༢༠༡༥ ཟླ་ ༦ ཚེས་ ༡༢ རེས་གཟའ་པ་སངས།

༄༅། །ཕྱི་ལོ་ ༢༠༡༥ ཟླ་ ༦ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ Sydney ནང་ཆིབས་སྒྱུར་བསྐྱངས་ནས་བདེ་སྐྱིད་དང་དེའི་རྒྱུ་གང་ཡིན། Happiness & Its Causes ཞེས་པའི་བརྗོད་གཞིའི་ཐོག་ལྷན་ཚོགས་སྐབས་བཀའ་སློབ་སྩལ་འདུག དེ་ཡང་གོང་ཚེས་ཉིན་གྱི་སྔ་དྲོ་ཐོག་མར་༸གོང་ས་མཆོག་གྲོང་ཁྱེར་བྷི་ལུ་མོན་ཊེན་ཞེས་པའི་གསོལ་མགྲོན་ཁང་ནས་གྲོང་ཁྱེར་སི་ཌི་ནིར་ཆིབས་ཞལ་སྒྱུར་སྐབས་དད་ལྡན་མང་ཚོགས་རྣམས་ཀྱིས་ཕེབས་སྐྱེལ་གཟབ་རྒྱས་ཞུས་འདུག དེ་རྗེས་ཆིབས་འགྲོ་བརྒྱུད་སི་ཌི་ནིའི་ལུ་ན་པཀ་ཞེས་པའི་སྐྱེད་མོས་ཚལ་དུ་ Luna Park ༸ཞབས་སོར་འཁོད་བསྟུན། བོད་མིས་གཙོས་དད་ལྡན་མང་ཚོགས་རྣམས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས། དེ་ནས་ལྷན་ཚོགས་ནང་ཆིབས་སྒྱུར་མ་བསྐྱངས་གོང་རྒྱ་གར་གཞུང་ཚབ་ཁང་གི་དོན་གཅོད་སྐུ་ཞབས་སན་ཇེ་སུ་དིར་ Sunjay Sudhir མཆོག་དང་ཁོང་གི་ནང་མི་ལྷན་རྒྱས་ཀྱིས་མཇལ་བཅར་ཞུས།

དེ་རྗེས་མི་གྲངས་ ༡༧༠༠ བརྒལ་བར་བདེ་སྐྱིད་དང་དེའི་རྒྱུ་གང་ཡིན་སྐོར་བཀའ་སློབ་སྩལ། དེ་ཡང་ཐོག་མར་ལས་རིམ་གཙོ་སྐྱོང་བ་སྐུ་ཞབས་རི་ཆར་ཌི་ཕི་ཌི་ལར་ Richard Fidler ལགས་ཀྱིས་མང་ཚོགས་རྣམས་ལ་ངོ་སྤྲོད་ཀྱི་གསུང་བཤད་གནང་བསྟུན། ཁོང་གིས་༸གོང་ས་མཆོག་ལ་ཞི་བདེ་དང་བྱམས་བརྩེ་སོགས་ཀྱི་སྐོར་ལ་དྲི་བ་ཞུས་པ་རྣམས་ལ་བཀའ་ལན་སྩལ། དེ་རྗེས་དབང་ཤེས་དང་ཡིད་ཤེས་ལ་བརྟེན་པའི་བདེ་སྐྱིད་གཉིས་མི་འདྲ་བའི་ཁྱད་པར་དང་ནུས་པ་ཆེ་ཆུང་། དེ་བཞིན་ཚན་རིག་པས་བརྟག་དཔྱད་བྱས་པའི་གྲུབ་དོན་སྐོར་སོགས་ལ་བགྲོ་གླེང་མཛད། ཕྱོགས་མཚུངས་སྐབས་དེར་༸གོང་ས་མཆོག་གིས་དེང་དུས་ཤེས་ཡོན་ལམ་ལུགས་ནང་སེམས་རྒྱུད་དང་འབྲེལ་བའི་རིན་ཐང་ལ་དོ་སྣང་མང་ཙམ་སྤྲོད་དགོས་པའི་བཀའ་སློབ་སྩལ། ལྷན་ཚོགས་ལེགས་གྲུབ་རྗེས་༸གོང་ས་མཆོག་སི་ཌི་ནིའི་གནམ་ཐང་དུ་ཆིབས་སྒྱུར་བསྐྱངས་ནས་ཨོ་སི་ཊོ་ལི་ཡ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་མཛད་པ་མ་ཟད། ཉིན་གུང་ལྗགས་སྨིན་ལྷན་བཞེས་མཛད། སྐབས་དེར་ཡུན་རིང་༸གོང་ས་མཆོག་དང་བོད་དོན་ལ་རྒྱབ་སྐྱོར་གནང་མཁན་སྐུ་ཞབས་བྷིལ་ཁི་རིའུ་ Rev Bill Crews མཆོག་དང་མཇལ་འཕྲད་མཛད་ནས་ཕན་ཚུན་བཀའ་མོལ་མཛད།

