༢༠༡༥ ཟླ་ ༦ ཚེས་ ༣༠ རེས་གཟའ་མིག་དམར།

༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༩ ཉིན་ཡུ་རོབ་སྤྱི་མཐུན་ཚོགས་པའི་འཛིན་སྐྱོང་ལྷན་ཁང་གི་ཚོགས་གཙོ་སྐུ་ཞབས་ཌོ་ནལ་ཊ་སི་ Donald Tusk མཆོག་གིས་སྦེལ་ཇམ་གྱི་རྒྱལ་ས་བྷར་སེལ་ Brussels དུ་རྒྱ་ནག་གི་སྲིད་བློན་ལི་ཁེ་བྱང་ Li Keqiang དང་རྒྱ་ནག་གི་ཕྱི་སྲིད་བློན་ཆེན་ཝང་ཡི་བཅས་དང་ཐུག་འཕྲད་གནང་སྐབས། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་གྲོས་མོལ་བསྐྱར་འཛུགས་གནང་དགོས་པའི་རེ་འདུན་ཤུགས་ཆེ་གནང་དོན། བོད་དང་ཡུ་གུར་གཙོ་བོར་གྱུར་བའི་རྒྱ་ནག་གི་གྲངས་ཉུང་མི་རིགས་རྣམས་ཀྱི་སྨྲ་བརྗོད་དང་འདུ་འཛོམས་རང་དབང་གི་གནས་སྟངས་ཐོག་ང་ཚོར་སེམས་ཚབས་ཧ་ཅང་ཡོད། གནས་སྟངས་དེར་གཞིགས་ནས་ངས་རྒྱ་ནག་གཞུང་ལ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་དོན་སྙིང་ལྡན་པའི་གྲོས་མོལ་བསྐྱར་འཛུགས་ཡོང་བའི་རེ་འདུན་ཤུགས་ཆེ་ཞུ་རྒྱུ་ཡིན། ཞེས་གསུངས།།