༢༠༡༠ ཕྱི་ཟླ་ ༤ ཚེས་ ༡༧ རེས་གཟའ་སྤེན་པ།
༄༅། །ལྡི་ལིར་རྟེན་གཞི་བྱས་པའི་ཨིན་ལྷར་གྷན་དྷིའི་གཙུག་ལག་སློབ་ཁང་ནང་ཡེ་ཤུའི་ཨ་མ་དམ་པ་ཊེ་རེ་སའི་དྲན་རྟེན་གྱི་ལོ་འཁོར་ཚོགས་ཆེན་ཐེངས་གསུམ་པའི་ཚོགས་མགོན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ཨ་མ་དམ་པ་ཊེ་རེ་སས་མི་མང་ཉམ་ཐག་ཚོར་གཟིགས་སྐྱོང་གནང་རྒྱུའི་ཆོད་སེམས་དང་སྙིང་སྟོབས། བྱམས་བརྩེའི་ཀུན་སློང་དེ་དུས་ད་ལྟའང་རྒྱུན་གནས་ཀྱིས་འགྲོ་བ་མིའི་སྤྱི་ཚོགས་ལ་ཞབས་འདེགས་སྒྲུབ་བཞིན་ཡོད་ཅེས་བཀའ་སྩལ་བ་དང་སྦྲགས་མགོན་པོ་གང་ཉིད་མཆོག་རྒྱ་གར་གྱི་གྲོང་ཁྱེར་ཀ་ལི་ཀ་ཏར་༸ཞབས་སོར་འཁོད་སྐབས་ཨ་མ་དམ་པ་ཊེ་རེ་ས་མཆོག་ས་གནས་དེར་སྐུ་འཚོ་བཞུགས་མེད་ནའང་དམ་པ་དེ་ཉིད་ཀྱིས་མི་མང་ཉམ་ཐག་ཚོར་གཟིགས་སྐྱོང་གནང་བས་ཆོད་སེམས་དང་སྙིང་སྟོབས། བྱམས་བརྩེའི་ཀུན་སློང་དེ་དུས་ད་ལྟའང་ས་གནས་དེར་གསོན་པོར་གནས་ཡོད་སྐོར་ཐུགས་ལ་དྲན་གསོ་མཛད་ཡོད། ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཉིན་རེའི་འཚོ་བའི་ནང་བྱམས་བརྩེ་དེ་དགོས་གལ་ཇི་ཙམ་ཡིན་སྐོར་བཀའ་སློབ་སྩལ་དོན། ངོས་ཀྱིས་མང་ཚོགས་ལ་ཨ་མ་དམ་པ་ཊེ་རེ་ས་མཆོག་ནི་བྱམས་སེམས་ཅན་གྱི་དཔེ་མཚོན་ཞིག་ཡིན་པ་ཡང་ཡང་བརྗོད་ཀྱི་ཡོད།
བྱམས་བརྩེའི་བསམ་བློ་དེས་བློ་སྟོབས་སྐྱེས་བ་མ་ཟད། རང་ཉིད་ལ་གདེང་སྤོབས་བསྐྲུན་ཐུབ། ཀུན་སློང་དེ་དག་གིས་འགྲོ་བ་མི་རྣམས་ལ་ཞབས་འདེགས་ནུས་པ་ལྡན་པ་ཞིག་སྒྲུབ་ཐུབ་ཅེས་བཀའ་སློབ་སྩལ། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ཡུལ་མི་རྣམས་མཚམས་རེ་སོས་དལ་བྱེད་ཀྱི་ཡོད་པ་དེ་དོར་ནས་མདོར་ན་རྒྱ་མི་ལྟར་དཀའ་ལས་རྒྱག་དགོས་པ་དང་། རྒྱ་མི་ཚོ་ས་གནས་གང་དུ་གནས་ཀྱང་རྒྱ་མིའི་གྲོང་ཁྱེར་ཞེས་པ་དེ་འདྲ་འཛུགས་སྐྲུན་བྱེད་བཞིན་ཡོད་པ་དང་། འོན་ཀྱང་འཛམ་གླིང་ས་ཕྱོགས་གཞན་གང་དུའང་རྒྱ་གར་གྱི་གྲོང་ཁྱེར་ཞེས་པ་དེ་འདྲ་ད་ལྟའི་ཆར་མེད་སྐོར་ཡང་བཀའ་སྩལ། དེ་བཞིན་མགོན་པོ་གང་ཉིད་མཆོག་གིས་རྒྱ་ནག་གི་དཔལ་འབྱོར་ཤུགས་ཆེ་རུ་འགྲོ་བཞིན་ཡོད་ནའང་། མང་གཙོ་ཚད་ལྡན་ཡོང་རྒྱུའི་ཆ་རྐྱེན་གཙོ་བོ་དེ་ནི་གསར་འགྱུར་རང་དབང་དང་། ཕྱི་གསལ་ནང་གསལ། མང་གཙོའི་ཐོབ་ཐང་སོགས་འདང་གི་མེད་སྐོར་བཀའ་སྩལ་དོན། དངུལ་དེ་གལ་ཆེ་ཡིན་པ་རྩོད་མེད་རེད། འོན་ཀྱང་མང་གཙོ་དང་། གཞན་གྱི་བསམ་ཚུལ་ལ་གུས་བརྩི་ཞུ་རྒྱུས་མཚོན་རིན་ཐང་གཞན་ཁག་གཅིག་ཡོད་པ་དེ་དག་ནི་མང་གཙོ་ལམ་ལྷོང་ལྡན་པ་ཞིག་ཡོང་བར་གཞི་རྩ་ལྟ་བུ་ཆགས་ཡོད། གལ་ཏེ་འཇིགས་སྣང་དང་དོགས་ཟོན་བྱེད་དགོས་པའི་གནས་སྟངས་ཤིག་ཡོད་ཚེ་མ་འགྲིག་པ་ཞིག་ཡོད་པའི་རྟགས་རེད། གནས་སྟངས་དེ་འདྲའི་འོག་ཕྱི་གསལ་ནང་གསལ་དང་དྲང་བདེན་མེད་པར་བརྟེན་དམ་བསྒྲགས་བྱེད་དགོས་པ་ཆགས་ཀྱི་ཡོད། ལེགས་བྱང་དང་ཆོས་ཕྱོགས་ཀྱི་ཆ་ནས་རྒྱ་གར་ཕྱུག་པོ་ཡིན་ཞེས་བཀའ་སྩལ།
