༢༠༡༥ ཟླ་ ༦ ཚེས་ ༢༢ རེས་གཟའ་ཟླ་བ།

༄༅། །ཐེ་ཝན་རྒྱལ་ས་ཐེ་པེའི་ནང་རྟེན་གཞི་བྱས་པའི་དགའ་ལྡན་ཤར་རྩེ་གྲྭ་ཚང་གིས་གོ་སྒྲིག་འོག་ཐེ་ཝན་རྒྱལ་སྤྱིའི་ཚོགས་ཁང་ཆེན་མོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་མཛད་སྒོ་གཟབ་རྒྱས་ངང་སྲུང་བརྩི་ཞུས་འདུག སྐབས་དེར་ཐེ་ཝན་གཙོ་བོར་གྱུར་བའི་བོད་རིགས་སོགས་ཁྱོན་མི་གྲངས་ ༣༥༠༠ བརྒལ་བས་མཛད་སྒོར་མཉམ་ཞུགས་གནང་སྐབས་བརྙན་འཕྲིན་བརྒྱུད་ནས་༸གོང་ས་མཆོག་གིས་དད་ལྡན་མང་ཚོགས་རྣམས་ལ་བླང་དོར་བཀའ་སློབ་སྩལ་འདུག སྤྱིར་མཛད་སྒོ་ཆུ་ཚོད་ ༤ རིང་ཚོགས་པ་དང་།

སྐབས་དེར་གཞས་སྣ་འཁྲབ་སྟོན་འདྲ་མིན་དང་། དེ་བཞིན་བོད་ཀྱི་ཐུན་མིན་རིག་གཞུང་ཁག་གཅིག་འགྲེམས་སྟོན་ཡང་གནང་འདུག གཞན་ཡང་མཛད་སྒོའི་ཐོག་དགའ་ལྡན་ཤར་རྩེ་གྲྭ་ཚང་གི་ཐེ་པེའི་གྲོང་ཁྱེར་སྲིད་གཞུང་ལ་མེ་གསོད་རླངས་འཁོར་ཞིག་༸གོང་ས་མཆོག་གི་མཚན་ཐོག་ནས་ཞལ་འདེབས་སུ་ཕུལ་འདུག དེ་ཡང་སྤྱིར་རེས་གཟའ་སྤེན་པའི་ཉིན་ཏེ་མཛད་སྒོའི་སྔོན་གྱི་ཉིན་མོར་ཐེ་ཝན་བོད་རང་དབང་སློབ་ཕྲུག་ཚོགས་པས་གོ་སྒྲིག་འོག་རྩོམ་ཡིག་འགྲན་བསྡུར་གྱི་ལས་རིམ་ཞིག་གོ་སྒྲིག་ཞུས་ནས་བྱ་ག་གསོལ་རས་གནང་འདུག གོ་སྒྲིག་གནང་ཡུལ་ཐེ་པེའི་ཌེང་རང་དབང་ཐེབས་རྩ་ཁང་ Deng Liberty Foundation དུ་ཡིན་པ་དང་། ཐེབས་རྩ་ཁང་དེ་ཐེ་ཝན་ནང་རང་ལུས་མེར་སྲེག་གནང་མཁན་ནེ་ལོན་ཌེང་གི་དྲན་རྟེན་ Nylon Deng ཆེད་བརྒྱབ་པ་ཞིག་ཡིན་འདུག

