༢༠༡༥ ཟླ་ ༡༠ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༡༠ ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་རྡ་ས་གངས་སྐྱིད་དུ་རྟེན་གཞི་བྱས་པའི་མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས་ནས་ལོ་བཅུ་འཁོར་བའི་རྟེན་འབྲེལ་གྱི་མཛད་སྒོ་ཚོགས་ཡོད། དེ་ཡང་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་གཙོས། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སློབ་གྲྭའི་སྦྱིན་བདག དེ་བཞིན་དཔེ་སྟོན་སློབ་གྲྭ་སྟེང་ཤོད་གཉིས་ཀྱི་དགེ་ལས་སློབ་ཕྲུག་དང་ཕ་མ།
ཕྱི་ནང་གི་གསར་འགོད་པ་སོགས་ཚང་འཛོམས་ཀྱིས་ཐོག་མར། ༸གོང་ས་༸སྐྱབས་མགོན་ཆེན་པོ་མཆོག་གིས་དཔེ་སྟོན་སློབ་སློབ་གྲྭའི་པར་རིགས་འགྲེམས་སྟོན་རྣམས་ལ་གཟིགས་ཞིབ་མཛད་རྗེས། སློབ་དགེ་བསམ་གྲུབ་ལགས་ཀྱིས་ལས་རིམ་ངོ་སྤྲོད་ཀྱིས་ཐོག་མར་སློབ་གྲྭའི་གཞི་རིམ་འོག་མའི་སློབ་ཕྲུག་ཁག་གཅིག་ནས་༼དུས་བཟང་གཉིས་འཛོམས་ཀྱི་མཆོད་སྤྲིན།༽ ཞེས་པའི་བཀྲ་ཤིས་རྟེན་འབྲེལ་གྱི་མཉམ་གཞས་གཟིགས་འབུལ་ཞུས།
དེ་རྗེས་སློབ་སྤྱི་བསྟན་འཛིན་རྡོ་རྗེ་ལགས་ནས་ལས་བསྡོམས་སྙན་སྒྲོན་ཞུས་གྲུབ་མཚམས། འབྲིང་རིམ་སློབ་ཕྲུག་ཁག་གཅིག་གིས་བོད་ཡིག་གི་དབྱངས་གསལ་སྐོར་རྟགས་གསལ་སྤྱན་འབུལ་ཞུས། དེ་ནས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་བསྟུན།
ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་། དེ་རྗེས་དམིགས་བསལ་སྐུ་མགྲོན་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་། དེ་ནས་གཞི་རིམ་འོག་མའི་འཛིན་གྲྭ་དང་པོ་ནས་ལྔ་པའི་བར་གྱི་སློབ་ཕྲུག་ལྔས་བོད་ཡིག་སྙན་རྩོམ་༼༸སྐྱབས་མགོན་ལགས།༽ ཞེས་པ་གྱེར་འདོན་ཞུས་རྗེས་འཛིན་རིམ་བཅུ་པའི་སློབ་ཕྲུག་གཉིས་ནས་ཨིན་ཡིག་སྙན་རྩོམ་གྱེར་འདོན་ཞུས་པ་སོགས་ཡོངས་སུ་གྲུབ་རྗེས། ཤེས་རིག་བཀའ་བློན་མཆོག་གིས་མེས་དབོན་གཙུག་ལག་དཔེ་སྟོན་སློབ་གྲྭ་ཐོག་མར་དབུ་བརྙེས་པ་ནས་བཟུང་ད་བར་ཕྱག་ལས་གནང་མཁན་གྱི་དགེ་ལས་དྲུག་ལ་གཟེངས་བསྟོད་ཀྱི་ཕྱག་འཁྱེར་གནང་།
དེ་བཞིན་༸གོང་ས་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་གིས་དཔེ་སྟོན་སློབ་གྲྭའི་བུ་མོ་བརྒྱད་ཀྱིས་སྙན་རྩོམ་ཕྱོགས་སྒྲིག་ཁྱེད་ཀྱི་ལེགས་སྐྱེས་ཞེས་པའི་དཔེ་དེབ་དབུ་འབྱེད་གནང་གྲུབ་བསྟུན། ༸གོང་ས་༸སྐྱབས་མགོན་ཆེན་པོ་མཆོག་གིས་འདི་ཕྱིའི་བླང་དོར་གྱི་བཀའ་སློབ་སྩལ་བ་དང་སྦྲགས། གང་བློ་མའི་ལྗགས་ལུང་བཀའ་དྲིན་སྩལ། མཛད་རིམ་གྱི་མཐར་དགེ་རྒན་ཕ་མའི་ཚོགས་ཆུང་གི་ཚོགས་གཙོ་དང་བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྗེས་བཀྲ་ཤིས་པའི་དུས་ཆེན་གྱི་མཛད་སྒོ་ལེགས་པར་གྲོལ། །
