༢༠༡༥ ཟླ་ ༩ ཚེས་ ༡ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༩ ཚེས་ ༡ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་དྲན་རྟེན་ཚོགས་ཁང་ནང་རྒྱ་ནག་གཞུང་གིས་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་ ༥༠ འཁོར་བའི་དུས་སྟོན་དེ་རིང་ནས་བཟུང་འཚོགས་བཞིན་ཡོད་པ་དང་སྟབས་བསྟུན། བར་ལམ་རྒྱ་ནག་གཞུང་གིས་བོད་ཐོག་སྤེལ་བའི་ཡིག་ཆ་དཀར་པོའི་ཐོག་ལན་འདེབས་གསར་འགོད་གསལ་བསྒྲགས་སྤེལ་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཡོལ་ཙམ་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་བཅས་ཆེད་ཕེབས་གནང་སྟེ་ཕྱི་ནང་གི་གསར་འགོད་པ་ ༣༠ བརྒལ་བ་ལྷན་འཛོམས་ཀྱིས་ཐོག་མར། དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ངོ་སྤྲོད་གསུང་བཤད་གནང་གྲུབ་བསྟུན་དཔལ་ལྡན་སྲིད་སྐྱོང་མཆོག་གིས་གསར་འགོད་གསལ་བསྒྲགས་སྤེལ་ཡོད་པའི་ནང་འཁོད་དོན།
ལོ་རྒྱུས་ཐོག་བོད་རྒྱ་ནག་གི་ཆ་ཤས་མིན། འོན་ཀྱང་དབུ་མའི་ལམ་ནི་བོད་རྒྱའི་གནད་དོན་གསལ་བའི་ཐབས་ལམ་ཡག་ཤོས་དེ་རེད།
སྙིང་བསྡུས།
རྒྱ་དམར་གཞུང་གིས་བོད་སྐོར་སྤེལ་བའི་ཡིག་ཆ་དཀར་པོའི་ལན་འདེབས་ནང་བོད་ཀྱི་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཁྲིམས་མཐུན་ངོས་འཛིན་ནི་པེ་ཅིང་གིས་ངོས་འཛིན་དང་ཆོག་མཆན་སྤྲད་པ་ལ་བརྟེན་ནས་བྱུང་ཡོད་ཅེས་བཤད་པ་དེའི་ཐོག་ནས། མ་འོངས་པར་རྒྱ་དམར་གཞུང་གིས་༸གོང་ས་༸སྐྱབས་མགོན་ཆེན་པོའི་སྐུའི་ཡང་སྲིད་ངོས་འཛིན་བསྐོ་གཞག་བྱེད་རྒྱུའི་འཆར་གཞི་ཡོད་པ་གསལ་པོ་རེད། དེས་མ་ཚད་ཁོ་ཚོས་བོད་ཀྱི་ས་ཁམས་དང་བོད་མིའི་བསམ་བློའི་བདག་དབང་དང་བཅས་པ་རྒྱ་གཞུང་ལ་ཡོད་ལུགས་ཀྱང་གསལ་བཤད་བྱས་ཡོད།
དེ་ལྟར་རྒྱ་ནག་གཞུང་གི་ཧམ་རྩོད་དེ་དག་ལ་རྒྱལ་སྤྱིའི་ཐོག་ནས་ཚོར་སྣང་ལན་ཆ་དྲག་པོ་ཡོང་ངེས་ཡིན། དེ་ཡང་བོད་མི་ཙམ་མ་ཡིན་པར་གནའ་དུས་ནས་བཟུང་བོད་ཀྱི་ནང་ཆོས་དང་རིག་གཞུང་མཉམ་སྤྱོད་བྱེད་མཁན་གྱི་ནང་པ་ས་ཡ་མང་པོ་དང་། དེ་བཞིན་དེང་སྐབས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་དྲུང་ནས་གསུང་ཆོས་ཞུས་ཏེ་ཕན་ཐོགས་བྱུང་བའི་གང་ཉིད་ཀྱི་སློབ་མ་ཆེས་མང་པོ་འཛམ་གླིང་ས་ཕྱོགས་གང་སར་ཡོད་པ་མ་ཟད། རྒྱ་གར་དང་འཛམ་གླིང་གི་ཕྱོགས་གང་སར་