༢༠༡༥ ཟླ་ ༧ ཚེས་ ༣༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༧ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ལ་དྭགས་དཔེ་ཐུབ་དགོན་པར་ཕར་ཕྱིན་དབྱར་ཆོས་ཆེན་མོ་ཚོགས་གནང་འདུག དེ་ཡང་གོང་ཚེས་ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་དཔེ་ཐུབ་དགོན་པའི་དཔལ་མགོན་འཕགས་པ་གནས་བརྟན་བ་ཀུ་ལ་སློབ་གཉེར་ཁང་གི་སྡོད་ཁང་དུ་ཕར་ཕྱིན་དབྱར་ཆོས་ཆེན་མོ་དབུ་འབྱེད་མཛད་ཡོད། དེ་ཡང་དཔེ་ཐུབ་དགོན་པའི་དབུ་བླ་བ་ཀུ་ལ་ཆུང་སྲིད་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས། དེ་རྗེས་ལ་དྭགས་མཚན་ཉིད་སློབ་གྲྭའི་དབུ་འཛིན་དགེ་བཤེས་དཀོན་མཆོག་དབང་འདུས་ལགས་ཀྱིས་ཐེངས་འདིའི་ཕར་ཕྱིན་དབྱར་ཆོས་ཆེན་མོའི་སྐོར་སྙན་སྒྲོན་ཞུས
་དོན། ཐེངས་འདིའི་ཕར་ཕྱིན་དབྱར་ཆོས་ཆེན་མོ་ནི་དེང་སྐབས་ནང་ཆོས་ཐོག་སློབ་གཉེར་བྱེད་རྒྱུ་དང་། ལ་དྭགས་ནང་ཡོད་པའི་ཆོས་ལུགས་རྣམས་རིས་མེད་མཐུན་སྒྲིལ་གཅིག་ཏུ་གནས་ཕྱིར་བསྔོ་བ་ཞིག་ཡིན། དེ་བཞིན་མཚན་ཉིད་རྩོད་རྒྱུ་དེ་རྣམ་དཔྱོད་ཀྱི་བློ་གྲོས་རྒྱས་ཐབས་ཆེད་ཡིན། གང་ཡིན་བརྗོད་ན། ༸གོང་ས་ཡིད་བཞིན་ནོར་བུ་མཆོག་གིས་ནང་པ་སངས་རྒྱས་པའི་ཆོས་ཞེས་པའི་གོ་དོན་གང་ཡིན་པ་དང་། ཆོས་ཀྱི་དོན་རྟོགས་ཐབས། ནང་པ་སངས་རྒྱས་པའི་ཆོས་དེ་བཞིན་དེང་གི་དུས་ལ་དགོས་མཁོ་གང་འདྲ་ཡོད་པ་དང་། ཉམས་ལེན་ཇི་ལྟར་བྱ་དགོས་པ་བཅས་ཀྱི་ཐོག་ལ་ཐུགས་རེ་དང་ཐུགས་བརྩོན་ཧ་ཅང་མཛད་ཡོད། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་ལམ་སྟོན་ཉག་གཅིག་ལ་བརྟེན་ནས་དེང་སྐབས་ནང་ཆོས་སློབ་གཉེར་བྱེད་རྒྱུར་དོ་སྣང་གསར་པ་ཞིག་འགོ་འཛུགས་བཞིན་ཡོད། ཅེས་དང་།
