༢༠༡༥ ཟླ་ ༧ ཚེས་ ༩ རེས་གཟའ་ཕུར་བུ།

༄༅། །ཕྱི་ལོ་ ༢༠༡༥ ཟླ་ ༧ ཚེས་ ༧ ཉིན་༸གོང་ས་མཆོག་གིས་ཨ་རིའི་ཁེལ་ལི་ཕོར་ནི་ཡ་མངའ་སྡེའི་གཙུག་ལག་སློབ་གྲྭའི་ཚོགས་ཁང་ནང་དུ་ University of California Irvine མཛད་འཕྲིན་རྒྱ་ཆེ་བསྐྱངས་འདུག དེ་ཡང་གོང་ཚེས་ཉིན་གྱི་སྔ་དྲོ་ཐོག་མར་༸གོང་ས་མཆོག་གིས་མངའ་སྡེའི་གསར་འགྱུར་ཚན་པ་གྲགས་ཅན་ KTLA 5 News ཞེས་པའི་གསར་འགོད་པ་ལྕམ་ཀི་རི་སི་ཊི་ན་པ་སི་ཁུ་ཅི་ Christina Pascucci ལགས་ཀྱིས་བཅར་འདྲིར་དང་ལེན་མཛད། སྐབས་དེར་གསར་འགོད་པས་༸གོང་ས་མཆོག་གི་སྐུ་ཚེའི་ནང་ཐུགས་འགུལ་ཤུགས་ཆེ་ཤོས་གཏོང་མཁན་སུ་ཡིན་གྱི་དྲི་བར་བཀའ་ལན་སྩལ་དོན། སྤྱིར་ངོས་ལ་སེམས་འགུལ་གཏོང་མཁན་མི་མང་པོ་ཞིག་ཡོད་ཀྱང་ཉེ་བའི་དུས་སྐབས་ནང་ལ་མཚོན་ན། མེས་པོ་དམ་པ་གཱན་དྷི་མཆོག་དང་། ཨ་རིའི་མི་རིགས་ནག་པོའི་སྤྱི་དམངས་ཐོབ་ཐང་རྩོད་ལེན་པ་མར་ཊིན་ལུ་ཐར་ཀིངྒ་གཞོན་པ་མཆོག་རྣམ་གཉིས་སྐུ་འཚོ་བཞུགས་སྐབས་མཇལ་རྒྱུའི་བསྐལ་བ་བྱུང་མེད་ཀྱང་དམ་པ་ཁོང་གཉིས་ཀྱིས་ངོས་ལ་སེམས་འགུལ་ཧ་ཅང་ཆེན་པོ་ཐེབ་བྱུང་། གཞན་ངོས་ཀྱིས་མིག་དཔེ་ལྟ་ས་ལྟ་བུ་དཔལ་ན་ལེཎྜའི་ནང་པའི་སློབ་དཔོན་ཆེན་པོ་དེ་དག་ཡིན། ཞེས་བཀའ་ལན་སྩལ། དེ་རྗེས་གསར་འགོད་པས་དེང་སྐབས་འཛམ་གླིང་ནང་ཉེན་ཚབས་ཆེ་ཤོས་གང་གཟིགས་བཞིན་ཡོད། ཅེས་དྲི་བ་ཞུ་སྐབས་༸གོང་ས་མཆོག་གིས་ཐེ་ཚོམ་གང་ཡང་མེད་པར་འཚེ་བ་རེད། ཅེས་བཀའ་ལན་སྩལ།

དེ་རྗེས་༸གོང་ས་མཆོག་ཁེལ་ལི་ཕོར་ནི་ཡ་གཙུག་ལག་སློབ་གྲྭའི་ཚོགས་ཁང་ Bren Events Center དུ་ཆིབས་སྒྱུར་བསྐྱངས་ནས་སྡིངས་ཆའི་སྟེང་བཞུགས་ཁྲིར་༸ཞབས་སོར་འཁོད་བསྟུན། ལས་རིམ་གཙོ་སྐྱོང་བ་ཨན་ཀར་རེ་ Ann Curry ལགས་ཀྱིས་ལྡི་ལིར་རྟེན་གཞི་བྱས་པའི་ཏཱ་ལའི་བླ་མའི་ཀུན་ཕན་བདེ་རྩ་ཚོགས་པའི་ཚོགས་གཙོ་སྐུ་ཞབས་ར་ཇིབ་མ་རོཧ་ཏྲ་ Rajiv Mehrotra ལགས་ལ་འབོད་སྐུལ་ཞུས་པ་ལྟར། ཁོང་གིས་༸གོང་ས་མཆོག་གི་སྐུ་ཚེའི་མཛད་འཕྲིན་སྐོར་ངོ་སྤྲོད་གནང་རྗེས། གཙུག་ལག་སློབ་དཔོན་སྐུ་ཞབས་བྷོབ་ཐུར་མན་ Prof Bob Thurman ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་དེང་དུས་ཤེས་ཡོན་གྱི་ལམ་ལུགས་ནང་སེམས་བཟང་པོ་བྱེད་དགོས་པའི་ལམ་སྟོན་སློབ་གསོ་དགོས་སྐོར་བཀའ་སློབ་སྩལ་བ་རྣམས་ལ་ཡི་རང་སྔགས་བརྗོད་ཞུས། དེ་རྗེས་ཨན་ཀར་རེ་ལགས་ཀྱིས་བགྲོ་གླེང་དབུ་འཛུགས་གནང་སྐབས་ཐོག་མར་སྡིངས་ཆའི་སྟེང་གི་བགྲོ་གླེང་མཛད་མཁན་༸གོང་ས་༸སྐྱབས་མགོན་ཆེན་པོ་མཆོག་དང་། ཨར་མན་རོ་ཐར་ Armaan Rowther ལགས། ཇེ་རེ་ཌ་ཀོ་ཧེན་ Jared Cohen ལགས། གློག་བརྙན་འཁྲབ་སྟོན་པ་ལྕམ་ཛེན་ད་ཡ་ Zendaya ལགས། ཁེལ་ལི་ཕོར་ནི་ཡ་གཙུག་ལག་སློབ་གྲྭའི་ཏཱ་ལའི་བླ་མའི་སློབ་ཡོན་ལས་གཞི་ཚན་པའི་འགན་འཛིན་ལྕམ་ཀ་རི་ན་ཧ་མིལ་ཊོན་ Karina Hamilton ལགས་སོགས་ཚོགས་བཅར་བ་རྣམས་ལ་ངོ་སྤྲོད་ཞུས།

