ཕྱི་ལོ་ ༢༠༡༥ ཟླ་ ༩ ཚེས་ ༡༨ རེས་གཟའ་པ་སངས།

༄༅། །ཕྱི་ལོ་ ༢༠༡༥ ཟླ་ ༩ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབྱིན་ཡུལ་ཀེམ་བྷི་རི་ཇིམ་མེག་དཱ་ལེན་མཐོ་སློབ Magdalen College ནང་ཕྱི་ཚེས་ ༡༦ ནས་དབུ་འཛུགས་ཀྱིས་ཕྱི་ཚེས་ ༡༧ བཅས་ཉིན་གཉིས་རིང་ Inspire Dialogue Foundation ཐེབས་རྩས་གོ་སྒྲིག་གནང་ཐོག་རྣམ་དཔྱོད་གོང་སྤེལ་དང་། མི་གཤིས་འགྱུར་བ། ཞེས་པའི་བརྗོད་གཞིའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་དང་། བགྲོ་གླེང་མཛད་པ་བཞིན། གོང་ཚེས་ཉིན་ཏེ་ཉིན་གཉིས་པའི་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་Cripps Court ཚོགས་ཁང་ནང་ཆིབས་སྒྱུར་བསྐྱངས་ཐོག་ A Vision for Education ཤེས་ཡོན་གྱི་འཆར་སྣང་། ཞེས་པའི་བརྗོད་གཞིའི་ཐོག་བགྲོ་གླེང་དབུ་འཛུགས་མཛད་ཡོད། བགྲོ་གླེང་ཉིན་གཉིས་པ་གཙོ་སྐྱོང་གནང་མཁན་ཨིཌ་ཀེས་ལེར་ Ed Kessler ལགས་ཡིན། ཐོག་མར་རོ་ཝན་ཝི་ལམ Lord Rowan Williams མཆོག་གིས་ཤེས་ཡོན་ཐོག་ཁོང་རང་ཉིད་ཀྱི་གཟིགས་ཚུལ་གང་ཡིན་དང་། ཤེས་ཡོན་གྱི་གལ་ཆེའི་རང་བཞིན་བཅས་ཀྱི་སྐོར་བཀའ་སློབ་སྩལ།

དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། བོད་ཀྱི་ནང་པ་སངས་རྒྱས་པའི་ཆོས་དེ་བཞིན་འབྱུང་ཁུངས་རྒྱ་གར་ནས་བྱུང་བ་ཞིག་ཡིན། དེ་ཡང་རྒྱ་གར་བའི་དགེ་རྒན་ཁག་གཅིག་གི་བོད་པའི་སློབ་མ་ཉུང་ཤས་ཤིག་ལ་ཆོས་འཆད་པ་དང། སློབ་མ་ཚོས་ཀྱང་ཆོས་ལ་སློབ་སྦྱོང་བྱས། མ་ཤེས་པ་དང་། དོགས་གཞི་ཡོད་པ་རྣམས་ཕན་ཚུན་བགྲོ་གླེང་གནང་སྟེ་གཏན་འབེབས་ཐག་གཅོད་གནང་བའི་ཐོག་ནས་སློབ་གཉེར་གནང་གི་ཡོད། དེ་ནི་དངོས་ཡོད་གནས་ཚུལ་ཐོག་རིག་ལམ་སློབ་སྦྱོང་གི་བཟོ་ལྟ་ཡག་པོ་ཞིག་བཟོས་ཡོད། སློབ་གཉེར་ཡག་པོ་ཞིག་ཡོང་བར་ཐོག་མར་དགེ་རྒན་གྱི་དྲུང་ནས་ཐོས་པ་བསགས། དེ་རྗེས་རང་ཉིད་ལ་དགེ་རྒན་གྱི་དྲུང་ནས་གང་ཐོས་པའི་ཐོས་པ་དེ་གཞི་ལ་བཞག་ཐོག་དེ་དང་འབྲེལ་བའི་དཔེ་དེབ་བཀླག་རྒྱུ་དང་། ནང་པ་དང་ཕྱི་པ་གཉིས་ཀྱི་བལྟ་གྲུབ་ཤེས་པའི་ཐོག་ནས་དེ་གཉིས་མི་མཐུན་པའི་རྒྱུ་རྩ་གང་ཡིན་པ་སོགས་འཚོལ་ཞིབ་དང་བསམ་བློ་བཏང་སྟེ་རྒྱུ་མཚན་གྱི་ལམ་ནས་ངེས་ཤེས་ཐོབ་པ་ཞིག་བྱ་དགོས་པ་ཡིན། རིམ་པ་གསུམ་པ་དེ་ལྟར་རང་ཉིད་ཀྱི་མྱོང་བ་རྣམས་ཕྱོགས་བསྡོམས་ཀྱིས་དངོས་སུ་ལག་བསྟར་ཐུབ་པ་ཞིག་བྱ་དགོས་པ་ཡིན།

