ཕྱི་ལོ་ ༢༠༡༥ ཟླ་ ༩ ཚེས་ ༢༢ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༩ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཡུལ་ཀེམ་བི་རིཇ་ནས་ཆིབས་ཞལ་མ་འགྱུར་གོང་གསར་འགོད་པ་ཁག་གཅིག་གིས་བཅར་འདྲིར་བཀའ་ལན་སྩལ་བ་དང་། ཕྱོགས་མཚུངས་དབྱིན་ཡུལ་རྒྱལ་ས་ལོན་ཊོན་ཁུལ་གྱི་སློབ་ཕྲུག་ཁག་གཅིག་ལ་མཇལ་ཁ་དང་བཀའ་སློབ། དེ་བཞིན་བགྲོ་གླེང་ལྷན་ཚོགས་ཐོག་དབུ་བཞུགས་མཛད་ཡོད།
དེ་ཡང་སྐབས་དེར་ The Times ཞེས་པའི་གསར་ཁང་གི་གསར་འགོད་པས་ཡུ་རོབ་ནང་སྐྱབས་བཅོལ་བ་ཡོང་བཞིན་པའི་གནས་སྟངས་སྐོར་བཅར་འདྲི་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་དོན། ཡུ་རོབ་ནང་སྐྱབས་བཅོལ་དུ་ཡོང་མི་རྣམས་ལ་རོགས་རམ་གནང་བ་འདི་ངོ་མཚར་སྐྱེ་འོས་པ་རེད། ཡིན་ནའང་གཙོ་ཆེ་ཤོས་ཁོང་རང་ཚོའི་ལུང་པའི་ནང་ཞི་བདེ་ཡོང་ཐབས་འབད་བརྩོན་བྱེད་དགོས། ང་ཚོས་ངེས་པར་དུ་ཁོང་ཚོའི་རྒྱལ་ཁབ་ནང་ཞི་བདེ་ཡོང་བར་འབད་བརྩོན་བྱ་དགོས། ཞེས་དང་། དེ་བཞིན་ཞི་བདེ་དང་། ཆོས་ལུགས་མཐུན་སྒྲིལ། བཅས་ཀྱི་སྐོར་བཀའ་སློབ་རྒྱས་པར་སྩལ།
དེ་རྗེས་ The Big Issue ཞེས་པའི་ཚགས་ཤོག་གི་གསར་འགོད་པ་ Steven MacKenzie ཡིས་༸གོང་ས་༸སྐྱབས་མགོན་ཆེན་པོ་མཆོག་ནི་
འཛམ་གླིང་ནང་གི་ཆེས་སྙན་གྲགས་ཆེ་བའི་སྐྱབས་བཅོལ་བ་ཞིག་ཡིན་ཞེས་ཆེ་བསྟོད་ཞུས་འདུག མགོན་པོ་གང་ཉིད་མཆོག་གིས་བཀའ་ལན་སྩལ་དོན། གངས་སྐྱིད་ང་ཡི་ཕ་ཡུལ། །སུ་བྱམས་ང་ཡི་ཕ་མ། །ཞེས་ང་ཚོ་བོད་པའི་ཁ་རྒྱུན་དུ། ས་ཆ་གང་ཞིག་ཏུ་སོ་སོ་སྐྱིད་པོ་ཚོར་བ་དེ་རང་གི་ཕ་ཡུལ་ཡིན་ཞེས་དང་། དེ་བཞིན་སུ་ཞིག་གིས་རང་ཉིད་ལ་བྱམས་བརྩེའི་ལྟ་སྐྱོང་ཡག་པོ་བྱེད་མཁན་དེ་རང་ཉིད་ཀྱི་ཕ་མ་ཡིན་ཞེས་བཤད་སྲོལ་ཡོད་པ་བཞིན་ཡིན།
དེ་རྗེས་བཀའ་གདམས་གསར་མའམ་དོལ་རྒྱལ་ཚོགས་པ་ནས་ཕྱིར་ཐོན་པའི་མི་སྣ་ཁག་གཅིག་དང་མཇལ་འཕྲད་མཛད་སྐབས། དོལ་རྒྱལ་ལམ་བཀའ་གདམས་གསར་མའི་ཚོགས་ཁོངས་ནས་རང་འགུལ་གྱིས་ཕྱིར་ཐོན་བྱས་པའི་མི་ཞིག་གིས། དེ་སྔོན་ཁོ་པ་དོལ་རྒྱལ་བསྟེན་གསོལ་བྱེད་མཁན་གྱི་གྲས་ཤིག་ཡིན་ནའང། དེང་སྐབས་དོལ་རྒྱལ་རྗེས་འབྲང་པས་འཛམ་གླིང་ཁྱོན་ཡོངས་སུ་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་དང་ངོ་རྒོལ་ཤུགས་ཆེ་བྱས་པ་དེར་སེམས་ཀྱི་མ་བཟོད་པར་བརྟེན་ངས་དོལ་རྒྱལ་ཚོགས་པའི་ནང་མུ་མཐུད་བསྡད་རྒྱུ་མཚམས་འཇོག་བྱས་པ་ཡིན། ཞེས་མགོན་པོ་གང་ཉིད་མཆོག་ལ་ཞུས་སྐབས། མགོན་པོ་གང་ཉིད་མཆོག་གིས་བཀའ་སློབ་ཕེབས་དོན། དོལ་རྒྱལ་གྱི་གནད་དོན་དེ་བཞིན་ལོ་བཞི་རྒྱ་གོང་གི་གནས་ཚུལ་ཞིག་ཡིན་པ་དང་། དོལ་རྒྱལ་གྱི་བྱུང་རིམ། ༸རྒྱལ་དབང་སྐུ་ཕྲེང་ལྔ་པ་ཆེན་པོ་མཆོག་གིས་གཙོས་པའི་༸རྒྱལ་མཆོག་སྐུ་ཕྲེང་བདུན་པའི་ཡོངས་འཛིན་སྐབས་ཀྱི་དོལ་རྒྱལ་གྱི་གནད་དོན། དེ་བཞིན་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གི་སྐུ་དུས་སུ་སྐྱབས་རྗེ་ཕ་བོང་ཁའི་གནད་དོན། དེ་བཞིན་མགོན་པོ་གང་ཉིད་ཀྱི་ཡོངས་འཛིན་རྣམ་གཉིས་སྐབས་ཀྱི་དོལ་རྒྱལ་སྐོར་གྱི་གནད་དོན་དང་། བཙན་བྱོལ་ནང་དོལ་རྒྱལ་གྱི་གནད་དོན་ཇི་བྱུང་སོགས་ཞིབ་པར་བཀའ་སློབ་སྩལ།
ཉིན་གུང་ལྗགས་སྨིན་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་ལོན་ཌོན་གྱི་བ་ཊར་སིའི་རྫོང་ Newton Preparatory School ཞེས་པའི་སློབ་ཁང་དེར་ཆིབས་སྒྱུར་བསྐྱངས་ནས་ Inspire Dialogue Foundation ཐེབས་རྩས་གོ་སྒྲིག་གིས་༸གོང་ས་༸སྐྱབས་མགོན་ཆེན་པོ་མཆོག་དང་། ཝི་ལམ་སི་ Williams མཆོག་རྣམས་གཉིས་དབུ་བཞུགས་ཐོག་སློབ་ཕྲུག་ཚོ་དང་ལྷན་དུས་རབས་ཉི་ཤུ་རྩ་གཅིག་པའི་མི་ཐོག་ཞེས་པའི་བརྗོད་གཞིའི་ཐོག་བཀའ་སློབ་དང་བགྲོ་གླེང་མཛད་ཡོད།
དེ་ཡང་ཐེངས་འདིའི་བགྲོ་གླེང་ནང་ལོན་ཊོན་ནང་རྟེན་གཞི་བྱས་པའི་སློབ་ཁག་བདུན་ཙམ་གྱིས་མཉམ་ཞུགས་ངང་བགྲོ་གླེང་མ་མཛད་པའི་སྔ་རོལ་དུ་སློབ་ཕྲུག་སྡེ་ཚན་ཁག་གཅིག་གིས་འགྲོ་བ་མིའི་ཐོབ་ཐང་དང་། རང་དབང་དང་འབྲེལ་བའི་སྙན་རྩོམ། གླུ་གཞས་སོགས་གཟིགས་འབུལ་ཞུས་འདུག དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ཐུགས་དགྱེས་ཚོར་ཆེན་པོའི་ངང་སློབ་ཕྲུག་ཚོ་དང་ལྷན་བགྲོ་གླེང་མཛད་ཡོད།
མཐར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ཞི་བདེ་ཞེས་པའི་ཚིག་འབྲུ་དེ་ང་ཚོའི་མཐར་ཐུག་གི་དམིགས་ཡུལ་ཡིན། ཞི་བདེ་ཞེས་པ་ནང་སེམས་རྒྱུད་ནས་འབྱུང་དགོས་པ་ཞིག་ཡིན། གལ་སྲིད་འཛམ་གླིང་འདི་བཞིན་ཞི་བདེ་ལྡན་པ་ཞིག་བྱུང་ཐུབ་ཚེ། ང་ཚོ་ཚང་མར་ཁེ་ཕན་ཡོད། ང་ཚོ་ཚང་མས་དྲང་པོ་དྲང་བཞག་དང་། ཕྱི་གསལ་ནང་གསལ་བྱས་པ་ཡིན་ན་ཡིད་ཆེས་སྐྱེ་ཐུབ། ཡིད་ཆེས་ནི་གྲོགས་པོའི་འབྲེལ་ལམ་བརྟན་དུ་གཏོང་བའི་རྩ་བ་དེ་ཆགས་ཡོད། ཅེས་བཀའ་སློབ་སྩལ་ཡོད་པ་བཅས། །