སྐབས་དེར་༸གོང་ས་མཆོག་གིས་ཐོག་མར་བཀའ་སློབ་སྩལ་དོན། ངོས་ཀྱིས་དེང་རབས་ཤེས་ཡོན་ལ་སློབ་སྦྱོང་གང་ཡང་བྱེད་མྱོང་མེད། ངོས་རང་ཆུང་དུས་སྐབས་ནས་དཔལ་ན་ལེཎྜའི་མཁས་དབང་གི་བརྩམས་པའི་གཞུང་ལུགས་ལ་སློབ་སྦྱོངས་བྱས་ནས་ཡོད། འོན་ཀྱང་འདས་པའི་ལོ་ངོ་ ༣༠ ཙམ་རིང་ངོས་ཀྱིས་འཇིག་རྟེན་ཁམས་ཀྱི་རིག་པ་དང་། ཀླད་རྩའི་ཚན་རིག་པ། དེ་བཞིན་དངོས་ཁམས་རིག་པ་དང་། སེམས་ཁམས་རིག་པ་སོགས་ཀྱི་ཚན་རིག་པ་མང་དག་གཅིག་དང་ལྷན་བགྲོ་གླེང་རིམ་པ་བྱས་མྱོང་ཡོད། དེའི་འབྲས་བུར་ཕྱོགས་གཉིས་ཀར་ཕན་ཐོགས་བྱུང་ཡོད། ཚན་རིག་པ་ཚོས་ཀྱང་ནང་པའི་གཞུང་ནས་གསུངས་པའི་བློའི་རིགས་འདྲ་མིན་ཡོད་པ་རྣམས་ལ་དོ་སྣང་ཧ་ཅང་གནང་བ་མ་ཟད། དེང་རབས་སྨན་པས་ཤི་ཚར་བར་ངོས་འཛིན་བྱས་རྗེས་སུའང་ཉིན་མ་མང་པོའི་རིང་ཐུན་ལ་བཞུགས་ནས་ལུས་ལ་རུལ་དྲི་དང་ཤ་དང་སྤག་པ་སོགས་ཉམས་རྒུད་གང་ཡང་མེད་པར་གསོན་པོ་ལྟར་གནས་ཐུབ་ཀྱི་ཡོད་པའི་གནས་སྟངས་མཐོང་སྐབས། ཚན་རིག་པ་ཚོས་དེར་ཧ་ཅང་ཡ་མཚན་སྐྱེ་བཞིན་འདུག ཁོང་ཚོས་དེར་འགྲེལ་བཤད་རྒྱག་རྒྱུ་གང་ཡང་མི་འདུག འོན་ཀྱང་ནང་པ་ཚོས་ལུས་འཆི་ཡང་རྣམ་ཤེས་ཕྲ་མོའི་རྒྱུན་ད་དུང་གནས་ཀྱི་ཡོད་པར་ངོས་འཛིན་བྱེད་བཞིན་ཡོད། ཅེས་སོགས་ཀྱི་བཀའ་སློབ་སྩལ། བགྲོ་གླེང་མཇུག་སྡོམ་གནང་ཁར་ཨ་རིའི་གདོད་མའི་མི་རིགས་སྐུ་ཞབས་ནེ་ནོ་ཝ་ Nainoa Thompson ལགས་ཀྱིས་༸གོང་ས་མཆོག་ལ་ཤིང་ལོའི་ཕྲེང་བ་ཞིག་ཕྱག་རྟགས་སུ་ཕུལ་བ་དང་སྦྲགས། ཁོང་གི་ཕྱག་རོགས་རྣམས་པས་༸གོང་ས་མཆོག་ལ་བསྟོད་གླུ་ཕུལ་བའི་ལམ་ནས་དགའ་བསུའི་རྣམ་པ་ཤུགས་ཆེ་བསྟན་ཡོད།།