༢༠༡༥ ཟླ་ ༦ ཚེས་ ༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༤ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡའི་རྒྱལ་ས་སེཌ་ཎི་རྒྱལ་སྤྱིའི་གནམ་ཐང་དུ་༸ཞབས་སོར་བདེ་བར་འཁོད་ཡོད།
དེ་ཡང་སྐབས་དེར་༸གོང་ས་མཆོག་གིས་གནམ་ཐང་དུ་གསར་འགོད་པའི་དྲི་བར་བཀའ་ལན་སྩལ་དོན། ཨོ་སི་ཊོ་ལི་ཡའི་མི་རྣམས་ཀྱང་འགྲོ་བ་མི་དུང་ཕྱུར་བདུན་ཅུའི་ཁོངས་གཏོགས་ཡིན་སྟབས། ཤ་མདོག་ཏོག་ཙམ་མི་འདྲ་བ་མ་གཏོགས་ནང་གི་སེམས་ཚོར་དང་བསམ་བློ། གཟུགས་པོའི་གྲུབ་སྟངས་བཅས་ང་ཚོ་ཚང་མ་གཅིག་པ་རེད། དེ་འདྲ་སོང་ཙང་། ཆོས་ལ་དད་པ་བྱེད་མཁན་ཡིན་མིན་ལ་མ་ལྟོས་པར་ང་ཚོས་ནང་བསམ་བློའི་རིན་ཐང་ལ་དོ་སྣང་མང་ཙམ་བྱེད་དགོས། གང་ཡིན་ཟེར་ན། ནང་བསམ་བློའི་རིན་ཐང་ནི། ང་ཚོའི་སེམས་ཞི་བདེ་བག་ཕེབས་ཀྱི་འབྱུང་རྩ་རེད། སེམས་ནང་ཞི་བདེ་བག་ཕེབས་ཡོད་ན་གཟུགས་ཁམས་བདེ་ཐང་ཡོང་རྒྱུར་ཧ་ཅང་གནད་འགག་ཆེན་པོ་རེད། དེའི་སྐོར་ཁྱེད་རང་ཚོས་ཚན་རིག་པའམ་གསོ་དཔྱད་ཚན་རིག་པར་སྐད་ཆ་དྲིས་དང་། ཁོང་ཚོས་ཀྱང་དེ་ག་རང་བཤད་ཀྱི་རེད། དེར་བརྟེན་ང་ཚོ་ཚང་མར་ནུས་པ་གཅིག་མཚུངས་ཡོད་རེད། ང་ཚོ་ཚང་མ་མ་ལས་སྐྱེས་པ་དང་ཕ་མའི་བྱམས་སྐྱོང་འོག་ནས་འཚར་ལོངས་བྱུང་ཡོད་སྟབས། སེམས་ནང་ཞི་བདེ་བག་ཕེབས་དང་གཞན་ལ་བྱམས་བརྩེའི་ཉམས་ལེན་སྤེལ་ཐུབ་པ་བྱུང་ན། ལུས་ཁམས་ཀྱང་ཧ་ཅང་བདེ་ཐང་ཡོང་གི་ཡོད། ཁོང་ཁྲོ་དང་འཇིགས་སྣང་ནི་ང་ཚོའི་བདེ་ཐང་ལ་ཧ་ཅང་གནོད་བཞིན་ཡོད། ཅེས་བཀའ་ལན་སྩལ་བ་དང་སྦྲགས་དྲི་བ་ཞུ་མཁན་བུད་མེད་གསར་འགོད་པ་དེར་ཞལ་གཟིགས་ནས་ཞལ་ཤོབ་དང་སྦྲགས་བཀའ་ལན་སྩལ་དོན། ཁྱེད་རང་ལྟ་བུ་བཞིན་རས་མཛེས་ཉམས་དང་ལྡན་ཡང་གལ་ཏེ་ཁོང་ཁྲོའི་གཞན་དབང་དུ་སོང་ནས་གདོང་པ་ཁྲོ་གཉེར་ཅན་དུ་གྱུར་ན་མཛེས་པོ་ཁྱོན་ནས་ཡོད་མ་རེད། གདོང་ལ་འཛུམ་མདངས་དང་། སྐྱིད་སྣང་། བྱམས་བརྩེའི་རྣམ་པ་ལྡན་པ་ཡིན་ན་དངོས་གནས་མཛེས་པོ་རེད། ཅེས་བཀའ་ལན་སྩལ་ཡོད།།
