ཕྱི་ལོ་ ༢༠༡༥ ཟླ་ ༦ ཚེས་ ༡༨ ཕུར་བུ།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༡༨ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གོ་སྒྲིག་ཐོག་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པའི་དབུ་ཁྲིད་བླ་ཆེན་དབུས་བླ་སྤྲུལ་མཁན་པོ་དང་སྐུ་ཚབ་འདུས་པའི་ཆོས་ཚོགས་ཐེངས་བཅུ་གཉིས་པ་རྡ་ས་སུརྱ་གསོལ་མགྲོན་ཁང་དུ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྒྲུབ་བརྒྱུད་བསྟན་པའི་མངའ་བདག་སྐྱབས་རྗེ་འབྲུག་ཆེན་རིན་པོ་ཆེ་མཆོག་གི་སྐུ་ཚབ་མཁན་པོ་ངེས་དོན་བསྟན་འཛིན་མཆོག་དང་། སྔ་འགྱུར་བསྟན་པའི་མངའ་བདག་སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གི་སྐུ་ཚབ་སྔ་འགྱུར་བསྟན་པའི་གསལ་བྱེད་ཀ་༔ཐོག་དགེ་རྩེ་རིན་པོ་ཆེ་མཆོག སྒྲུབ་བརྒྱུད་བསྟན་པའི་གསལ་བྱེད་སྐྱབས་རྗེ་སྟག་ལུང་ཞབས་དྲུང་རིན་པོ་ཆེ་མཆོག གཡུང་དྲུང་བོན་གྱི་བསྟན་པའི་མངའ་བདག་སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག འཁོན་རིགས་བསྟན་པའི་གཙུག་རྒྱན་དཔལ་ས་སྐྱ་གོང་མ་རིན་པོ་ཆེ་མཆོག དཔལ་ལྡན་སྲིད་སྐྱོང་བློ་བཟང་སེངྒེ་མཆོག ཆོས་རིགས་བཀའ་བློན་པདྨ་ཆོས་འབྱོར་མཆོག དཔལ་འབྱོར་དང་ཤེས་རིག བདེ་སྲུང་བཅས་ཀྱི་བཀའ་བློན། ཆོས་བརྒྱུད་ཁག་གི་སྐུ་ཚབ། ཆོས་བརྒྱུད་ཁག་གི་སྤྱི་འཐུས་རྒྱུན་ལས། ཆོས་རིག་དྲུང་ཆེ། དམིགས་བསལ་གདན་ཞུས་མ་དགོན་རྟག་བརྟན་ཕུན་ཚོགས་ཆོས་གླིང་གི་མཁན་པོ་དང་སློབ་སྤྱི། འགན་འཛིན། ཟུར་ཉན། གསར་འགོད་པ་དང་འབྲེལ་ཡོད་ལས་བྱེད་སོགས་ཁྱོན་མི་གྲངས་ ༡༠༠ བརྒལ་བའི་དབུས་སུ་དབུ་ཁྲིད་བླ་ཆེན་རྣམ་པ་དང་། དབུ་ཁྲིད་སྐུ་ཚབ། དཔལ་ལྡན་སྲིད་སྐྱོང་བཅས་ནས་ལྷན་ཚོགས་དབུ་འབྱེད་ཀྱི་སྣང་གསལ་མར་མེ་ཞལ་འབྱེད་གནང་གྲུབ་མཚམས་བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་སྲེག་གནང་མཁན་རྣམས་ཀྱིས་མཚོན་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་རྒྱལ་གཅེས་པ་རྣམས་དང་། ཉེ་ཆར་རྒྱ་བལ་བོད་གསུམ་དུ་ས་གཡོམ་གོད་ཆག་ཁྲོད་འདས་གྲོངས་སུ་གྱུར་བ་རྣམས་ཀྱི་ཆེད་མྱ་ངན་གུས་བཏུད་སྐར་མ་གཅིག་རིང་ཞུས་རྗེས་སྐུ་བཅར་རྣམ་རྒྱལ་གྲྭ་ཚང་གི་ལྕོག་གྲྭ་བཞི་ནས་ཤིས་བརྗོད་གསུང་འདོན་གནང་བ་དང་བསྟུན་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས།
དེ་ནས་ཆོས་རིག་བཀའ་བློན་མཆོག་གིས་ཕེབས་བསུ་དང་ཚོགས་འདུའི་ངོ་སྤྲོད་ཀྱི་གསུང་བཤད་དང་། སྲིད་སྐྱོང་མཆོག་གིས་བཀའ་ཤག་གི་གསུང་བཤད་གནང་། དེ་ནས་སྒྲུབ་བརྒྱུད་བསྟན་པའི་མངའ་བདག་སྐྱབས་རྗེ་འབྲུག་ཆེན་རིན་པོ་ཆེ་མཆོག་གི་སྐུ་ཚབ་མཁན་པོ་ངེས་དོན་བསྟན་འཛིན་མཆོག་དང་། སྔ་འགྱུར་བསྟན་པའི་མངའ་བདག་སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གི་སྐུ་ཚབ་སྔ་འགྱུར་བསྟན་པའི་གསལ་བྱེད་ཀ་༔ཐོག་དགེ་རྩེ་རིན་པོ་ཆེ་མཆོག སྒྲུབ་བརྒྱུད་བསྟན་པའི་གསལ་བྱེད་སྐྱབས་རྗེ་སྟག་ལུང་ཞབས་དྲུང་རིན་པོ་ཆེ་མཆོག གཡུང་དྲུང་བོན་གྱི་བསྟན་པའི་མངའ་བདག་སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག འཁོན་རིགས་བསྟན་པའི་གཙུག་རྒྱན་དཔལ་ས་སྐྱ་གོང་མ་རིན་པོ་ཆེ་མཆོག་བཅས་ནས་རིམ་བཞིན་བཀའ་སློབ་གནང་གྲུབ་མཚམས་དཔལ་ས་སྐྱ་གོང་མ་རིན་པོ་ཆེ་མཆོག་གིས་ཆོས་རིག་ལས་ཁུངས་ནས་ཕྱོགས་བསྒྲིགས་གནང་བའི་ཆོས་ཚོགས་ཐེངས་དང་པོ་ནས་བཅུ་གཅིག་བར་གྱི་གྲོས་གཞི་གྲོས་ཆོད་ཁག་དང་།༸གོང་ས་མཆོག་གིས་ཆོས་ཚོགས་ཁག་ཏུ་བསྩལ་བའི་བཀའ་སློབ་ཅེས་དཔེ་དེབ་ཁག་གཉིས་དབུ་འབྱེད་གནང་རྗེས་ཆོས་རིག་དྲུང་ཆེ་རྒྱལ་གླིང་དོན་གྲུབ་རྡོ་རྗེ་ལགས་ཀྱིས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ།།
