད། ཅེས་དང་།
དེ་ནས་ཚོགས་གཙོ་མཆོག་གིས་རང་ཉིད་ཀྱི་མི་ཚེའི་བརྒྱུད་རིམ་ཁྲོད་བསམ་བློའི་འཁྱེར་སོ་དང་འབྲེལ་བའི་སེམས་ལ་བདེ་སྐྱིད་དང་ལུས་བདེ་ཐང་ཇི་ལྟར་སྤྲད་ཐུབ་མིན་སྐོར་གྱི་ཉམས་མྱོང་ངོ་སྤྲོད་གནང་བ་དང་ཆབས་ཅིག་གསུང་དོན། སེམས་ཁམས་འདི་ཧ་ཅང་གལ་ཆེན་པོ་ཆགས་ཡོད། ལུས་བདེ་པོ་ཡོང་རྒྱུར་སེམས་སྐྱིད་པོ་མེད་ན་ཡོང་རྒྱུ་མེད་པ་དེ་ཚང་མས་མཁྱེན་གསལ་རེད། གཙོ་བོ་སྤྱི་ནོར་༸སྐྱབས་མགོན་ཆེན་པོ་ཆེ་མཆོག་དང་། དེ་བཞིན་ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་པའི་བླ་ཆེན་བསྟན་བདག་རྣམ་པ་ཚོས་མགོན་པོ་གང་ཉིད་མཆོག་ལ་དབུ་འོག་དཔུང་འདེགས་ཞུས་པའི་ཐོག་ནས་བསྟན་འཛིན་གྱི་སྐྱེ་བོ་དམ་པ་མང་པོ་ཞིག་གིས་འཛམ་གླིང་འདིའི་ནང་ནང་ཆོས་ཟེར་སྐབས་ལྟ་སྟངས་མི་འདྲ་བ་ཞིག་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་དེ་ཚོ་ཧང་སང་དགོས་པའི་རླབས་ཆེན་ཡིན་པར་བརྟེན། ནང་པའི་ཆོས་ཡིན་ནའང་ནང་པའི་ཆོས་དང་། ནང་པའི་ལྟ་གྲུབ། ནང་པའི་ཚན་རིག་བཅས་དབྱེ་བ་ཕྱེ་གནང་ཡོད། ཅེས་སོགས་ཀྱི་གསུང་བཤད་གནང་། དེ་ནས་རྩིས་རམས་པ་བསྟན་འཛིན་སྙན་གྲགས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྗེས་ཐེངས་འདིའི་དབུ་འབྱེད་མཛད་སྒོ་ལེགས་པར་འགྲོལ། སྤྱིར་ཐེངས་འདིའི་ལུས་སེམས་སྲོག་གི་ཐེངས་གསུམ་པའི་བགྲོ་གླེངཐོག་སེམས་ཁམས་འཁྲུགས་རྐྱེན་དང་། སེམས་ཁམས་བཅོས་ཐབས་ཞེས་པའི་གནད་དོན་ཐོག་བགྲོ་གླེང་བྱ་རྒྱུ་ཡིན་འདུག་པ་བཅས།།
