༢༠༡༥ ཟླ་ ༨ ཚེས་ ༡༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༨ ཚེས་ ༡༡ ཉིན་ཨ་རིའི་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་བྷེན་ཁར་ཌིན་ Ben Cardin ལགས་དང་། སྤྱི་མཐུན་ཚོགས་པའི་འཐུས་མིའཐུས་མི་ཇོན་མེཀ་ཁེན་ John McCain ལགས་གཉིས་ཀྱིས་དབུས་ཨ་རིའི་གྲོས་ཚོགས་འཐུས་མི་བཅུས་སྲིད་འཛིན་ཨོ་བྷ་མ་མཆོག་ལ་རིང་མིན་ཕྱི་ཟླ་ ༩ ཟླ་མཇུག་ཏུ་ཞི་ཅིན་ཕིན་ཨ་རིར་གཞུང་འབྲེལ་འཚམས་གཟིགས་སྐབས་འགྲོ་བ་མིའི་ཐོབ་ཐང་གི་གནད་དོན་ཐོག་དོན་སྙིང་ལྡན་པའི་གླེང་སློང་གནང་དགོས་པའི་འབོད་སྐུལ་གྱི་ཞུ་ཡིག་ཕུལ་འདུག
དེ་ཡང་ཞུ་ཡིག་ནང་གཙོ་བོ་དབུ་ཁྲིད་རྣམ་གཉིས་མཇལ་འཕྲད་སྐབས་ཤར་དང་ལྷོ་རྒྱ་ནག་རྒྱ་མཚོའི་གནད་དོན་དང༌། དཔལ་འབྱོར། ཁོར་ཡུག དེ་བཞིན་དྲ་རྒྱའི་བདེ་འཇགས་ལ་གནོད་སྐྱོན་ལ་སོགས་པའི་ཕྱོགས་གཉིས་ཀྱི་གནད་དོན་གལ་ཆེ་ཁག་གི་ཐོག་ལ་གླེང་སློང་ཡོང་གི་རེད་ལ། གནད་དོན་དེ་ཚོ་དང་ལྷན་ངེས་པར་དུ་གླེང་དགོས་པ་གཅིག་ནི་འགྲོ་བ་མིའི་ཐོབ་ཐང་གི་གནད་དོན་ཡིན། དེར་བརྟེན་དབུ་ཁྲིད་རྣམ་གཉིས་དབར་འགྲོ་བ་མིའི་ཐོབ་ཐང་གི་གནད་དོན་ཐོག་སྦས་གསང་མེད་པ་བཀའ་མོལ་ལྷུག་པོ་གནང་དགོས་ཞེས་ཞུས་འདུག དེ་དང་འབྲེལ་སྲིད་འཛིན་ཞི་ལ་ལོ་ངོ་བརྒྱ་ཕྲག་མང་པོ་ནས་ཡོད་པའི་བོད་ཀྱི་ནང་པ་སངས་རྒྱས་པའི་བླ་མའི་ཡང་སྲིད་ངོས་འཛིན་ཞུ་ཕྱོགས་ཀྱི་ལམ་ལུགས་ཐོག་ལ་ཐེ་བྱུས་བྱེད་རྒྱུ་མཚམས་འཇོག་བྱེད་དགོས་པ་སོགས་མང་ཚོགས་ཀྱི་གཞི་རྩའི་ཆོས་དད་རང་དབང་ལ་བརྩི་བཀུར་ཞུ་དགོས་པའི་གནོན་ཤུགས་སྤྲོད་རོགས་ཞེས་སོགས་ཞུས་འདུག
