༢༠༡༥ ཟླ་ ༦ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་ས་ནས་ཨིན་ཡུལ་དུ་ཆིབས་སྒྱུར་བསྐྱངས་ནས་ཨིན་ཡུལ་གནམ་ཐང་དུ་༸ཞབས་སོར་འཁོད་བསྟུན། ཨིན་ཡུལ་དུ་རྟེན་གཞི་བྱས་པའི་རྒྱ་གར་གཞུང་ཚབ་ཀྱི་ཆེས་མཐོའི་སྣེ་ཤན་པ་སྐུ་ཞབས་ཨེམ་པི་སིངྒ་ Shri MP Singh མཆོག་དང་བལ་པོའི་ནང་པའི་མཐུན་ཚོགས་ཀྱི་ཚོགས་གཙོ་ཀ་ཛི་ཤར་པ་ལགས་ Mr Kaji Sherpa བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། གཞན་ཡང་སྐབས་དེར་༸གོང་ས་མཆོག་གིས་ཨིན་ཌི་ཡ་ཊུ་ཌེ་ India Today ཞེས་རྒྱ་གར་གསར་འགྱུར་ལས་ཁང་གི་བུད་མེད་གསར་འགོད་པ་ཇོ་ཏི་མལ་ཧོ་ཏྲ་ Ms Jyoti Malhotra ལགས་ཀྱི་དྲི་བར་བཀའ་ལན་སྩལ། དེ་རྗེས་གནམ་ཐང་ནས་ཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་གདན་ཞུ་གོ་སྒྲིག་ཚོགས་ཆུང་ཨིན་ཡུལ་བལ་པོའི་ནང་པའི་མཐུན་ཚོགས་ཀྱི་ཚོགས་མི་སོགས་ཀྱིས་ལག་ཏུ་དཀར་གཙང་མཇལ་དར་སོགས་ཐོགས་ནས་ཕེབས་བསུ་གཟབ་རྒྱས་ཞུས་འདུག དེ་རྗེས་ཨེ་པི་ AP ཞེས་པའི་རྒྱལ་སྤྱིའི་གསར་འགོད་ལྷན་ཁང་གྲགས་ཆེའི་གསར་འགོད་པ་ཞིག་གིས་དྲི་བར་༸གོང་ས་མཆོག་གིས་བཀའ་ལན་སྩལ་འདུག
ཨེ་པི་གསར་འགོད་པའི་དྲི་བར་བཀའ་ལན་སྩོལ་བཞིན་པ།
སྐབས་དེར་གསར་འགོད་པས་ཐོག་མར་༸གོང་ས་མཆོག་གྷ་ལ་སི་ཊོན་བྷ་རིའི་རོལ་དབྱངས་འདུ་འཛོམས་དེར་ཆིབས་སྒྱུར་བསྐྱངས་དགོས་པའི་རྒྱུ་མཚན་གང་ཡིན་སྐོར་གྱི་དྲི་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། གལ་ཏེ་ངོས་ལ་ཤོག ཅེས་མགྲོན་འབོད་གནང་མཁན་བྱུང་ན་ངོས་རང་དེར་དགའ་མོས་ཐོག་ནས་མོས་མཐུན་བྱེད་བཞིན་ཡོད། ངོས་རང་ཡང་འཛམ་གླིང་མི་འབོར་ཐེར་འབུམ་བདུན་གྱི་ཆ་ཤས་འགྲོ་བ་མི་གཅིག་ཆགས་ཡོད། འགྲོ་བ་མིའི་རིགས་གཞན་གྱི་བདེ་སྡུག་ལ་བསམ་བློ་བཏང་ནས་སེམས་ཁུར་བླངས་རྒྱུ་ང་ཚོ་ཚང་མའི་ལས་འགན་ཡིན། ང་ཚོ་ཚང་མ་སྤྱི་ཚོགས་ལ་བརྟེན་པའི་སྲོག་ཆགས་ཤིག་ཡིན་སྟབས་ཕན་ཚུན་བརྟེན་ནས་འཚོ་གནས་བྱེད་དགོས། ངོས་ལ་གོ་སྐབས་ནམ་བྱུང་སྐབས་གནས་སྟངས་འདིའི་སྐོར་གཞན་ལ་གོ་རྟོགས་སྤེལ་ཐབས་བྱེད་བཞིན་ཡོད། གཞི་རྩའི་ང་ཚོ་ཚང་མ་ལུས་སེམས་དང་། སེམས་ཚོར་གང་གི་ཆ་ནས་འགྲོ་བ་མི་