༢༠༡༥ ཟླ་ ༧ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༧ ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་དུས་བབ་ Time གསར་ཤོག ཅེས་འཛམ་གླིང་ཁྱོན་དུ་ཧ་ཅང་གྲགས་ཆེ་བའི་གསར་ཤོག་གི་གསར་འགོད་པ་ལྕམ་ཨེ་ལེ་ཛེ་བྷེ་ཏི་ཌི་ཡ་སི་ Elizabeth Dias ལགས་ཀྱིས་ཆེད་དོན་དྲི་བར་བཀའ་ལན་སྩལ། སྐབས་དེར་གསར་འགོད་པས་༸གོང་ས་མཆོག་ལ་འཇིག་རྟེན་ཁམས་སྣ་མང་ཡོད་པའི་ཚོད་དཔག་བྱེད་བཞིན་པ་དེར་དགོངས་ཚུལ་ཇི་ཡོད་སྐོར་གྱི་དྲི་བ་ཞུས་པར་༸གོང་ས་མཆོག་གིས་ནང་པའི་གཞུང་ལུགས་ནང་འགྲོ་བ་སོ་སོའི་ལས་ཀྱི་སྣ་མིན་ཡོད་པའི་དབང་གིས་འཇིག་རྟེན་ཁམས་འདྲ་མིན་ནང་སྐྱེ་བ་ལེན་བཞིན་ཡོད་པ་དང་། འཇིག་རྟེན་ཁམས་དེ་དག་ས་ཆུ་མེ་རླུང་ནམ་མཁའ་བཅས་འབྱུང་བ་ལྔ་ལས་སྐྱེས་པ་དང་འཇིགས་སྐབས་སུ་ས་ཆུ་ལ་ཐིམས། ཆུ་མེ་ལ་ཐིམས། མེ་རླུང་ལ་ཐིམས། རླུང་ནམ་མཁར་ཐིམས་པ་སོགས་རིམ་བཞིན་འཇིགས་ནས་སླར་ཡང་སྐྱེ་བཞིན་ཡོད་སྐོར་དང་། འཇིག་རྟེན་ཁམས་ཆགས་འཇིགས་ཟེར་བ་དེ་ལོ་བཅུ་གྲངས་ནང་དང་བརྒྱ་ཕྲག་ནང་མི་ཡོང་བར་བསྐལ་བ་ནས་བསྐལ་བའི་བར་ཡིན་སྟབས། མིའི་ཚེ་ཚད་ལྟ་བུ་ནི་དུས་ཡུན་ཧ་ཅང་ཐུང་ངུ་ཞིག་ཡིན་སྐོར་བཀའ་ལན་སྩལ་བ་དང་སྦྲགས། མགོན་པོ་ཀླུ་སྒྲུབ་ཀྱིས་སྲོལ་གཏོད་པའི་དབུ་མའི་ལྟ་གྲུབ་དང་དེང་སྐབས་དངོས་ཁམས་རིག་པའི་ལྟ་གྲུབ་ཀྱི་ཚད་མཐོ་ཤོས་ཀོན་ཊོམ་ཕི་སིག་ quantum physics ཅེས་པའི་གཞུང་ལུགས་གཉིས་ཀྱི་གྲུབ་དོན་སྐོར་བཀའ་སྩལ།
སྐབས་དེར་༸གོང་ས་མཆོག་གིས་ཚན་རིག་པ་ཚོས་ཀོན་ཊོམ་རྣམ་གཞག་ནང་། གཟུགས་ཀྱི་རྩོམ་གཞི་རྡུལ་ཕྲན་དེ་དག་ཆ་ཕྱེ་ནས་བལྟ་སྐབས་རང་ངོས་སམ་རང་ཚུགས་ཐུབ་པའི་རྩོམ་གཞི་ཞིག་མེད་པ་བརྙེས་པ་དེས་ཉོན་མོངས་པའི་བློ་ཆུང་དུ་གཏོང་རྒྱུར་ཕན་ཐོག་བྱུང་ཡོད་དམ་སྙམ་པའི་དགོངས་ཚུལ་ཡོད་སྐོར་བཀའ་སྩལ། དེ་རྗེས་གསར་འགོད་པས་༸གོང་ས་མཆོག་གི་ཐུགས་རེ་ཆེན་པོ་མཛད་བཞིན་ཡོད་ཀྱང་། བོད་ནང་གི་དངོས་ཡོད་གནས་སྟངས་དཀའ་ངལ་ཧ་