འགྲོ་བ་མིའི་བཟང་སྤྱོད་གོང་སྤེལ་གཏོང་རྒྱུ་ནི་ཤེས་ཡོན་གྱི་བསྟི་གནས་ཁང་ཁག་གི་འགན་ཁུར་གནང་དགོས་སྐོར་གྱི་བཀའ་སློབ་ཕེབས་སྐབས་རོ་ཝན་ཝི་ལམ་མཆོག་གིས་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་དེར་ངོས་རང་ངོས་ནས་མོས་མཐུན་ཞུ་བཞིན་ཡོད། དེ་བཞིན་ཆོས་ལུགས་སྡེ་ཁག་ཚོས་ཀྱང་འགྲོ་བ་མིའི་བདེ་དོན་ལ་སྨན་པའི་བཀའ་མོལ་གནང་དགོས་པ་ཡིན། དེ་མཚུངས་ང་ཚོ་ཚང་མ་གཅིག་གི་གཅིག་ལ་རེ་དགོས་པ་དང་རྟེན་དགོས་པའི་རྟེན་འབྲེལ་གྱི་རང་བཞིན་ཞིག་ཏུ་གྱུར་ཡོད་པ་མང་ཚོགས་ལ་གོ་རྟོགས་བརྒྱུད་སྤེལ་བྱ་དགོས་པ་ཡིན། ཞེས་གསུངས།

དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། དེང་སྐབས་མི་མང་པོ་ཞིག་གིས་ཆབ་སྲིད་ནི་བཙོག་པ་ཞིག་རེད་ཅེས་བརྗོད་ཀྱི་ཡོད། སྤྱིར་ཆབ་སྲིད་ནི་བཙོག་པ་ཞིག་མིན། ཡིན་ནའང་ཆབ་སྲིད་ནང་ལས་ཀ་བྱེད་མཁན་གྱི་གང་ཟག་མི་དེའི་བསམ་བློའི་ཀུན་སློང་ལ་བརྟེན་ནས་ཆབ་སྲིད་བཙོག་པ་རེད་དང་མ་རེད་བརྟག་དགོས་པ་ཡིན། གནའ་བོ་རྒྱ་གར་བས་བཤད་པའི་འཚེ་བ་མེད་པའི་རིག་གཞུང་ནང་ཀུན་ཁྱབ་སེམས་ཁུར་ཡང་ཚུད་ཡོད། ཅེས་སོགས་ཀྱི་བཀའ་སློབ་ལམ་སྟོན་དང་འབྲེལ་བགྲོ་གླེང་ལྷུག་པོར་མཛད་ཡོད།

ཉིན་གཉིས་པའི་བགྲོ་གླེང་གི་ལེ་ཚན་གཉིས་པར་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་༸གོང་ས་༸སྐྱབས་མགོན་ཆེན་པོ་མཆོག་གི་ཀུན་ཕན་བདེ་རྩའི་དྲུང་ཆེ་ར་ཇིབ་མེ་རོ་ཊ་ Rajiv Mehrotra ལགས་ཀྱིས་ལས་རིམ་གཙོ་སྐྱོང་ཞུས་ཐོག་བྱམས་བརྩེ་དང་འགྲོ་བ་མིའི་བཟང་སྤྱོད་གོང་སྤེལ་གཏོང་ཐབས། སེམས་ཚོར་དང་ཀླད་པའི་རྣམ་གཞག་གི་འགྲོ་སྟངས་སོགས་ཀྱི་སྐོར་བཀའ་སློབ་དང་བགྲོ་གླེང་རྒྱས་པར་མཛད།

བགྲོ་གླེང་གི་མཇུག་དུ་ཉིན་དང་པོའི་ལས་རིམ་གཙོ་སྐྱོང་གནང་མཁན་སྐུ་ཞབས་ཀེམ་རན་ཊེ་ལོར་ལགས་ཀྱི་ཐེངས་འདིའི་བགྲོ་གླེང་གོ་སྒྲིག་གནང་མཁན་དང་། དེ་བཞིན་བགྲོ་གླེང་གནང་མཁན་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་རོ་ཝན་ཝི་ལམ་དང་ཧི་ལི་རི་ཝི་ལམ་མཆོག་བཅས་ལ་ཐུགས་རྗེ་ཆེ་ཞུས་པ་དང་སྦྲགས་སྐུ་པར་ཡང་ལྷན་དུ་བསྒྲོན།

༸གོང་ས་༸སྐྱབས་མགོན་ཆེན་པོ་མཆོག་ཚོགས་ཁང་ནས་ཆིབས་ཞལ་མ་བསྒྱུར་གོང་ཁུལ་དེར་༸གོང་ས་མཆོག་ལ་མཇལ་ཞུ་བ་དད་ལྡན་བོད་མི་རྣམས་ལ་བཀའ་སློབ་སྩལ་དོན། ང་ཚོ་ཕ་མེས་དུས་ནས་ངོམས་སུ་ཆོག་པ་ཞིག་ཡོད་པའི་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག་ལ་དོ་སྣང་བྱས་ཏེ། དེ་དག་མི་ཉམས་རྒྱུན་འཛིན་བྱེད་དགོས་པ་ཡིན། དེ་རིང་རྣམ་པ་ཚོས་ངོས་ལ་དགའ་སེམས་ཆེན་པོའི་ངང་ཕེབས་བསུའི་སྣེ་ལེན་གཟབ་རྒྱས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་སྩལ་ཡོད་པ་བཅས། །