༢༠༡༠ ཕྱི་ཟླ་ ༤ ཚེས་ ༨ རེས་གཟའ་ཕུར་བུ།

༸གོང་ས་༸སྐྱབས་མགོན་ཆེན་པོ་མཆོག་དང་སོལ་ཝེ་ནི་ཡའི་བློན་ཆེན་མཁས་དབང་བོ་སི་ཊ་ཇན་ཛི་ཀ་སི་ Dr.Bostjan Zeks

༄༅། །ཕྱི་ལོ་ ༢༠༡༠ ཟླ་ ༤ ཚེས་ ༧ གྱི་སྔ་དྲོ་སོལ་ཝེ་ནི་ཡའི་བློན་ཆེན་མཁས་དབང་བོ་སི་ཊ་ཇན་ཛི་ཀ་སི་ Dr.Bostjan Zeks གྱིས་སོལ་ཝི་ནི་ཡའི་སྲིད་བློན་མཆོག་གི་ཚབ་ཞུས་ནས་༸གོང་ས་༸སྐྱབས་མགོན་ཆེན་པོ་མཆོག་གདན་ཞུ་དང་སྦྲགས་མཇལ་འཕྲད་གནང་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་སུད་སིར་ཆིབས་སྒྱུར་གྱི་སྔོན་སོལ་ཝི་ནི་ཡའི་ཁ་ཆེ་ཚོགས་པའི་འགན་འཛིན་ Mufti dr. Nedzad Grabus དང་ལྷན་མཇལ་འཕྲད་ཀྱང་མཛད་ཡོད། ༸གོང་ས་༸སྐྱབས་མགོན་ཆེན་པོ་མཆོག་གི་སོལ་ཝ་ིནི་ཡའི་མཛད་འཆར་གྱི་ཉིན་མཐའ་མར་སོལ་ི་ནི་ཡའི་རྒྱལ་ཡོངས་འཁྲབ་སྟོན་ཁང་ (Slovenian National Theatre) དུ། བྱམས་བརྩེ་ནི་བདེ་སྐྱིད་བསྐྲུན་ཐབས་ཤིག་ཡིན། (Compassion: Art of Happiness) ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བཀའ་དྲིན་སྩལ་ཡོད། དེ་ཡང་ཡུ་རོབ་ཤེས་ཡོན་དང་སྒྱུ་རྩལ་བསྟི་ནས་ཁང་དང་། (European Academy of Science & Art) མ་རི་བྷོོར་གཙུག་ལག་སློབ་གཉེར་ཁང་བཅས་ (Maribor University) ཟུང་འབྲེལ་ཐོག་བཀའ་སློབ་གོ་སྒྲིག་ཞུས་ཡོད་པ་མ་ཟད། ཚོགས་འདུའི་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་དེ་ས་གནས་བརྙན་འཕྲིན་ནང་ཐད་ཀར་རྒྱང་སྲིང་ཡང་ཞུས་ཡོད། སྐབས་དེར་མགོན་པོ་གང་ཉིད་མཆོག་གིས་བཀའ་སྩལ་དོན། བྱམས་བརྩེ་ནི་གཞན་ཉམ་ཐག་པའི་གནས་སྟངས་ལ་ཡ་ང་བའི་བསམ་པ་ཞིག་མིན། བྱམས་བརྩེའི་ཉམས་ལེན་དེས་གཞན་ལ་ཕན་པ་ཙམ་མ་ཟད། སོ་སོ་སྒེར་ལའང་ཕན་ཐོགས་ཡོད། གཞན་གྱི་བདེ་དོན་ཆེད་བསམ་བློ་མང་ཙམ་གཏོང་རྒྱུ་དེ་གལ་ཆེ། དེའི་ཐོག་ནས་སོ་སོའི་མི་ཚེའི་ནང་བདེ་སྐྱིད་ཡོང་གི་ཡོད་ཅེས་བཀའ་སྩལ། བཀའ་སློབ་གྲུབ་མཚམས་རྒྱུད་སྟོད་གྲྭ་ཚང་གི་དགེ་འདུན་པ་ཁག་གཅིག་གིས་བཞེངས་པའི་རྡུལ་ཚོན་དཀྱིལ་འཁོར་ལ་མགོན་པོ་གང་ཉིད་མཆོག་གིས་རབ་གནས་མཛད་ཡོད་པ་བཅས།།