ཅང་ཡོད་སྟབས། དེ་གཉིས་དབར་གར་ཁྱད་ཇེ་ཆེར་འགྲོ་བཞིན་པ་གསར་འགོད་པས་མཐོང་བཞིན་ཡོད་སྟབས་བོད་མིའི་སྒྲིག་འཛུགས་ཀྱིས་ལས་འགུལ་སྤེལ་བ་དེར་ནུས་པ་འདེངས་ངེས་ཤིག་ཡོད་པ་གཟིགས་ཀྱི་ཡོད་མེད་སྐོར་གྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། བོད་མིའི་སྒྲིག་འཛུགས་ཀྱི་ལས་འགན་ངོ་མ་དེ་བཙན་བྱོལ་བོད་མིར་གཟིགས་རྟོགས་གནང་རྒྱུ་དང་། བོད་པའི་རིག་གནས་སྲུང་སྐྱོབ་གནང་རྒྱུ་དེ་རེད། སྤྱིར་དེང་སྐབས་རྒྱ་ནག་གཞུང་གི་དམ་བསྒྲགས་ཡོད་མིན་ལ་མ་ལྟོས་པར་བོད་ནང་དུ་ཕྱི་ནས་གནས་ཚུལ་འབྱོར་བཞིན་ཡོད་པ་ལྟ་བུ་འདུག ལོ་ཤས་གོང་ངོས་ཀྱིས་རྒྱ་གར་དུ་ཆོས་འབྲེལ་འདུ་ཚོགས་ཆེ་བའི་སྐབས་ཤིག་ལ་བོད་ནང་དུ་དུད་འགྲོའི་ལྤགས་རིགས་གྱོན་ནས་རྒྱན་ཆ་ཧ་ཅང་མཆོར་པོ་བཏགས་པ་སོགས་བླུན་པོའི་བྱ་སྤྱོད་དེར་སྐྱོན་བརྗོད་དང་སྦྲགས། དོན་དམ་གྱི་རྒྱན་ཆ་དགོས་ན་ནང་གི་ཤེས་ཡོན་སློབ་སྦྱོང་ལ་སྦྱངས་བརྩོན་བྱེད་དགོས་པའི་རེ་འདུན་བཏོན་པ་ཡིན། དེ་རྗེས་མི་རིང་བར་བོད་ནང་གི་གཞིས་ལུས་བོད་མི་ཚོས་ལྤགས་རིགས་ཡོད་དོ་ཅོག་མེར་སྲེག་བཏང་བའི་གནས་ཚུལ་བྱུང་ཡོད། ཅེས་བཀའ་ལན་སྩལ།
དེ་རྗེས་༸གོང་ས་མཆོག་གིས་གོ་ལའི་བྱམས་བརྩེའི་ལྷན་ཚོགས་ Global Compassion Summit ཉིན་གཉིས་པའི་ཐོག་ཆིབས་སྒྱུར་བསྐྱངས་ནས་བགྲོ་གླེང་ལྷན་ཚོགས་ཐོག་བཀའ་སློབ་སྩལ། སྐབས་དེར་ལས་རིམ་གཙོ་སྐྱོང་བ་ལྕམ་ཨན་ཀ་རེ་ Ann Curry ཡིན་འདུག་པ་དང་༸གོང་ས་མཆོག་གིས་སྐབས་དེར་ཁོར་ཡུག་སྲུང་སྐྱོབ་སྐོར་མང་ཚོགས་ ༦༠༠༠ བརྒལ་བར་བཀའ་སློབ་སྩལ་དོན། ང་ཚོས་འབད་བརྩོན་བྱེད་དགོས། འབད་བརྩོན་བྱས་ནས་ལམ་ལྷོང་མ་བྱུང་ནའང་བློ་འགྱོད་ཡོང་གི་མ་རེད། གོ་ལའི་ཁོར་ཡུག་སྲུང་སྐྱོབ་བྱ་རྒྱུ་དེ་ང་ཚོའི་འཆི་གསོན་གྱི་གནས་ཚུལ་ཞིག་ཆགས་ཡོད། ངོས་ཀྱི་གྲོགས་པོ་ཞིག་གིས་དེ་སྔ་སུ་ཝི་ཌེན་རྒྱལ་ས་སི་ཊོཀ་ཧོམ་ནང་དུ་རྒྱུག་ཆུ་ཞིག་ཡོད་པ་དེའི་ནང་བཟོ་གྲྭའི་འབགས་བཙོག་སོགས་ལ་བརྟེན་