༢༠༡༥ ཟླ་ ༩ ཚེས་ ༨ རེས་གཟའ་མིག་དམར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༩ ཚེས་ ༧ ཉིན་གྱི་བོད་ནང་གི་ཕྱི་དྲོའི་དུས་ཚོད་ ༣ ཙམ་ལ་རྔ་པ་ཀིརྟི་དགོན་གྱི་གྲྭ་བློ་བཟང་སྐལ་བཟང་ལགས། རང་ལོ་ ༡༩ ཡིན་པ་ཁོང་གིས་རྔ་པ་རྫོང་མཁར་གྱི་སྲང་ལམ་ནས་”བོད་ཁ་བ་ཅན་ལ་རང་དབང་དགོས། རྒྱལ་དབང་བསྟན་འཛིན་རྒྱ་མཚོ་ཁྲི་ལོ་བརྟན་པར་ཤོག” བརྗོད་བཞིན་རྒྱ་གཞུང་ལ་ངོ་རྒོལ་སྐད་འབོད་གནང་སྟེ་གོམ་བགྲོད་བྱས་ཡོད། འོན་ཀྱང་ས་གནས་དེར་སྔ་ས་ནས་གྲ་སྒྲིག་བྱས་ནས་ཡོད་པའི་ཉེན་རྟོག་པ་རྣམས་ཀྱིས་ཁོང་བཙན་ཁྲིད་བྱས་རྗེས་ཁོང་གི་སྐོར་གནས་ཚུལ་ཤེས་རྟོགས་ཐུབ་མེད།
ཁོང་ནི་རྔ་པ་རྫོང་རྨེའུ་རུ་མ་རུ་ཆེན་གཉིས་པའི་ཕ་ཚེ་རིང་བརྟན་ཁོ་དང་། མ་ལྷ་སྐྱིད་གཉིས་ལ་བུ་བུ་མོ་བཞི་ཡོད་པའི་གཉིས་པ་དེ་ཡིན་འདུག་ལ། ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་གནང་སྟེ། ཕྱི་ལོ་ ༢༠༡༤ ལོར་སྔོན་འགྲོའི་འཛིན་གྲྭ་མཐར་ཕྱིན་ནས་དེང་སྐབས་མཚན་ཉིད་ཀྱི་འཛིན་གྲྭ་ཁ་དོག་དཀར་དམར་ཡིན་ཞིང་། ལོ་སྔོན་མར་ཁོང་གི་ཤག་རོགས་དང་མ་སྤུན་ཡིན་པའི་བློ་བཟང་བསྟན་པས་རྔ་པའི་སྲང་ལམ་ནས་ངོ་རྒོལ་སྐད་འབོད་གནང་སྟེ་ལོ་ ༢ ཀྱི་བཙོན་འཇུག་ཁྲིམས་ཐག་བཅད་ནས་དེང་སྐབས་བཙོན་ཁང་དུ་ཡོད་མུས་དང་། ཕྱི་ལོ་ ༢༠༠༨ ལོར་ཁོང་གི་ཞང་པོ་ཚེ་བདག་དང་ཆོས་འཕེལ་གཉིས་ལ་ལོ་ ༦ དང་ ༤ རིང་བཙོན་འཇུག་བྱས་མྱོང་བ་སོགས་ཚང་མ་ཁོང་རང་གིས་དངོས་སུ་མཐོང་བའི་གནས་ཚུལ་ཡིན་འདུག
དེ་བཞིན་གནས་ཚུལ་ཡོང་ཁུངས་ནས་བརྗོད་པ་ལྟར་ན། སྐབས་ཐོག་དེར་རྔ་པའི་སྲང་ལམ་ནས་མི་སྐྱ་ཞིག་ཀྱང་ཉེན་རྟོག་པས་འཛིན་བཟུང་བྱས་པའི་གནས་ཚུལ་འདུག་ཀྱང་མིང་དང་ཕ་ཡུལ་སོགས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་བ་བཅས། །
བརྙན་འཕྲིན་གཟིགས་ཆེད་འདིར་གནོན།