དེ་རྗེས་གླིང་མཆོག་སྤྲུལ་རིན་པོ་ཆེ་མཆོག་གི་ཡོངས་འཛིན་དགེ་བཤེས་ཐུབ་བསྟན་རབ་རྒྱས་ལགས་ཀྱིས་ཕར་ཕྱིན་དབྱར་ཆོས་ཆེན་མོ་དེ་བཞིན་ན་ནིང་ལོར་ཀླུ་འཁྱིལ་དགོན་པར་ཚོགས་པ་དེས་དཔེ་སྟོན་ཡག་པོ་ཞིག་ཆགས་ཡོད་སྐོར་སོགས་ཀྱི་གསུང་བཤད་གནང་། དེ་ནས་དཔེ་ཐུབ་དགོན་པའི་དགེ་བཙུན་རྣམས་ཀྱིས་བ་ཀུ་ལ་ཆུང་སྲིད་རིན་པོ་ཆེ་དང་ལྷན་དུ་རྟགས་གསལ་འགོ་འཛུགས་གནང་བ་དང་། རྟགས་གསལ་གྱི་ཐོག་མར་ཆོས་རྣམས་རང་བཞིན་གྱི་གྲུབ་པ་ཡོད་མེད་སྐོར་རྩོད་པ་དང་། བ་ཀུ་ལ་ཆུང་སྲིད་རིན་པོ་ཆེ་མཆོག་ལ་རིགས་ལམ་སློབ་གཉེར་སློབ་འགོ་འཛུགས་བཞིན་པའི་སྐབས་ཡིན་ནའང་། རིན་པོ་ཆེ་མཆོག་གིས་དྲི་བ་ཁག་ལ་གདེང་སྤོབས་ཆེན་པོས་
ལན་འདེབས་གནང་བར་མང་ཚོགས་རྣམས་ཀྱིས་དད་གུས་ལྷག་པར་འཕེལ། དེ་བཞིན་ཕྱོགས་མཐའ་ཁག་གི་སློབ་ཕྲུག་ཕོ་མོ་ཚོས་ཀྱང་བདེན་བཞིའི་རྣམ་གཞག་སྐོར་རྟགས་གསལ་བཏང་སྟེ་༸གོང་ས་མཆོག་ལ་སྤྱན་བསྟར་ཞུས་ཡོད་འདུག
དེ་ནས་ཇ་མུ་ཀ་ཤི་མིར་མངའ་སྡེའི་བློན་ཆེན་ཚེ་རིང་རྡོ་རྗེ་ལགས་ཀྱིས་གསུང་བཤད་གནང་དོན། ༸གོང་ས་ཡིད་བཞིན་ནོར་བུ་མཆོག་གི་ཐུགས་རྗེའི་ལམ་སྟོན་ཁོ་ནར་བརྟེན་ནས་ལ་དྭགས་ཀྱི་དགོན་པ་ཁག་གི་ནང་དེང་སྐབས་ནང་ཆོས་དང་མཚན་ཉིད་ཀྱི་སློབ་སྦྱོང་ངོ་སྤྲོད་ཧ་ཅང་ཡག་པོ་བྱུང་ཡོད། ཅེས་དང་། དེ་བཞིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གཙོ་འཛིན་རིག་འཛིན་དཔལ་
འབར་ལགས་ཀྱིས་ཀྱང་གསུང་བཤད་གནང་དོན། དེང་གི་འཆར་ལ་དྭགས་ཁུལ་གྱི་གཞོན་སྐྱེས་ཁག་གཅིག་རང་གི་རིག་གཞུང་དེ་གང་འདྲ་ཡིན་ནམ་སྙམ་པའི་ཐེ་ཚོམ་དང་དོ་སྣང་བྱེད་བཞིན་ཡོད། སྔ་མོ་ཡིན་ན་ཕ་མ་ཚོས་རང་གི་བུ་ཕྲུག་རྣམས་ལ་རིག་གཞུང་སྐོར་ངོ་སྤྲོད་བྱེད་ཀྱི་ཡོད། འོན་ཀྱང་བར་སྐབས་ཤིག་ནས་ཕ་མ་ཚོས་སོ་སོའི་བུ་ཕྲུག་ལ་གོམས་གཤིས་སོགས་ངོ་སྤྲོད་བྱ་རྒྱུ་ལྟ་ཅི། ཕ་མ་རང་ཉིད་ཀྱིས་རིག་གཞུང་ཐོག་དོ་སྣང་དེ་ཙམ་བྱེད་ཀྱི་མེད། འོན་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་ལམ་སྟོན་ཉག་ཅིག་ལ་བརྟེན་ནས་ལ་དྭགས་སུ་ནང་ཆོས་སློབ་གཉེར་བྱ་རྒྱུ་དང་། རང་གི་རིག་གཞུང་ཐོག་དོ་སྣང་དང་རིན་ཐང་ཡོད་པ་རྟོགས་ཐུབ་པ་བྱུང་ཡོད། ཅེས་སོགས་ཀྱི་གསུང་བཤད་གནང་། དགའ་ལྡན་ཁྲི་པ་རི་རྫོང་རིན་པོ་ཆེ་མཆོག་གིས་གསུང་བཤད་གནང་དོན། དེང་སྐབས་སྤྱི་ཚོགས་ཀྱི་གནས་སྟངས་འགྱུར་བཞིན་ཡོད་སྟབས་དེས་ཤུགས་རྐྱེན་འོག་གཞོན་སྐྱེས་ཚོས་དགོན་པ་དང་ལྷ་ཁང་སོགས་ཕྱག་མཆོད་འབུལ་བྱེད་སའི་བསྟི་གནས་ཁང་ཁག་སོགས་ལ་དེ་ཙམ་དོ་སྣང་བྱེད་ཀྱི་མེད། དེར་བརྟེན་ལ་དྭགས་ཁུལ་དུ་ནང་ཆོས་ཏེ་ནང་པ་སངས་རྒྱས་པའི་རིག་གཞུང་སླར་གསོའི་ཐོག་དོ་སྣང་དེ་ཙམ་བྱེད་ཀྱི་མེད། འོན་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་དེང་སྐབས་ནང་པ་སངས་རྒྱས་པའི་ཆོས་ཚུལ་གང་འདྲ་ཡིན་པ་དང་། ནང་ཆོས་ཐོག་སློབ་གཉེར་བྱ་རྒྱུར་དོ་སྣང་སླར་གསོ་ཐུབ་པ་བྱུང་ཡོད། ནང་ཆོས་དང་འབྲེལ་བའི་རིག་གཞུང་དེ་དག་རྒྱུ་མཚན་ལ་གཞི་བཅོལ་བ་ལས་རྨོང་དད་ཙམ་མིན། རྟེན་ཅིང་འབྲེལ་བར་བྱུང་བའི་རྣམ་གཞག་སྐོར་གཏིང་ཟབ་མོ་གསུང་མཁན་ནང་ཆོས་ཁོ་ན་ཆགས་ཡོད། ཅེས་སོགས་ཀྱི་གསུང་བཤད་གནང་ཡོད།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་འགྱུར་བ་འགྲོ་བཞིན་པ་ཚང་མ་བཟང་ཕྱོགས་ཀྱི་རྣམ་པ་ཡིན་པ་ཁྱབ་པ་མེད་ཅེས་བཀའ་སློབ་སྩལ་དོན། ལ་དྭགས་ཀྱི་ཡུལ་ལྗོངས་འདིའི་ནང་བྱུང་མི་སྲིད་པའི་གནས་ཚུལ་ཞིག་དེང་སྐབས་ཡོང་བཞིན་པ་དེ་ནི། ལ་དྭགས་ནང་རང་སྲོག་བཅད་མཁན་མང་པོ་ཡོང་གི་ཡོད་པའི་གནས་ཚུལ་ཐོན་གྱི་འདུག