དེ་རྗེས་༸གོང་ས་མཆོག་གྲོང་ཁྱེར་བྷི་རི་སི་སྦེན་ Brisbane དུ་ཆིབས་སྒྱུར་བསྐྱངས་ནས་ཁུལ་དེར་༸ཞབས་སོར་འཁོད་སྐབས་ས་གནས་བོད་རིགས་ཚོགས་པའི་ཚོགས་མི་དང་བོད་རིགས་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། ཕྱི་ལོ་ ༢༠༡༥ ཟླ་ ༦ ཚེས་ ༡༡ ཉིན་༸གོང་ས་མཆོག་གིས་ཁུལ་དེར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་རྒྱལ་པོ་ལ་གཏམ་བྱ་བ་དབུ་མ་རིན་ཆེན་ཕྲེང་བའི་བཀའ་ཆོས་དབུ་འཛུགས་མཛད་པ་མ་ཟད། ས་གནས་དེའི་སི་ཊི་ཕན་ཡི་ཤུའི་མཆོད་ཁང་ St Stephen’s Cathedralདུ་ཆོས་ལུགས་མཐུན་སྒྲིལ་གྱི་ལྷན་ཚོགས་ནང་ལྷན་ཞུགས་མཛད། དེ་ཡང་ཐོག་མར་༸གོང་ས་མཆོག་གིས་ཁུལ་དེར་གནས་སྡོད་བོད་རིགས་དང་སོག་རིགས། འབྲུག་པ་བཅས་ཁྱོན་མི་གྲངས་ ༣༠༠ ཙམ་ལ་བཀའ་སློབ་སྩལ།

དེ་རྗེས་གོང་བརྗོད་ཡི་ཤུའི་མཆོད་ཁང་དུ་ཆིབས་སྒྱུར་བསྐྱངས་ནས་༸ཞབས་སོར་འཁོད་སྐབས་ཡི་ཤུའི་མཆོད་དཔོན་སྐུ་ཞབས་མཀ་ཀོ་ལི་རི་ཇི་ Reverend Mark Coleridge མཆོག་གིས་ཕེབས་བསུ་གཟབ་རྒྱས་ཞུས། དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། སྤྱིར་ང་ཚོ་ཚང་མ་སྐྱེ་ལུགས་གཅིག་པ་ཡིན་པ་མ་ཟད། མཐར་འཆི་ལུགས་ཀྱང་གཅིག་པ་ཡིན། དེ་རིང་འདིར་འཛམ་གླིང་ཆོས་ལུགས་གཙོ་ཆེ་བ་ཚང་མའི་སྐུ་ཚབ་འཛོམས་ཡོད་པ་ལྟ་བུ་འདུག ངོས་ཀྱིས་འགན་འཁུར་གཉིས་པ་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་དམིགས་ཡུལ་དང་མཐུན་པ་ཞིག་བྱུང་། ཞེས་སོགས་ཀྱི་བཀའ་སློབ་སྩལ།