སྤྱིར་རྩོམ་ཡིག་འགྲན་བསྡུར་དེ་བོད་མིའི་རང་ལུས་མེར་སྲེག་སྐོར་ཡིན་པ་དང་ཐེངས་དང་པོ་ཆགས་འདུག སྐབས་དེར་སྐུ་ཚབ་དོན་གཅོད་ཟླ་བ་ཚེ་རིང་ལགས་དང་ཌེང་རང་དབང་ཐེབས་རྩ་ཁང་གི་འགན་འཛིན་ལྷན་ཚོགས་ཀྱི་ཚོགས་མི་དང་རྩོམ་པ་པོ་གཅིག་ལྕོགས་ཡིན་པ་སྐུ་ཞབས་ལི་མིངྒ་ཡོང་ Mr Li Minyong ལགས་གཉིས་ཕེབས་ནས། རྩོམ་འགྲན་བསྡུར་ནང་མཉམ་ཞུགས་གནང་མཁན་རྩོམ་པ་པོ་མི་དྲུག་ལ་བྱ་དགའ་གནང་འདུག དེ་ཁོངས་གཅིག་ནི་ཐེ་ཝན་ནང་སློབ་གཉེར་བྱེད་བཞིན་པ་རྒྱ་ནག་སྐམ་ས་ནས་ཡིན་འདུག བྱ་དགའ་ཐོབ་མཁན་དེ་དག་རྩོམ་ཡིག་བརྒྱ་ཕྲག་མང་པོའི་ཁྲོད་ནས་འདེམས་འགྲུག་བྱས་ཡོད།

སྤྱིར་རྩོམ་ཡིག་དེ་དག་ཚིགས་བཅད་དང་ཚིགས་ལྷུག་གཉིས་ནང་ཡོད་ཆོག འོན་ཀྱང་ནང་དོན་བརྗོད་གཞི་གཙོ་བོ་ནི་ཕྱི་ལོ་ ༢༠༠༩ ནས་ད་བར་བོད་ས་ཁྱོན་དུ་བོད་མིས་རང་ལུས་མེར་སྲེག་བཏང་བའི་གནད་དོན་སྐོར་ཡིན་དགོས། སྤྱིར་འདི་ལོའི་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ བཞེས་པའི་སྐུའི་འཁྲུངས་སྐར་དུས་ཆེན་ཁྱད་པར་ཅན་དེ་སྐུ་ཚབ་དོན་ཁང་གིས་གོ་སྒྲིག་འོག་ཕྱི་ཟླ་་༧ ཚེས་ ༥ ཉིན་གོ་སྒྲིག་ཞུ་རྒྱུ་ཡིན་འདུག་པ་དང་། འོན་ཀྱང་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་ལྷན་ཚོགས་ Taiwan International Association of Tibetan Buddhist Dharma ངོས་ནས་༸སྐུའི་གྱ་སྟོན་ཆེད་ཕྱི་ཟླ་ ༧ ཚེས་ ༦ ཉིན་སྨོན་ལམ་གསུང་འདོན་དང་འབྲེལ་བའི་ཆོས་ཕྱོགས་ཀྱི་མཛད་སྒོ་གཟབ་རྒྱས་ཤིག་གོ་སྒྲིག་ཞུ་རྒྱུ་ཡིན་འདུག ལྷག་པར་འདི་ལོའི་ཕྱི་ཟླ་ ༧ ཚེས་ ༤ ཉིན་དབུ་འཛུགས་ཀྱིས་བདུན་ཕྲག་རེར་ཉིན་གསུམ་རིང་ཐེ་པེའི་མི་མང་ཚོགས་ཁང་ Taipei City Government Hall. དུ་༸གོང་ས་མཆོག་གི་མཛད་རྣམ་དང་འབྲེལ་བའི་སྐུ་པར་འགྲེམས་སྟོན་དང་། དེ་བཞིན་བོད་ཀྱི་ཆོས་དང་རིག་གཞུང་སྐོར་གྱི་ངོ་སྤྲོད་སོགས་འགྲེམས་སྟོན་གྱི་ལམ་ནས་གོ་སྒྲིག་ཞུ་རྒྱུ་ཡིན་འདུག པར་རིགས་དེ་དག་ཉི་ཧོང་པ་ཞིག་དང་ཐེ་ཝན། དེ་བཞིན་བོད་རིགས་གཅིག་བཅས་གུསམ་གྱིས་བརྒྱབ་པའི་པར་རིས་ཁག་ཡིན་འདུག