དེས་ག་རེ་སྟོན་གྱི་ཡོད་རེད་ཟེར་ན། མིའི་བསམ་བློའི་ནང་མ་སྐྱིད་པ་ཞིག་ཡོད་པ་གསལ་པོར་མཚོན་ནུས། འཛམ་གླིང་ནང་གི་རྙོག་གྲ་མང་པོ་ཞིག་མིས་བཟོས་པ་རེད། དཀའ་ངལ་དེ་དག་ང་ཚོས་སྨོན་ལམ་བརྒྱབ་ནས་སེལ་རྒྱུ་རེད་དམ། དཀའ་ངལ་ལས་ཐར་ཐབས་ངོ་མ་དེ་ང་རང་ཚོ་སོ་སོའི་རྒྱུད་ལ་ཡོད་པ་ཤེས་དགོས། འདིར་འཛོམས་པའི་ལོ་ན་བགྲེས་པ་ཚོ་དུས་རབས་ཉི་ཤུར་དབང་བའི་མི་རབས་ཤིག་ཆགས་ཡོད། དུས་ཚོད་དེ་དམག་འཁྲུག་གི་དུས་རབས་ཤིག་ཆགས་ཡོད། ད་ཆ་དུས་རབས་ཉི་ཤུ་རྩ་གཅིག་འདི་གང་འདྲ་བྱུང་མིན་ད་ལྟའི་གཞོན་སྐྱེས་ཁྱེད་རང་ཚོར་རག་ལུས་ཡོད། གཞོན་སྐྱེས་ཁྱེད་རང་ཚོས་འབད་བརྩོན་བྱས་ཏེ་དུས་རབས་འདི་བདེ་སྐྱིད་ལྡན་པ་ཞིག་ཡོང་ངམ། ཡང་ན། འདོད་རྔམས་དང་ཁོང་ཁྲོ་བྱས་ཏེ་དུས་རབས་འདི་རྙོག་གྲ་དང་དཀའ་ངལ་ཅན་ཞིག་ཆགས་ཡོང་། གང་ལྟར་ཡོད་ཚད་གཞོན་སྐྱེས་ཁྱེད་རང་ཚོའི་བྱེད་ཕྱོགས་ལ་རག་ལུས་ཡོད། རྒྱ་གར་ཨིན་ཇིའི་བཙན་འོག་ཏུ་ཡོད་སྐབས་ཨིན་ཇིས་བཟང་ཕྱོགས་ཀྱི་བྱེད་ཕྱོགས་ཤིག་ལག་བསྟར་བྱས་ཡོད་པ་ནི་ཤེས་ཡོན་གྱི་རིན་ཐང་གལ་ཆེ་ཡིན་པ་བརྩིས་འཇོག་བྱས་ཡོད། དེ་དེང་སྐབས་ང་ཚོས་བདག་གཅེས་བྱ་དགོས་པ་རེད། ཡིན་ནའང་། དེང་དུས་ཀྱི་ཤེས་ཡོན་རིན་ཐང་དང་ལྷན་དུ་ནང་སེམས་ཀྱི་བཟང་པོའི་ཡོན་ཏན་གཉིས་ཟུང་འབྲེལ་ཐོག་གཅེས་སྐྱོང་དང་དོན་གཉེར་བྱ་དགོས། རྟགས་གསལ་གཏོང་རྒྱུའི་ལམ་སྲོལ་ནང་རང་རྒྱལ་གཞན་ཕམ་གྱི་བསམ་བློ་མིན་པར་ཕྱོགས་གཉིས་ཀར་རྒྱལ་ཁ་ཐོབ་པ་ཞིག་ཡོང་རྒྱུའི་བསམ་བློ་བཏང་བ་ཡིན་ན། རྟགས་གསལ་དེ་དོན་སྙིང་ལྡན་པ་ཞིག་ཡོང་རྒྱུ་རེད།