ནས་བར་སྐབས་ཤིག་ལ་རྒྱུག་ཆུ་དེའི་ནང་ཉ་གཅིག་ཀྱང་མཐོང་རྒྱུ་མེད་ཀྱང་། ཕྱིས་སུ་འབགས་བཙོག་དེ་དག་བཀག་འགོག་བྱས་རྗེས་སུ་རྒྱུག་ཆུ་སྔར་བཞིན་གཙང་མ་ཆགས་ནས་ཉ་མང་པོ་ཡོད་པ་གསུངས་མྱོང་། གོ་ལ་སྤྱི་ཡོངས་བལྟ་རྟོགས་བྱ་རྒྱུ་དེ་སོ་སོའི་ནང་ལ་གཅེས་སྐྱོང་བྱས་པ་ལྟ་བུ་རེད། དེ་བཞིན་དབུལ་ཕྱུག་དབར་ཁྱད་ཇེ་ཆེར་འགྲོ་བཞིན་པའི་གནས་སྟངས་ལ་མཚོན་ན། དབུལ་ཕྱུག་བར་ཁྱད་ཆུང་དུ་གཏོང་དགོས་ན་སྐྱོ་པོ་ཉམ་ཐག་མི་མང་ཚོའི་འཚོ་བའི་གནས་སྟངས་ཇེ་བཟང་དུ་གཏོང་དགོས། ཞེས་སོགས་བཀའ་སློབ་སྩལ།
གཞན་ཡང་སྐབས་དེར་རྒྱ་གར་བ་སྐུ་ཞབས་ཝིར་བྷདྲན་རཱ་མ་ན་ཐན་ Dr Veerabhadran Ramanathan ལགས་ཀྱིས་འབྱུང་འགྱུར་ལོ་ ༣༠ ནང་གོ་ལའི་གནམ་གཤིས་འགྱུར་ལྡོག་གི་ཤུགས་ཚད་ཧ་ཅང་ཆེ་བས་མི་ཚང་མས་ཚོར་ཐུབ་པ་ཞིག་ཡོང་ངེས་པ་དང་། ད་ལྟའི་འཆར་འཛམ་གླིང་མི་འབོར་ཐེར་འབུམ་གཅིག་ཙམ་གྱིས་འཛམ་གླིང་གི་རང་བྱུང་ཐོན་སྐྱེས་ནུས་ཤུགས་བརྒྱ་ཆ་ ༥༠ བཀོལ་སྤྱོད་བྱེད་བཞིན་ཡོད་སྐོར་དང་། སྤྱིར་དེང་སྐབས་འཕྲུལ་རིག་ལག་སྩལ་ཐོག་ནས་གོ་ལའི་གནམ་གཤིས་འགྱུར་ལྡོག་གི་དཀའ་ངལ་དེ་དག་སེལ་ཐུབ་བཞིན་ཡོད་ཀྱང་། དེ་འདྲ་ཞིག་ཡོང་བར་མིའི་ཁོར་ཡུག་ཐོག་བསམ་བློ་གཏོང་ཕྱོགས་དང་འདུ་ཤེས་འཛིན་སྟངས་ཐོག་འགྱུར་བཅོས་གཏོང་ཐུབ་པ་ཞིག་དགོས། གོ་ལའི་གནམ་གཤིས་ཇེ་བཟང་དུ་གཏོང་ཆེད་སྲིད་བྱུས་ཤིག་ལག་བསྟར་བྱས་པ་ཡིན་ན། ད་ལྟ་འཛམ་གླིང་ཐོན་སྐྱེས་བརྒྱ་ཆ་ ༥༠ བཀོལ་སྤྱོད་བྱེད་མཁན་མི་འབོར་ཐེར་འབུམ་གཅིག་ཡོད་པ་རྣམས་ལ་མི་རེར་ཨ་སྒོར་ ༤༥༠ གྱོང་གུན་རག་རྒྱུ་རེད། ཅེས་གསུངས།
གཞན་ཡང་བགྲོ་གླེང་སྐབས་དེར་ལས་རིམ་གཙོ་སྐྱོང་བ་ལྕམ་ཨན་ཀ་རེ་ལགས་ཀྱིས་༸གོང་ས་མཆོག་ལ་གོ་ལའི་གནམ་གཤིས་ལ་བཟང་ཕྱོགས་ཀྱི་འགྱུར་བ་གཏོང་ཆེད་ཆབ་སྲིད་པ་ཚོར་བརྒྱུད་སྐུལ་ཇི་ལྟར་གནང་དགོས་མིན་ཐོག་ལམ་སྟོན་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ང་ཚོའི་བསམ་བློ་གཏོང་སྟངས་དང་ད་ལྟའི་དངོས་ཡོད་གནས་སྟངས་གཉིས་མི་མཐུན་པ་ཆགས་ནས་དེ་སྔ་ཌེན་མཀ་རྒྱལ་ས་ཀོ་ཕེན་ཧེ་གན་དུ་གོ་ལའི་གནམ་གཤིས་འགྱུར་ལྡོག་སྐོར་རྒྱལ་སྤྱིའི་ལྷན་ཚོགས་ Copenhagen summit ཚོགས་སྐབས་གོ་ལ་སྤྱིའི་དོན་དག་ལས་རྒྱལ་ཁབ་ཀྱི་དོན་དག་གཙིགས་ཆེར་འཛིན་ཡོད། རྒྱུ་མཚན་གཅིག་ནི་དཔལ་འབྱོར་འཛུགས་བསྐྲུན་གྱི་བསམ་བློའི་ཐོག་ནས་ཡོང་བཞིན་ཡོད། མི་ཚེའི་དགོས་འདུན་གཙོ་བོ་དཔལ་འབྱོར་ཡར་རྒྱས་གཏོང་རྒྱུ་ཡིན་པའི་འདུ་ཤེས་དེ་ལ་བརྟེན་ནས་ཕྱོགས་ཡོངས་ཀྱི་གནས་ཚུལ་མཐོང་མི་ཐུབ།
དེར་བརྟེན་ང་ཚོས་ཕྱོགས་ཡོངས་ཀྱི་གནས་ཚུལ་ལ་ལྟ་ཐུབ་དགོས། དེ་འདྲ་ཡོང་བར་ང་ཚོའི་ཤེས་ཡོན་གྱི་ལམ་ལུགས་ནང་ནང་གི་རིན་ཐང་གོང་མཐོར་གཏོང་ཆེད་གཤིས་རྒྱུད་དང་འབྲེལ་བའི་བཟང་པོའི་བསླབ་བྱ་སོགས་སློབ་དེབ་ནང་བཞག་ནས་ཕྲུ་གུ་ཆུང་དུས་སྐབས་ནས་གཞན་གྱི་བདེ་སྡུག་ལ་བསམ་བློ་གཏོང་ཐུབ་མཁན་ཞིག་དང་། གཞན་ལ་བྱམས་པ་དང་བརྩེ་བ་སོགས་ནང་གི་རིན་ཐང་གོང་མཐོར་གཏོང་རྒྱུའི་ཐད་སློབ་སྦྱོང་སྤྲོད་དགོས། ཞེས་བཀའ་ལན་སྩལ། མཐར་རྒྱ་མཚོའི་སྐོར་ཉམས་ཞིབ་པ་དང་ཚན་རིག་པ་སྐུ་ཞབས་རཱ་མ་ན་ཐན་ Dr Ramanathan ལགས་དང་འབུམ་རམ་པ་མངྐ་ Dr Munk གཉིས་ཀྱིས་༸གོང་ས་མཆོག་འདི་ལོར་དགུང་གྲངས་ ༨༠ ཕེབས་པའི་སྐུའི་འཁྲུངས་སྐར་དུས་ཆེན་ཉིན་འཚམས་འདྲི་ཞུ་ཆེད་ཕྱག་རྟགས་ཤིག་འབུལ་ལམ་ཞུས། ཕྱག་རྟགས་དེ་ནི་རྒྱ་མཚོའི་ནང་སྲོག་ཆགས་རིགས་གསར་པ་ཞིག་གསར་བརྙེད་བྱུང་བའི་པར་ཞིག་ཡིན་པ་དང་། སྲོག་ཆགས་དེའི་མིང་དུ་ཚན་རིག་པ་གཉིས་ཀྱིས་སིར་སོ་ཏཱ་ལའི་བླ་མ་ཡི། Sirsoe dalailamai ཞེས་མིང་བཏགས་འདུག སྲོག་ཆགས་དེས་ཁོར་ཡུག་ལ་གནོད་ལས་ཕན་མང་བ་ཐོགས་བཞིན་ཡོད་འདུག
བགྲོ་གླེང་གྲུབ་མཚམས་ཉིན་དགུང་ལྗགས་སྨིན་རྒྱས་བཞེས་མཛད།
ལྗགས་སྨིན་གྲུབ་བསྟུན་ཨ་རིའི་གསར་འགྱུར་ལས་རིམ་གཙོ་སྐྱོང་བ་གྲགས་ཆེན་སྐུ་ཞབས་ལེ་རི་ཀིངྒ་Larry King ལགས་ཀྱིས་༸གོང་ས་མཆོག་ལ་དྲི་བ་ཕུལ་བ་རྣམས་ལ་བཀའ་ལན་ཞིབ་ཕྲ་སྩལ།
