༢༠༡༥ ཟླ་ ༧ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༧ ཚེས་ ༡༧ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པས་གོ་སྒྲིག་འོག་རྡ་སའི་ཉེ་འགྲམ་ཤེས་རབ་དགའ་འཚལ་སློབ་གླིང་གི་ཚོགས་ཁང་དུ། བུད་མེད་ཀྱི་དཔལ་འབྱོར་ནུས་སྟོབས་གོང་འཕེལ་ཆེད་འཚོ་བ་རང་སྐྱོང་རུ་ཁག་གི་ལས་རིམ། ཞེས་པའི་བརྗོད་གཞིའི་འོག་སློབ་གྲྭའི་བུད་མེད་རྣམས་ལ་ཉིན་གཅིག་གི་ཟབ་སྦྱོང་གནང་འདུག སྐབས་དེར་བུད་མེད་སློབ་མ་གྲངས་ ༣༢ མཉམ་བཞུགས་གནང་འདུག་པ་དང་། ཟབ་སྦྱོང་གི་དགོས་དམིགས་གཙོ་བོ་ནི་སློབ་གྲྭའི་ནང་བུད་མེད་སློབ་མ་ཚོས་འཚོ་བ་རང་སྐྱོང་ཇི་ལྟར་བྱེད་དགོས་པའི་ལམ་སྟོན་དང་། འཚོ་བ་རང་སྐྱོང་ལག་བསྟར་བྱེད་སྐབས་རུ་ཁག་བཟོ་རྒྱུ་གལ་ཆེ་ཚུལ། དེ་བཞིན་འཚོ་བ་རང་སྐྱོང་གི་གལ་གནད་དང་། དངུལ་གང་བྱུང་མ་གཏོར་བར་གསོག་འཇོག་ཇི་ལྟར་བྱེད་དགོས་པ་སོགས་ཀྱི་སྐོར་ལམ་སྟོན་གནང་བ་མ་ཟད། སློབ་གྲྭ་དེར་བུད་མེད་འཚོ་བ་རང་སྐྱོང་རུ་ཁག་གསུམ་གསར་འཛུགས་གནང་འདུག་པ་དང་། རུ་ཁག་དེ་དག་ནི་ནང་སྲིད་ཁྱབ་ཁོངས་བུད་མེད་ནུས་སྟོབས་གོང་འཕེལ་ཚན་པས་འཛིན་སྐྱོང་གནང་རྒྱུ་ཡིན་འདུག
སྐབས་དེར་སློབ་མ་རྣམས་ལ་བོད་མིའི་སྒྲིག་འཛུགས་འཆར་འགོད་ལས་ཁུངས་ཀྱི་དྲུང་གཞོན་རྣམ་རྒྱལ་ཆོས་འཛོམས་ལགས་ཀྱིས་བུད་མེད་ནུས་སྟོབས་གོང་འཕེལ་སྐོར་ལམ་སྟོན་གནང་འདུག་པ་དང་། གཞན་ཡང་བུད་མེད་ནུས་སྟོབས་གོང་འཕེལ་ཚན་པའི་དྲུང་ལས་བདེ་ཆེན་དབང་མོ་ལགས་ཀྱིས་འགོ་ཁྲིད་ཀྱི་ནུས་པ་སྐྱེད་སྲིང་ཐོག་ལམ་སྟོན་ཡང་གནང་འདུག དེ་བཞིན་ནང་སྲིད་ལས་ཁུངས་ཀྱི་དྲུང་ལས་ཐུབ་བསྟན་རིག་འཛིན་ལགས་ཀྱིས་ལག་ཤེས་ཟབ་སྦྱོང་གི་གོ་སྐབས་འཚོལ་སྟངས་སྐོར་སོགས་ལམ་སྟོན་གནང་འདུག