ངོས་ཀྱི་ཁྱེད་རང་ཚོར་སྒྲུང་ཞིག་བཤད་ཆོག སྔ་མོ་ཁམས་དཀར་མཛེས་དགོན་པར་བླ་མ་ཞིག་གིས་སྐྱ་སེར་གཉིས་ཀར་རིགས་ལམ་སློབ་ཁྲིད་གནང་བ་རེད། ས་གནས་དེར་གྲོང་ཆོག་རྒྱུག་མཁན་གྱི་རྙིང་མའི་དགོན་པ་ཞིག་ཀྱང་ཡོད། དགོན་པའི་གྲོང་ཆོག་རྒྱུག་མཁན་སྔགས་པ་དེས་མི་སྐྱ་ཚོར་རིགས་ལམ་མ་སློབ་རོགས། ཁོང་ཚོར་རིགས་ལམ་བསླབས་པ་ཡིན་ན་ང་ཚོར་དྲི་བ་ཁག་པོ་དེ་འདྲ་གཏོང་གི་འདུག ཅེས་སྡུག་སྐད་ཤོར་བའི་ལོ་རྒྱུས་ཡོད། ཅེས་ཞལ་ཤོབ་མཛད་རྗེས་མུ་མཐུད་བཀའ་སློབ་སྩལ་དོན། གང་ལྟར་རིགས་ལམ་གྱི་ཐོག་ནས་སློབ་སྦྱོང་བྱ་རྒྱུ་དེ་ང་ཚོས་རིམ་བཞིན་ཡར་རྒྱས་གཏོང་དགོས། ཐོག་མར་སློབ་ཚན་འདེམས་བསྒྲུག་བྱས་ནས་འགྲོ་རྒྱུ་དང་དེ་ནས་རིམ་བཞིན་ཤེར་ཕྱིན་གྱི་གཞུང་སོགས་ལ་སློབ་སྦྱོང་བྱེད་ཐུབ་པ་དགོས། ཞེས་བཀའ་སློབ་སྩལ་བ་དང་སྦྲགས། ཕར་ཕྱིན་དབྱར་ཆོས་ཆེན་མོའི་མཛད་སྒོ་རྒྱས་པར་ལེགས་གྲུབ་བྱུང་།
དེ་རྗེས་ལ་དྭགས་ཀྱི་གྲོང་ཁྱེར་སླེ་ཉེ་འཁྲིས་སུ་ཡོད་པའི་ལ་དྭགས་སིན་དི་སན་ཀིར་ཏི་ Ladakh Sindh Sanskrit ཚོགས་ཁང་ཆེན་མོའི་ནང་ཆིབས་སྒྱུར་བཀའ་དྲིན་བསྐྱངས་གནང་མཛད་པ་དང་གནད་ཡོད་མི་སྣ་ཁག་ལ་བཀའ་སློབ་སྩལ་དོན། ངོས་རང་དུས་རྒྱུན་འགྲོ་བ་མི་དུང་ཕྱུར་བདུན་ནང་གི་མི་ཞིག་ཡིན་བསམ་གྱི་ཡོད། ཅེས་བཀའ་སློབ་སྩལ་བ་མ་ཟད། མགོན་པོ་གང་ཉིད་མཆོག་གིས་སྐབས་དེར་གནའ་བོའི་སྤྱི་ཚོགས་ཀྱི་དཔལ་ཡོན་ཧ་ཅང་ཕྱུག་པོ་ཡོད་པ་ཨི་ཇིབ་དང་རྒྱ་ནག དེ་བཞིན་རྒྱ་གར་སོགས་ཀྱི་ཁྲོད་བསམ་བློ་བ་དང་། ལྟ་གྲུབ་སྨྲ་བ། ཆོས་ལུགས་དབུ་ཁྲིད་བཅས་མང་ཤོས་རྒྱ་གར་ནས་ཐོན་ཡོད་སྐོར་བཀའ་སློབ་སྩལ། དེ་རྗེས་མུ་མཐུད་ནས་བཀའ་སློབ་ཕེབས་དོན། དེང་སྐབས་དུས་རབས་ཉི་ཤུ་རྩ་གཅིག་སྐབས་འདིར་ཡང་རྒྱ་གར་གནའ་རབས་ཀྱི་ལྟ་གྲུབ་ཨ་ཧིན་ས་འམ་འཚེ་མེད་ཞི་བའི་ལྟ་གྲུབ་དགོས་མཁོ་ཧ་ཅང་ཆེན་པོ་ཆགས་ཡོད། རྒྱ་གར་ནང་ལ་ཆོས་ལུགས་སྣ་མང་ཡོད་པ་དེ་དག་མཐུན་སྒྲིལ་དམ་ཚིག་འོ་ཆུ་གཅིག་འདྲེས་ལྟར་གནས་ཐུབ་པ་དེ་དཔེ་སྟོན་བཟང་པོ་ཞིག་ཆགས་ཡོད། དུས་རབས་ཉི་ཤུ་རྩ་གཅིག་པའི་ནང་དུ་ཆོས་ལུགས་རིས་མེད་ཀྱི་བཟང་སྤྱོད་ནི་ཧ་ཅང་གལ་ཆེན་པོ་ཆགས་ཡོད། ཆོས་ལུགས་རིས་མེད་ཀྱི་བཟང་སྤྱོད་ནི་འཇིག་རྟེན་གོ་ལ་ཡོངས་ཁྱབ་ཀྱི་ལས་འགན་ཞིག་ཆགས་ཡོད།
ཆོས་ལུགས་མི་འདྲ་ཡང་ཆོས་ལུགས་ཚང་མར་གཅིག་གི་གཅིག་ལ་གུས་ཞབས་དང་བརྩི་མཐོང་བྱེད་དགོས་པ་ཡིན། ལྷག་པར་ཆོས་མེད་རིང་ལུགས་ཤིག་ཡིན་ནའང་ཁོང་ལ་གུས་ཞབས་ཞུ་དགོས་པ་རེད། ཁྱེད་རང་ཚོས་སྨོན་ལམ་བརྒྱབ་པ་དང་། བླ་མ་དང་ལྷ་ཁང་ནང་དངུལ་ཕུལ་བ་དེ་གཅིག་པུས་སངས་རྒྱས་ཀྱི་ཆོས་བྱེད་པ་འདང་གི་མེད། ཁྱེད་རང་ལ་དངུལ་ཡོད་པ་དེ་དེབ་ཉོས་ནས་དེབ་བཀླག་དགོས་པ་རེད། ངོས་རང་ལོ་རྒན་བརྒྱད་ཅུར་བསླེབས་ཡོད། ཡིན་ནའང། ས་ཆ་གང་དུ་ཕྱིན་ཡང་སློབ་སྦྱོང་བྱེད་བཞིན་ཡོད། ངོས་ཀྱི་ནང་པ་ཚོར་དེ་ལྟར་ཤོད་ཀྱི་ཡོད། གལ་སྲིད་ཁྱེད་རང་དུས་རབས་ཉི་ཤུ་རྩ་གཅིག་
པའི་ནང་པ་ཞིག་བྱེད་འདོད་ན། ངག་ནས་སངས་རྒྱས་དང་། ཆོས་དང་། དགེ་འདུན་བཅས་དཀོན་མཆོག་གསུམ་ལ་ཕྱག་འཚལ་ལོ། །ཞེས་བཏོན་པ་ལས་ལྷག་པའི་སངས་རྒྱས་པའི་ཆོས་ཟེར་ན་གང་ཡིན་པ་ངོ་འཕྲོད་པ་ཞིག་དགོས་པ་དེ་གལ་ཆེ་བ་རེད། ན་ནིང་ལོར་ལྡི་ལིར་རྒྱལ་སྤྱི་ཧིན་རྡུ་ལྷན་ཚོགས་ཀྱི་ཚོགས་འདུར་ངོས་ཀྱིས། དེང་དུས་སྤྱི་ཚོགས་ཡར་རྒྱས་དང་ལྷན་སྲོལ་རྒྱུན་ཡ་རབས་ཀྱི་རིན་ཐང་གཉིས་ཟུང་འབྲེལ་ཐོག་འགྲོ་ཐུབ་པ་བྱ་རྒྱུ་གལ་ཆེན་པོ་རེད་ཅེས་བཤད་པ་ཡིན། ངོས་རང་ལ་དྭགས་སུ་ཐོག་མར་ཕྱི་ལོ་ ༡༩༦༦ ལོར་བསླེབས་པ་རེད། དེ་ནས་བཟུང་སྟེ་ད་བར་ཕྱིའི་འཛུགས་བསྐྲུན་དང་ནང་གི་ཤེས་ཡོན་སོགས་ཀྱི་ཐོག་ཡར་རྒྱས་ཤུགས་ཆེ་ཕྱིན་འདུག