༢༠༡༠ ཕྱི་ཟླ་ ༤ ཚེས་ ༡༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༠ ཟླ་ ༤ ཚེས་ ༡༨ ཉིན་རྒྱབ་ཆུ་ཚོད་ ༣།༣༠ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཧི་མ་ཅལ་མངའ་སྡེའི་དབྱུག་རྩེད་པོ་ལོའི་མཐུན་ཚོགས་ཨེཆ་པི་སི་ཨེ་ (HPCA) ནས་ཇིི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། དེ་ཉིན་ Kings XI Punjab དང་ Chennai Super Kings གཉིས་དབར་གྱི་རྩེད་འགྲན་དེའི་དམིགས་བསལ་སྐུ་མགྲོན་དུ་ཆིབས་སྒྱུར་བསྐྱངས་ཡོད། སྐབས་དེར་ཧི་མ་ཅལ་མངའ་སྡེའི་བློན་ཆེན་མཆོག་ཀྱང་སྐུ་མགྲོན་དུ་ཕེབས་ཡོད། མགོན་པོོ་གང་ཉིད་མཆོག་གིས་རྩེད་འགྲན་འགོ་མ་འཛུགས་གོང་རུ་ཁག་གཉིས་ཀྱིི་རྩེད་འགྲན་པ་རྣམས་ལ་ཐང་དཀྱིལ་དུ་མཇལ་ཁ་དང་འཚམས་འདྲིའི་མཇལ་དར་སྩལ་ཡོད།

སྐབས་དེར་རྩེད་འགྲན་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་གི་༸ཞབས་ལ་མགོ་བོ་བཏུགས་ཏེ་གུས་འདུད་ཆེན་པོ་ཞུས་པ་དང་སྦྲགས་རྩེད་འགྲན་པ་ཚོ་དང་ལྷན་དུ་སྐུ་པར་ཡང་བསྒྲོན་ཡོད། སྐབས་དེར་བོད་གཞུང་ཟློས་གར་ཚོགས་པས་བོད་ཀྱི་ཐུན་མིན་གཡག་གི་འཁྲབ་སྟོན་གཟིགས་འབུལ་ཞུས་ཡོད། རྡ་སར་ཡོད་པའི་ཧི་མ་ཅལ་དབྱུག་རྩེད་པོ་ལོའི་རྩེད་ཐང་འདི་ནི་རྒྱ་གར་ནང་གི་རྩེད་ཐང་གསར་ཤོས་དང་། རྒྱ་མཚོའི་ངོས་ནས་མཐོ་ཚད་ཕི་ཀྲི་ ༤༠༠༠ ཐོག་མཐའ་འཁོར་དུ་རྡོ་ལ་རྡར་ (Dauladhar) རི་རྒྱུད་ཀྱི་རྒྱན་པའི་འཛམ་གླིང་ནང་རྩེད་ཐང་སྙིང་རྗེ་ཤོས་ཀྱི་གྲས་ཤིག་ཀྱང་ཆགས་ཡོད། རྡ་སའི་རྩེད་ཐང་འདིར་ཆེད་སྙན་གྲགས་ཆེ་བའི་ཨའི་པི་ཨེལ་དབྱུག་རྩེད་པོ་ལོའི་ (IPL Cricket) རྩེད་འགྲན་གནང་བ་ཐོག་མ་དེ་ཆགས་ཡོད།།