༢༠༡༥ ཟླ་ ༩ ཚེས་ ༡༧ རེས་གཟའ་ཕུར་བུ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༩ ཚེས་ ༡༧ ཉིན་བོད་ནས་གནས་ཚུལ་འབྱོར་གསལ་ལ། ཟླ་བ་འདིའི་ཕྱི་ཚེས་ ༡༠ ཉིན་གྱི་ཕྱེད་ཡོལ་བོད་ཨ་མདོ་རྔ་པ་རྫོང་གི་ཁྲོམ་གཞུང་དུ་ཕོ་གསར་གཉིས་ཀྱིས་རྒྱ་གཞུང་ལ་ངོ་རྒོལ་སྐད་འབོད་གནང་སྐབས་མི་མང་གིས་དེར་མཐུད་དེ་སྐད་འབོད་གནང་འདུག་ལ། སྐབས་དེར་ཉེན་རྟོག་པས་མི་མང་ཁྲོད་ནས་རང་ལོ་ ༦༤ ཡས་མས་ཡིན་པའི་ཨ་ཡེ་གུས་མོ་འཛིན་བཟུང་བཙན་ཁྲིད་བྱས་ཡོད་པ་དང་། དེང་སྐབས་ཀྱི་གནས་སྟངས་གསལ་པོ་ཤེས་རྟོགས་མ་བྱུང་ཡང་།
ཁོ་མོ་རྔ་པ་རྫོང་རོང་མཁར་སར་ཡུལ་ཚོའི་རུ་ཆེན་གཉིས་པའི་ནམ་མཁའ་སྐྱབས་ཚང་ནས་ཡིན་ཞིང་། བཟའ་ཟླ་སོགས་ནང་མི་དགུ་ཡོད་ལ། ཁོ་མོ་རྒྱུན་དུ་རྔ་པ་རྫོང་མཁར་གྱི་གཞུང་ལམ་གཙང་བཟོའི་ལས་ཀར་ཉིན་གླ་བྱས་ཏེ་འགྲོ་མུས་ཡིན་འདུག ཉིན་དེའི་ངོ་རྒོལ་གནང་མཁན་གྱི་ཕོ་གསར་གཉིས་དང་སྐབས་ཐོག་དེར་འཛིན་བཟུང་བྱས་པ་ཁག་གི་མིང་དང་ཕ་ཡུལ་སོགས་ཤེས་རྟོགས་མ་བྱུང་།
ཡང་ཟླ་བ་འདིའི་ཕྱི་ཚེས་ ༡༡ ཉིན་རྔ་པ་ཀིརྟི་དགོན་པའི་བློ་རིག་འཛིན་གྲྭའི་དགེ་འདུན་པ་ལྔ་ལྷག་མཉམ་དུ་དབྱར་གྱི་ས་ཚིགས་བརྒལ་བར་འགྲོ་སྐབས་ཉེན་རྟོག་པས་དོན་མེད་དུ་འཛིན་བཟུང་བཙན་ཁྲིད་ཀྱིས་བཀག་ཉར་བྱས་ཡོད་པ་དང་། ཉིན་གཉིས་གསུམ་རེའི་རྗེས་སུ་དགེ་འདུན་པ་གཞན་རྣམས་གློད་ཡོད་ཀྱང་། རང་ལོ་ ༢༢ ཡིན་པ་དགེ་འདུན་པ་བློ་བཟང་བསོད་ནམས་ལགས་ད་ལྟ་ཡང་བཀག་ཉར་བྱས་ཡོད་འདུག་ལ། ཅིའི་ཕྱིར་བཀག་ཉར་བྱས་པ་སོགས་ཀྱི་ཞིབ་ཕྲའི་གནས་ཚུལ་ཤེས་རྟོགས་མ་བྱུང་། ཁོང་ནི་རྔ་པ་རྫོང་རོང་མཁར་སར་ཡུལ་ཚོའི་རུ་ཆེན་གཉིས་པའི་ཕ་སྐལ་བཟང་དང་། མ་ཚེ་རིང་སྒྲོལ་མ་གཉིས་ཀྱི་བུ་ཡིན་ཞིང་། མིང་སྲིང་བཞིའི་ནང་ནས་ཆེ་ཤོས་ཡིན་འདུག་ལ། ཆུང་དུས་སྐབས་ནས་རྔ་པ་ཀིརྟི་དགོན་པར་ཆོས་ཞུགས་གནང་འདུག
དེ་མིན་ཕྱི་ཟླ་ ༨ ཚེས་ ༢༠ ཉིན་གྱི་བོད་ནང་གི་སྔ་དྲོ་ཆུ་ཚོད་ ༨ དང་ཕྱེད་ཀ་ཙམ་ལ་རང་ལོ་ ༢༩ ཡིན་པའི་རྡོ་རྗེ་སྒྲོལ་མ་ལགས་ཀྱིས་རྔ་པ་རྫོང་མཁར་གྱི་ཁྲོམ་གཞུང་དུ་ངོ་རྒོལ་སྐད་འབོད་བྱེད་བཞིན་ཞི་བའི་གོམ་བགྲོད་གནང་ཡོད་ཀྱང་དེ་མ་ཐག་ཉེན་རྟོག་པ་བཅུ་གྲངས་ཤིག་བསླེབས་ནས་འཛིན་བཟུང་བཙན་ཁྲིད་བྱས་འདུག་ལ། དེའི་རྗེས་སུ་ས་གནས་གང་དུ་བཀག་ཉར་བྱས་ཡོད་མེད་སོགས་ཀྱི་ཞིབ་ཕྲའི་གནས་ཚུལ་གང་ཡང་འབྲེལ་ཡོད་སུས་ཀྱང་ཤེས་རྟོགས་ཐུབ་ཀྱིན་མེད་འདུག
ཁོ་མོ་ཨ་མདོ་རྔ་པའི་རྨེའུ་རུ་མ་ཡུལ་ཚོའི་རུ་ཆེན་གཉིས་པའི་བསྟན་དར་ཚང་གི་ཕ་རྡོ་རྗེ་རབ་བརྟན་དང་། མ་རྟ་མགྲིན་འཚོ་གཉིས་ལ་བུ་བུ་མོ་བཞི་ཡོད་པའི་ནང་ནས་གཉིས་པ་དེ་ཡིན་ཞིང་། ཕྲུ་གུ་གསུམ་གྱི་ཨ་མ་ཡིན་འདུག གཞན་དེང་སྐབས་རྔ་པ་རྫོང་མཁར་གྱི་གཞུང་ལམ་ཁག་དང་ལམ་གྱི་བཞི་མདོ་སོགས་ལ་ཉེན་རྟོག་པས་རྒྱུན་དུ་ལྟ་སྲུང་ནན་མོ་བྱས་ཡོད་པ་དང་། གཞུང་གི་ལས་ཁུངས་ཁག་ལས་གཞན་པའི་དྲ་ལམ་ཡོངས་རྫོགས་མུ་མཐུད་བཀག་སྡོམ་བྱས་ཡོད་འདུག་པ་བཅས། །