ད་དུང་ལོ་བཅུའི་རིང་མུ་མཐུད་ངོས་རང་ལ་དྭགས་སུ་བསླེབ་ཐུབ་རྒྱུའི་རེ་བ་ཡོད། ངོས་རང་ལོ་དགུ་ཅུའི་སྐབས་ལ་དྭགས་སུ་སླེབ་ཐུབ་མིན་ངོས་ཀྱི་བཤད་མི་ཤེས། ཅེས་བཀའ་སློབ་སྩལ།
དེ་རྗེས་རྒྱ་གར་རྒྱལ་ཡོངས་རླུང་འཕྲིན་ཁང་གི་གསར་འགོད་པས་༸གོང་ས་༸སྐྱབས་མགོན་ཆེན་པོ་མཆོག་ལ་ཉེ་ལམ་འདས་གྲོངས་སུ་གྱུར་བའི་རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཨབ་དུལ་ཀ་ལམ་མཆོག་སྐོར་དགོངས་ཚུལ་ཇི་ཡོད་ཅེས་བཅར་འདྲི་ཞུས་པར་བཀའ་ལན་སྩལ་དོན། དམ་པ་ཁོང་འདས་གྲོངས་སུ་གྱུར་བའི་གནས་ཚུལ་ཐོས་སྐབས་ངོས་རང་བློ་ཕམ་ཧ་ཅང་ཆེན་པོ་བྱུང་། ཁོང་ནི་མི་བཟང་པོ་ཞིག་དང་། གང་ཟག་དམིགས་བསལ་བ་ཞིག་ཡིན། ཁོང་གི་བཟང་པོའི་ཡོན་ཏན་དང་། མི་བཟང་པོ་ཡིན་པ་དེར་ངོས་ཀྱི་བསྔགས་བརྗོད་ཞུ་གི་ཡོད། དམ་པ་ཁོང་ཆོས་ལུགས་ཁ་ཆེ་ཡིན་པ་དང་། སྙན་གྲགས་ཅན་གྱི་ཚན་རིག་པ། དེ་བཞིན་རྒྱལ་ཁབ་ཀྱི་སྲིད་འཛིན་སྙན་གྲགས་ཅན་ཞིག་ཆགས་ཡོད། ལྷག་པར་ཁོང་གི་རང་གཤིས་བཟང་པོ་དེར་འགྱུར་བ་མེད་པ་མ་ཟད། དམ་པ་ཁོང་ནང་ཆོས་ནས་གསུངས་པའི་བྱམས་བརྩེའི་ཉམས་ལེན་སྐོར་ལ་ཐུགས་སྣང་ཆེན་པོ་གནང་མཁན་ཞིག་ཡིན། ཁོང་ནི་ངོས་རང་མ་འཆི་བར་དུ་བརྗེད་ཐབས་མེད་པའི་གྲོགས་པོ་ཤིག་ཡིན། ད་ལམ་ངོས་ནས་དམ་པ་ཁོང་གི་ཤུལ་ལུས་ནང་མིར་གདུང་སེམས་མཉམ་སྐྱེ་ཞུ་བཞིན་ཡོད། ངོས་ཀྱི་གོ་ཐོས་ལྟར་ན། དམ་པ་ཁོང་ལ་དགུང་ལོ་དགུ་བཅུ་གོ་དགུར་ཕེབས་པའི་གཅེན་པོ་ཞིག་ཡོད་པ་ཐོས་བྱུང་། རེ་བར་ངོས་རང་ཡང་ཁོང་དང་འདྲ་བར་ལོ་དགུ་བཅུ་བར་འཚོ་གནས་ཐུབ་རྒྱུའི་རེ་བ་ཡོད། ཅེས་བཀའ་ལན་སྩལ་ཏེ་ཉིན་གསུམ་པའི་མཛད་འཕྲིན་ཁག་ལེགས་པར་གྲུབ་ཡོད་འདུག །
