༢༠༡༥ ཟླ་ ༡༠ ཚེས་ ༡༢ རེས་གཟའ་ཟླ་བ།

༄༅། །བྱང་ཨ་ཕི་རི་ཀའི་གླིང་ཆེན་གྱི་ཏུ་ནི་ཤི་ཡའི་ Tunisia ཡུལ་གྱི་རྒྱལ་ཡོངས་གྲོས་མོལ་ཚོགས་ཆུང་ལ་National Dialogue Quartet འདི་ལོའི་ནོ་བེལ་ཞི་བདེའི་གཟེངས་རྟགས་ཀྱི་བྱ་དགའ་ཐོབ་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འདྲིའི་གསུང་འཕྲིན་ཞིག་སྩལ་བའི་ནང་འཁོད་དོན། ཏུ་ནི་ཤི་ཡའི་ནང་གནས་སྟངས་ཧ་ཅང་ཛ་དྲག་ཅན་གྱི་དུས་སྐབས་སུ་རྒྱལ་ཡོངས་གྲོས་མོལ་ཚོགས་ཆུང་གིས་དཀའ་ངལ་ལ་མ་འཛེམས་པར་ལངས་ཕྱོགས་མི་མཐུན་པའི་ཆབ་སྲིད་ཚོགས་པ་འདྲ་མིན་མང་པོ་ཡོད་པ་དེ་དག་ཕན་ཚུན་གྲོས་མོལ་དང་ཞི་བདེའི་ལམ་ནས་བསམ་ཚུལ་མི་མཐུན་པ་རྣམས་སེལ་ཐབས་ཀྱིས་རིམ་བཞིན་འཆམ་མཐུན་གྱི་སྤྱི་ཚོགས་ཤིག་བསྐྲུན་རྒྱུར་ཞབས་འབད་བརྩོན་ཧ་ཅང་གནང་བ་དེ་ནི་འཛམ་གླིང་གི་མིག་དཔེ་ཞིག་ཏུ་གྱུར་ཐུབ་པ་བྱུང་ཡོད། གྲུབ་འབྲས་དེ་དག་ཞི་བདེ་དང་གྲོས་མོལ་གྱི་ལམ་ནས་རང་དབང་དང་མང་གཙོ་གོང་སྤེལ་གཏོང་འདོད་མཁན་ཚང་མར་བློ་སྤོབས་སྐྱེ་གཞི་ཞིག་ཏུ་གྱུར་ཡོད། དེང་སྐབས་ང་ཚོར་རྙོག་འཛིང་དང་འཚེ་བའི་ལས་འགུལ་གང་སར་སྤེལ་བཞིན་པར་གདོང་ལེན་བྱེད་དགོས་པའི་དུས་ཚོད་ཧ་ཅང་གཉན་འཕྲང་ཅན་ཞིག་ཡིན་ནའང་། གལ་ཏེ་ང་ཚོ་ཚང་མ་འགྲོ་བ་མིའི་ཁྱིམ་ཚང་གཅིག་གི་སྤུན་མཆེད་ཕོ་མོ་ཡིན་བསམས་པའི་འདུ་ཤེས་འཛིན་ཐུབ་པ་ཡིན་ན། ང་ཚོས་འཛམ་གླིང་ནང་ཞི་བདེ་སྐྲུན་ཐུབ། འདི་ལོའི་ནོ་བེལ་ཞི་བདེའི་གཟེངས་རྟགས་དེས་མི་སྒེར་དང་ཚོགས་པ་སོགས་ལ་དཀའ་རྙོག་དེ་དག་དྲག་སྤྱོད་ལ་མ་བརྟེན་པར་འཚེ་མེད་ཞི་བ་གྲོས་མོལ་གྱི་ལམ་ནས་སེལ་རྒྱུའི་སེམས་འགུལ་འཕར་མ་ཞིག་འཐེབ་རྒྱུའི་རེ་བ་ཞུ་བཞིན་ཡོད། ཅེས་འཁོད་འདུག