ཕྱི་ལོ་ ༢༠༡༥ ཟླ་ ༡༠ ཚེས་ ༡ རེས་གཟའ་ཕུར་བུ།

༄༅། །ཕྱི་ལོ་ ༢༠༡༥ ཟླ་ ༡༠ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ལ་ཨ་རིའི་ས་ལིས་བུ་རི་ Salisbury University གཙུག་ལག་སློབ་གཉེར་ཁང་གིས་སྙན་གྲགས་ཆེ་བའི་པེར་སི་ཌེན་ཤལ་རྟགས་མ་ Presidential Medal གནང་རྒྱུ་ཡིན་འདུག

དེ་ཡང་པིར་སི་ཌེན་ཤལ་རྟགས་མ་ཞེས་པ་དེ་ནི་གཙུག་ལག་སློབ་གཉེར་ཁང་གིས་སྤྱི་ཚོགས་ནང་གཟེངས་སུ་ཐོན་པ་དང་འཆར་སྣང་ཅན་གྱི་འགོ་ཁྲིད་མི་སྣ་སྒེར་པ་ཁག་གཅིག་ལ་གནང་སྲོལ་ཡོད་པ་ཞིག་དང་། ཐེངས་འདིའི་པེར་སི་ཌེན་ཤལ་རྟགས་མ་ཞེས་པ་འདི་མེ་རི་ལན་ཌི་མངའ་སྡེའི་ཁོངས་སུ་གཏོགས་པའི་གཙུག་ལག་སློབ་གཉེར་ཁང་གི་འགན་འཛིན་ལྷན་ཚོགས་མཉམ་འཛོམས་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ལ་གནང་རྒྱུའི་ཐག་གཅོད་གནང་སྟེ་གསལ་བསྒྲགས་གནང་བ་ཞིག་ཡིན་འདུག

དེ་བཞིན་འདི་ལོ་ཕྱི་ཟླ་བཅུ་པའི་ནང་སྲིད་སྐྱོང་མཆོག་གིས་ཁུལ་དེར་མང་གཙོ་དང་འབྲེལ་བའི་གསུང་བཤད་མ་གནང་གོང་དེ་གའི་ས་ལིས་བུ་རི་གཙུག་ལག་སློབ་གཉེར་ཁང་གི་དབུ་འཛིན་སྐུ་ཞབས་ཇ་ནེཌ་ཌུཌ་ལེ་ Dr. Janet Dudley-Eshbach ལགས་ཀྱིས་སྲིད་སྐྱོང་མཆོག་ལ་རྟགས་མ་དེ་འབུལ་རྒྱུ་ཡིན་འདུག

ཕྱོགས་མཚུངས་འདི་ལོ་ཕྱི་ཟླ་བཅུ་པའི་ནང་བོ་སར་མན་རྩོད་རྙོག་འདུམ་འགྲིག་བསྟི་གནས་ཁང་ Bosserman Centre for Conflict Resolution དུ་སྲིད་སྐྱོང་མཆོག་ལ་མགྲོན་འབོད་ཞུས་པ་བཞིན། སྲིད་སྐྱོང་མཆོག་གིས་༼གང་ཟག་གཅིག་གིས་ཀྱང་འགྱུར་བ་གཏོང་ཐུབ། One Person Can Make a Difference༽ ཅེས་པའི་བརྗོད་གཞིའི་ཐོག་གསུང་བཤད་གནང་རྒྱུ་དང་། སྐབས་དེར་རྒྱལ་ཁབ་ཀྱི་དབུ་ཁྲིད་ཟུར་པ་ཁག་གཅིག་དང་དེ་བཞིན་ནོ་བེལ་གཟེངས་རྟགས་བཞེས་མྱོང་མཁན་གྱི་ཆེས་མཐོའི་མི་སྣ་ཁག་གཅིག་ཀྱང་མཉམ་ཞུགས་གནང་རྒྱུ་ཡིན་འདུག

དེ་སྔོན་ཕྱི་ལོ་ ༢༠༡༢ ཟླ་ ༣ ཚེས་ ༡ ཉིན་ཨ་ཡར་ལེན་ཌེའི་རྒྱལ་ས་ཌབ་ལིན་(Dublin) ཁུལ་གྱི་(Trinity College Historical Society of Trinity College )ཞེས་པའི་མཐོ་སློབ་དེས་སྲིད་སྐྱོང་མཆོག་ལ་མང་ཚོགས་ལ་ཕུལ་བྱུང་གཏམ་བཤད་ཀྱི་གསེར་གྱི་རྟགས་མ་འཕུལ་ཡོད་པ་མ་ཟད། འདི་ལོའི་ཟླ་ ༩ ནང་སྲིད་སྐྱོང་མཆོག་རྒྱ་གར་རྒྱལ་ཡོངས་སློབ་ཕྲུག་ལྷན་ཚོགས་ཀྱི་འགན་འཛིན་ལྷན་ཚོགས་ཀྱི་ཚོགས་མིར་བསྐོ་གཞག་གནང་བ་དང་། ཚོགས་པ་འདི་བཞིན་སློབ་ཕྲུག་ཚོགས་པ་ཆེ་ཤོས་གྲས་ཤིག་ཡིན་ཞིང་། ཚོགས་པ་འདིའི་ལོ་འཁོར་ཚོགས་ཆེན་སྐབས་སློབ་ཕྲུག་ཆིག་ཁྲི་བརྒལ་བས་མཉམ་ཞུགས་བྱེད་ཀྱི་ཡོད་འདུག་པ་བཅས། །