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་གསུང་ཆོས་ཞུ་བར་ཡོང་མཁན་གྱི་རྒྱ་རིགས་ནང་པའི་གྲངས་འབོར་ཇེ་ཆེར་འཕར་བཞིན་ཡོད། དེ་ལྟའི་རྒྱ་ནག་གཞུང་གི་དཔུང་ཤེད་ཀྱི་སྲིད་བྱུས་དེས་ལྷོ་རྒྱ་ནག་རྒྱ་མཚོའི་ཐོག་བདག་དབང་ཧམ་རྩོད་བྱེད་པ་དང་འདྲ་བར་རྒྱལ་སྤྱིའི་ཐོག་ཁོང་ཁྲོ་སློང་ངེས་ཡིན།
ལན་འདེབས་འདིའི་ནང་སླར་ཡང་གནད་དོན་འདི་གསལ་བའི་ཐབས་ལམ་ཞིག་ཡོད་པའང་བསྟན་ཡོད། རྒྱ་ནག་གཞུང་གིས་ད་བར་དབུ་མའི་ལམ་གྱི་སྲིད་བྱུས་ཁས་ལེན་བྱས་མེད། འོན་ཀྱང་བོད་རང་བཙན་མི་རྩོད་པར་འཛིན་སྐྱོང་གཅིག་གི་འོག་ཏུ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་རྩོད་པའི་བོད་མིའི་བསམ་འཆར་འདི་ལ་བློ་གྲོས་ལྡན་པའི་རྒྱ་མི་རིགས་ཚོས་དཔྱད་ཞིབ་ཡག་པོ་བྱས་ཚེ། དེའི་ནང་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། མི་རིགས་ཀྱི་ངོ་བོར་བརྩི་འཇོག་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ལའང་མངའ་ཁོངས་གོང་བུ་གཅིག་གྱུར་གྱི་སྲུང་སྐྱོབ་བཅས་ཀྱི་ཐབས་ལམ་བསྟན་ཡོད་པ་མཐོང་ཐུབ། ད་ལྟ་རྒྱ་ནག་གཞུང་གི་བཙོན་འཇུག་འོག་ཡོད་པའི་ནོ་བྷེལ་ཞི་བདེའི་གཟེངས་རྟགས་བཞེས་མཁན་ལིའུ་ཞའོ་བྷོ་གཙོས་པའི་ཕྱི་ནང་གི་རྒྱ་རིགས་མཁས་པ་སྔར་ལས་མང་བ་ཞིག་གིས་ཞི་བའི་གྲོས་གཞི་དེར་རྒྱབ་སྐྱོར་བྱས་ཡོད། ཁོང་ཚོས་རྒྱ་ནག་གཞུང་ལ་”བོད་ཀྱི་གནད་དོན་ཐག་གཅོད་བྱེད་པར་བསམ་འཆར་དོན་ཚན་བཅུ་གཉིས་” ཞེས་པའི་རྒྱབ་སྐྱོར་ཡིག་ཆ་ཞིག་སྤེལ་ཡོད། རྒྱ་ནག་གཞུང་གིས་དབུ་མའི་ལམ་གཞིར་བཟུང་ནས་བོད་མིའི་མངོན་འདོད་སྒྲུབ་ཐབས་བྱས་ཚེ་ཁྱིམ་མཚེས་རྒྱ་དཀར་ནག་གཉིས་དབར་ཕན་ཚུན་འཐབ་བྱུས་ཐོག་ཡིད་ཆེས་བསྐྱར་གསོ་ཐུབ་པ་མ་ཟད། ཕྱོགས་གཉིས་ཀྱི་ས་མཚམས་སྒོ་དབྱེ་དང་། ཕྱོགས་གཉིས་ཀྱི་དམག་དཔུང་ཕན་ཚུན་དབར་གདོང་ཐུག་གི་གནས་ཚུལ་མི་ཡོང་བའི་ཁེ་ཕན་ཡོད། དེ་ལ་བརྟེན་ནས་ཧི་མ་ལ་ཡའི་ས་ཁུལ་གྱི་དཔལ་འབྱོར་དང་རིག་གཞུང་གོང་འཕེལ་སྐུལ་འདེད་ཡོང་རྒྱུ་མ་ཟད། ཨེ་ཤི་ཡའི་གླིང་ཆེན་ཡོངས་སུ་ཞི་བདེ་ཡུན་གནས་བསྐྲུན་ཐུབ།
དེ་ལྟ་བུའི་ཆབ་སྲིད་ཀྱི་ཁོར་ཡུག་ནང་བོད་དེ་སྔར་བཞིན་སླར་ཡང་ཧི་མ་ལ་ཡའི་ས་ཁུལ་གྱི་ནང་པ་རྣམས་ཀྱི་ནང་ཆོས་སློབ་གཉེར་བྱེད་ཡུལ་གྱི་ལྟེ་གནས་ཤིག་ཏུ་འགྱུར་རྒྱུ་དང་། དེས་ཧི་མ་ལ་ཡའི་ས་ཁུལ་གྱི་མི་རྣམས་ཀྱི་བསམ་པའི་དཔལ་ཡོན་ཆེས་གོང་མཐོར་གཏོང་བ་དང་། ཕན་ཚུན་དབར་དཔལ་འབྱོར་དང་རིག་གཞུང་བརྗེ་ལེན་བཅས་གང་ཅིར་ཕན་ཐོགས་ཡོང་རྒྱུ་རེད།
རྒྱ་ནག་གཞུང་གིས་རྩ་ཁྲིམས་གཞིར་བཟུང་བོད་ཀྱི་གནད་དོན་གསལ་ཐབས་བྱས་པ་ཡིན་ན། ཧོང་ཀོང་མི་མང་ཚོའི་སེམས་ནང་རྒྱ་ནག་གཞུང་གིས་ཁོང་ཚོར་ཡང་བརྩི་འཇོག་བྱེད་རྒྱུ་རེད་སྙམ་པའི་ཚོར་སྣང་བཟང་པོ་ཞིག་ཡོང་ངེས་ཡིན། བོད་མི་རྣམས་ལ་མིང་དོན་མཚུངས་པའི་རང་སྐྱོང་ཞིག་ཐོབ་ཚེ། ཧོང་ཀོང་མི་མང་ཁྲོད་རྒྱ་ནག་གཞུང་ལ་ཡིད་ཆེས་ཀྱི་བསམ་བློ་བསྐྱར་གསོ་ཐུབ་པ་མ་ཚད། དེ་ལ་བརྟེན་ནས་སྲིད་འཛིན་ཞིའི་ཅིན་ཕིང་གི་ཀྲུང་གོའི་ཕུགས་འདུན་ཞེས་པ་ཁ་ཡོད་ལག་ཡོད་ཡིན་པ་དངོས་ར་སྤྲོད་ཐུབ། རྒྱ་ནག་གཞུང་གིས་བོད་འདི་ཨེ་ཤི་ཡའི་གླིང་ཆེན་ཁྱོན་ཡོངས་ཀྱི་ཁོར་ཡུག་དང་ཡར་རྒྱས་གོང་འཕེལ་ཐད་གལ་གནད་ཧ་ཅང་ཆེན་པོ་ཞིག་ཡིན་པ་ལས། བཤུ་གཞོག་གཏོང་ཡུལ་ཞིག་མིན་པར་ངོས་འཛིན་བྱེད་འགོ་བཙུགས་པ་ཡིན་ན། ཧོང་ཀོང་མི་མང་གིས་མ་འོངས་པར་ཁོང་ཚོའི་གནས་སྟངས་བོད་དང་གཅིག་མཚུངས་ཆགས་རྒྱུའི་ཞེད་སྣང་བྱེད་པ་དེའང་གསལ་ཐུབ་རྒྱུ་རེད།
དེ་བཞིན་རྒྱ་ནག་གཞུང་གིས་བོད་མིའི་དྲང་བདེན་གྱི་མངོན་འདོད་རྣམས་ཁས་ལེན་བྱས་པ་ཡིན་ན་རྒྱལ་སྤྱིའི་ཐོག་རྒྱ་ནག་གི་ཆེ་མཐོང་ཆེ་རུ་འགྲོ་ངེས་རེད། ད་དུང་རྒྱ་ནག་གཞུང་གིས་ཨ་སྒོར་ས་ཡ་མང་པོ་འགྲོ་སོང་བཏང་སྟེ་རྒྱ་ནག་གི་ཤུགས་རྐྱེན་ཆེ་རུ་གཏོང་ཆེད་འཛམ་གླིང་ཁྱོན་ཡོངས་སུ་ཁུང་ཙིའི་སློབ་གཉེར་ཁང་འཛུགས་མ་དགོས་པའི་ཁེ་ཕན་ཡོད། དེས་ཀྱང་མ་ཚད། ༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་གསུང་ཆོས་ཞུས་ཏེ་ཕན་ཐོགས་བྱུང་བའི་སློབ་མ་ས་ཡ་མང་པོས་བོད་དུ་སློབ་གཉེར་ཆེད་དུ་ཡོང་རྒྱུ་དང་། ཆབས་ཅིག་རྒྱ་ནག་གཞུང་ལ་བག་ཆགས་བཟང་པོ་ཞིག་དང་། རྒྱལ་སྤྱིའི་ཐོག་ཆེ་མཐོང་དང་མིང་གྲགས་ཡོང་བའི་ཆ་རྐྱེན་བསྐྲུན་ཐུབ་རྒྱུ་རེད། དེས་ན་རྒྱ་ནག་གཞུང་གིས་དྲག་ཤུགས་དང་དཔལ་འབྱོར་གྱི་སྟོབས་ཤུགས་ངོམས་པ་ལས་བོད་ཀྱི་གནད་དོན་དྲང་བདེན་གྱི་ལམ་ནས་གསལ་ཐབས་བྱས་ན། རྒྱ་ནག་རང་ཉིད་ཀྱི་དགོས་འདུན་ལྟར་རྒྱལ་སྤྱིའི་ཐོག་བརྩི་འཇོག་ཐོབ་རྒྱུ་རེད། ཆ་རྐྱེན་འདིའི་འོག་རྒྱ་ནག་འཛམ་གླིང་ནང་དུ་སྣེ་ཁྲིད་རྒྱལ་ཁབ་ཀྱི་ངོ་བོའི་ཐོག་ནས་རྒྱང་སྐྱོད་ཀྱི་གོམ་སྟབས་གསར་པ་ཞིག་སྤོ་ཐུབ་རྒྱུ་རེད། །