རིགས་གཅིག་གྱུར་ཡིན། ངོས་ལ་ཉམས་མྱོང་དེ་འདྲ་ཞིག་བྱུང་། ཉམས་མྱོང་དེས་གཞན་ལ་ཕན་ཐོགས་ཡོང་སྲིད། ཅེས་བཀའ་ལན་སྩལ། དེ་རྗེས་ཐེངས་འདིར་རོལ་དབྱངས་འདུ་འཛོམས་ལ་གཟིགས་རྒྱུ་ཡིན་མིན་སྐོར་གྱི་དྲི་བར་བཀའ་ལན་སྩལ་དོན། ངོས་རང་ནང་པའི་དགེ་སློང་ཞིག་ཡིན་སྟབས་གླུ་གར་སོགས་ལྟད་མོ་ལྟ་མི་ཆོག འོན་ཀྱང་རོལ་ཆའི་སྒྲ་ཐོས་རྒྱུ་རེད། ཅེས་བཀའ་ལན་སྩལ།
དེ་རྗེས་གསར་འགོད་པས་ཐེངས་འདིའི་ཆིབས་སྒྱུར་སྐབས་རྒྱ་ནག་གཞུང་དང་དོལ་རྒྱལ་རྗེས་འབྲང་པས་ངོ་རྒོལ་རྔམ་སྟོན་བྱས་པ་དེར་བཀའ་ལན་ཇི་ཡོད་སྐོར་གྱི་དྲི་བར་བཀའ་ལན་སྩལ་དོན། རྒྱ་ནག་གཞུང་གིས་སྐྱོན་བརྗོད་བྱ་རྒྱུ་དེ་འཆར་ཅན་གྱི་བྱེད་སྒོ་ལྟ་བུ་རེད། རྒྱ་ནག་གི་འགོ་ཁྲིད་མཁྲེགས་འཛིན་པ་ཚོས་ངོས་ལ་བདུད་རེད། ཅེས་སྐྱོན་བརྗོད་བྱེད་བཞིན་ཡོད་སྟབས་ངོས་ཀྱིས་བོད་རང་བཙན་རྩོད་ནས་ཁ་བྲལ་གྱི་ལས་འགུལ་མ་སྤེལ་ནའང་ཁོ་པ་ཚོས་ངོ་རྒོལ་བྱེད་བཞིན་ཡོད། ངོས་ཀྱིས་གཙོ་བོ་བོད་ཀྱི་ཐུན་མིན་ཆོས་དང་རིག་གཞུང་བདག་གཅེས་རྒྱུན་འཛིན་བྱ་ཐབས་བྱེད་བཞིན་ཡོད། ཅེས་བཀའ་ལན་སྩལ། དེ་རྗེས་༸གོང་ས་མཆོག་གིས་དོལ་རྒྱལ་སྐོར་བཀའ་ལན་སྩལ་དོན། དོལ་རྒྱལ་སྐོར་གྱི་རྙོག་གྲ་འདི་བྱུང་ནས་མི་ལོ་ ༤༠༠ ཙམ་ཕྱིན་ཡོད། ཕྱི་ལོ་ལྔ་བཅུ་ང་གྲངས་དང་བདུན་ཅུ་དོན་གྲངས་ནང་ངོས་ནས་ཀྱང་མ་ཤེས་པའི་དབང་གིས་དོལ་རྒྱལ་བསྟན་པ་ཡིན། དེ་ནས་རིམ་བཞིན་དེར་རྙོག་གྲ་ཞིག་ཡོད་པ་ཤེས་རྟོགས་བྱུང་ནས་ངོས་ཀྱིས་ཉམས་ཞིབ་བྱས་པ་ཡིན། དོལ་རྒྱལ་ཐོག་མར་༸གོང་ས་ལྔ་པ་ཆེན་པོའི་སྐབས་བྱུང་འདུག སྐབས་དེར་༸གོང་ས་ལྔ་པས་དོལ་རྒྱལ་དེ་བསྟན་དང་འགྲོ་བ་ལ་འཚེ་བ་བྱེད་མཁན་གྱི་རྒྱལ་འགོང་ཞིག་ལ་བརྩིས་ཡོད། སྤྱིར་སུ་ལ་དད་པ་བྱེད་མིན་མི་སོ་སོའི་སྒེར་གྱི་གནས་ཚུལ་རེད། འོན་ཀྱང་སྐྱོན་མཐོང་ནས་དེར་གསལ་བཤད་བྱ་རྒྱུ་ངོས་ཀྱི་ལས་འགན་རེད། དེར་བརྟེན་ཁོ་པ་ཚོས་ངོས་ལ་ཁོང་ཁྲོ་ཆེན་པོས་ངོ་རྒོལ་རྔམ་སྟོན་བྱེད་བཞིན་ཡོད་པ་ནི་སྨྲ་བརྗོད་རང་དབང་རེད། ཅེས་བཀའ་ལན་སྩལ། ཕྱི་ཉིན་དེར་༸གོང་ས་མཆོག་གིས་གྷ་ལ་སི་ཊོན་རོལ་དབྱངས་འདུ་འཛོམས་སྐབས་ Glastonbury Festival མང་ཚོགས་ལ་བཀའ་སློབ་སྩལ་ཡོད་པ་བཅས།།
