༢༠༡༥ ཟླ་ ༧ ཚེས་ ༡༥ རེས་གཟའ་ལྷག་པ།
༄༅། །སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་ཁང་ནང་སྐུ་གཤེགས་པར་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཕེ་བྷི་ཡན་ཧེ་མིལ་ཊོན་ Mr.Fabian Hamilton མཆོག་གིས་རྒྱ་གཞུང་ལ་ཁོང་ཁྲོའི་རྣམ་པ་ཤུགས་ཆེ་བསྟན་པ་དང་སྦྲགས་གསུང་དོན། ཐེངས་འདིར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་བཙོན་ཁང་ནང་དགོངས་པ་རྫོགས་པའི་གནས་ཚུལ་དེས་རྒྱ་ནག་གཞུང་གིས་བོད་ཐོག་སྲིད་བྱུས་ཇི་འདྲ་ཞིག་འཛིན་བཞིན་ཡོད་པའི་རྣམ་པ་དམར་བརྗེན་དུ་ཐོན་པ་རེད། རྒྱལ་སྤྱིའི་སྤྱི་ཚོགས་ཀྱིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་གནས་སྟངས་ཐོག་སེམས་ཚབས་ཧ་ཅང་བྱས་ཀྱང་རྒྱ་ནག་གཞུང་གིས་དེར་སྣང་ཆུང་ཁྱད་གསོད་བྱས་པ་མ་ཟད། རྒྱལ་སྤྱིའི་ཁྲིམས་ལ་རྩིས་མེད་རྡོག་རོལ་དུ་བཏང་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་དྲང་བདེན་གྱི་ཁྲིམས་ལུགས་ལག་བསྟར་ནམ་ཡང་བྱས་མེད་པ་མ་ཟད། རིན་པོ་ཆེ་མཆོག་གི་སྐུ་གཟུགས་ཀྱི་གནས་སྟངས་ཧ་ཅང་ཛ་དྲག་ཡོད་བཞིན་དུ་སྨན་བཅོས་བྱ་རྒྱུའི་ཐོབ་ཐང་རྩ་བ་ནས་སྤྲད་མེད། དེར་བརྟེན་རྒྱ་ནག་གཞུང་ནི་རིན་པོ་ཆེ་མཆོག་དམར་གསོད་གཏོང་མཁན་གྱི་ལག་དམར་བ་ཆགས་ཡོད། ཅེས་རྒྱ་ནག་གིས་སྲིད་བྱུས་ལག་བསྟར་བྱེད་ཕྱོགས་དེར་ཁོང་ཁྲོ་ཤུགས་ཆེ་ཡོད་པའི་རྣམ་འགྱུར་བསྟན་འདུག
སྐུ་ཞབས་ཕེ་བྷི་ཡན་ཧེ་མིལ་ཊོན་མཆོག་ནི་བོད་དོན་ཐོག་ཆོད་སེམས་བརྟན་པོས་རྒྱབ་སྐྱོར་གནང་མཁན་ཞིག་ཡིན་ལ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐུ་མ་གཤེགས་སྔོན་ཏེ། ཕྱི་ལོ་ ༢༠༡༥ ཟླ་ ༦ ཚེས་ ༡༨ ཉིན་ཨིན་ཡུལ་གྱི་གྲོས་ཚོགས་ནང་བགྲོ་གླེང་སྐབས་ཤིག་ལ། ཁོང་གིས་རིན་པོ་ཆེའི་གནས་སྟངས་ཐོག་ལ་སེམས་ཚབས་ཤུགས་ཆེ་བཏོན་གནང་མྱོང་ཡོད་པ་མ་ཟད། ཕྱི་ལོ་ ༢༠༡༠ ལོར་ཨིན་ཡུལ་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ལ་ཞུ་སྙན་ཞིག་ཕུལ་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་གྱོད་གཞིའི་ཐོག་རྒྱ་ནག་གཞུང་གིས་ཛ་དྲག་ཆེན་པོས་བསྐྱར་དུ་བསམ་ཞིབ་བྱེད་དགོས་པའི་རེ་འདུན་ཡང་བཏོན་གནང་འདུག །
