༢༠༡༥ ཟླ་ ༧ ཚེས་ ༡༥་རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༧ ཚེས་ ༡༥ཉིན་གྱི་སྔ་དྲོ་ཆུ་ཚོད་ ༡༡ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་རྒྱ་ཡིག་ཚན་པའི་འགན་འཛིན་ཟུང་དྲུང་བསོད་ནམས་རྡོ་རྗེ་ལགས་ཀྱིས་ཐ་ཝན་སློབ་ཕྲུག་ཁག་གཅིག་ལ་བོད་མིའི་སྒྲིག་འཛུགས་ཀྱི་སྒྲོམ་གཞི་དང་། དབུ་མའི་ལམ་གྱི་སྲིད་བྱུས་བཅས་ངོ་སྤྲོད་གནང་སོང་། དེ་ཡང་ཕྱི་དྲིལ་ཟུང་དྲུང་བསོད་ནམས་རྡོ་རྗེ་ལགས་ཀྱིས་སློབ་ཕྲུག་ཚོར་བོད་མིའི་སྒྲིག་འཛུགས་ཀྱི་སྒྲོམ་གཞི་དང་འཛིན་སྐྱོང་གནང་ཕྱོགས། དེ་བཞིན་བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་དབུ་མའི་ལམ་གྱི་དགོངས་དོན་བཅས་ཀྱི་ཐོག་ཞིབ་འགྲེལ་གནང་། དེ་རྗེས་སློབ་ཕྲུག་ཚོས་དྲི་བར་ལན་འདེབས་ཀྱང་གནང་ཡོད། ཕྱི་དྲིལ་ལས་ཁུངས་ནས་རྒྱ་ཡིག་ནང་དཔར་བསྐྲུན་བྱས་པའི་དབུ་མའི་ལམ་གྱི་ངོ་སྤྲོད་དང། ཡིག་ཆ་ཕྱོགས་བསྒྲིགས་ཀྱི་དེབ་ཆུང་ཞིག་སློབ་མ་རེར་གནང་སྟེ་ལས་རིམ་མཇུག་སྒྲིལ།
ཐེངས་འདིའི་ལྟ་སྐོར་དང་བླངས་ཀྱི་ལས་གཞི་དེ་བཞིན་བོད་རང་བཙན་སློབ་ཕྲུག་ཚོགས་པས་སྣེ་ཁྲིད་འོག་ཕྱི་ལོ་ ༢༠༡༥ ཟླ་ ༧ ཚེས་ ༡༣ ནས་ཚེས་ ༢༩ བར་ཐེ་ཝན་མཐོ་རིམ་སློབ་གཉེར་ཆེ་ཁག་ནས་དབྱར་དུས་གུང་གསེང་དང་བསྟུན་རྡ་ས་ཁུལ་གྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་ནང་ལྟ་སྐོར་བྱེད་རྒྱུ་ཡིན་པ་དང་། དེ་བཞིན་རྒྱ་ཡིག་ཚན་པ་ཁག་གི་ནང་དང་བླངས་ཞབས་ཞུ་གནང་རྒྱུ་ཡིན་འདུག་པ་དང་། དེ་བཞིན་ཐེངས་འདིར་ཐེ་ཝན་སློབ་གྲྭ་ཆེན་མོ་དང་། ཆབ་སྲིད་སློབ་གྲྭ་ཆེན་མོ། ཆིང་ཧཱ་སློབ་གྲྭ་ཆེན་མོ། དྲེན་ཀུང་སློབ་ཆེན་བཅས་ཁྱོན་མཐོ་རིམ་སློབ་ཁང་བཅུ་ནས་སློབ་མ་གྲངས་ ༢༠ ཙམ་རྡ་སར་བཅར་ཡོད་འདུག །
