༢༠༡༠ ཕྱི་ཟླ་ ༤ ཚེས་ ༢ རེས་གཟའ་པ་སངས།
༄༅། །ཉི་ཧོང་ནང་རྟེན་གཞི་བྱས་པའི་ཉི་ཧོང་དང་ཤར་ཨེ་ཤི་ཡའི་བོད་གཞུང་སྐུ་ཚབ་དོན་གཅོད་ལས་ཁུངས་ལ་ཉི་ཧོང་བོད་དོན་རྒྱབ་སྐྱོར་བ་ཚོས་རེ་འདུན་གནང་བ་ལྟར་ལྡི་ལི་བོད་གཞུང་སྐུ་ཚབ་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་དང་བཀའ་ཟུར་རྗེ་བཙན་པདྨ་མཆོག་རྣམ་གཉིས་བདུན་ཕྲག་གཉིས་ཀྱི་རིང་ཉི་ཧོང་དུ་གདན་ཞུ་གནང་ཡོད། སྐུ་མགྲོན་རྣམ་གཉིས་རེས་གཟའ་ལྷག་པ་ཉིན་ཉི་ཧོང་དུ་འབྱོར་མཚམས་ཉི་ཧོང་བོད་གཞུང་སྐུ་ཚབ་དོན་ཁང་དང་ཉི་ཧོང་བོད་དོན་རྒྱབ་སྐྱོར་བ་ཚོས་རྒྱལ་ས་ཊོཀ་ཁྱོའི་ (Tokyo) ནང་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་རྗེས་རེས་གཟའ་ཕུར་བུ་ཉིན་སྐུ་མགྲོན་རྣམ་གཉིས་ཀྱིས་རྒྱལ་ས་ཊོཀ་ཁྱོའི་ནང་གསར་འགོད་གསལ་བསྒྲགས་ཤིག་སྤེལ་སྐབས་ཐོག་མར་བཀའ་བློན་བསྟན་པ་ཚེ་རིང་མཆོག་གིས་བོད་ཀྱི་གནད་དོན་དང་། ༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་དབར་གྱི་མཇལ་འཕྲད། དེ་བཞིན་བོད་རྒྱ་འབྲེལ་མོལ་བཅས་ཀྱི་གནད་དོན་ཐོག་འགྲེལ་བརྗོད་གཟབ་རྒྱས་གནང་ཡོད། དེ་ཡང་ཐོག་མར་བོད་ཀྱི་གནད་དོན་ཐོག་གསུང་དོན། བོད་ཀྱི་གནད་དོན་དེ་དྲང་བདེན་དང་། འཚེ་མེད་ཞི་བ། རང་དབང་བཅས་ཀྱི་གནད་དོན་ཞིག་ཆགས་ཡོད། ལྟ་གྲུབ་དེ་དག་འཛམ་གླིང་སྤྱི་ཡོངས་སུ་ཁྱབ་པའི་གཞི་རྩའི་ལྟ་གྲུབ་ཞིག་ཡིན་སྟབས་བོད་ཀྱི་གནད་དོན་དེ་འཇིག་རྟེན་སྤྱི་ཡོངས་ལ་ཕན་ནུས་ལྡན་པའི་ཐོག་འབྲེལ་བ་ཡོད་པའི་གནད་དོན་ཞིག་ཆགས་ཡོད།
རྒྱ་ནག་གཞུང་གིས་རྒྱུན་དུ་བོད་ལ་ཞི་བས་བཅིངས་བཀྲོལ་བཏང་ནས་ད་ཆ་སྤྱི་ཚོགས་རིང་ལུགས་ཀྱི་ལྷ་ཡུལ་ལྟ་བུར་སྒྱུར་ཡོད་ཚུལ་བརྗོད་པ་དེ་གལ་ཏེ་དངོས་འབྲེལ་ཡིན་ན་བོད་ནང་གི་དངོས་ཡོད་གནས་སྟངས་ཇི་ཡིན་དམ་བསྒྲགས་མེད་པའི་ཐོག འཛམ་གླིང་ཕྱི་ལ་སྤྱི་ཚོགས་རིང་ལུགས་ཀྱི་ལྷ་ཡུལ་དེ་ཇི་འདྲ་ཡོད་མེད་གསལ་སྟོན་བྱེད་དགོས། དོན་དངོས་ཐོག་བོད་མི་རྣམས་དེང་སང་ཡང་འཛེམས་གཟོན་མེད་པར་སྲོག་ཚུན་ཆད་འབེན་ལ་བཙུགས་ཏེ་ཉེན་ཁ་ཆེ་བའི་ཧི་མ་ལ་ཡའི་རི་རྒྱུད་བརྒལ་ནས་རྒྱ་གར་ནང་བྲོས་བྱོལ་དུ་ཡོང་བཞིན་ཡོད། དེར་བརྟེན་བོད་ནང་དུ་ཡོད་པའི་བོད་མི་ཚོས་རྒྱ་ནག་གུང་ཁྲན་གྱིས་གསར་འཛུགས་བྱས་པའི་སྤྱི་ཚོགས་རིང་ལུགས་ཀྱི་ལྷ་ཡུལ་ནང་བསྡད་པ་ལས་འཆི་རྒྱུ་དེ་ཡག་པར་ངོས་འཛིན་བྱེད་ཀྱི་ཡོད་ཅེས་གསུངས། དེ་བཞིན་བཀའ་བློན་མཆོག་གིས་བོད་རྒྱ་འབྲེལ་མོལ་སྐོར་གསུང་དོན། སྐུ་ཞབས་ཏེང་ཞའོ་ཕིང་ (Dengxiopeng) གིས་རང་བཙན་མ་གཏོགས་གནད་དོན་གཞན་ཚང་མར་འབྲེལ་མོལ་བྱས་ན་སྒྲིག་གི་རེད་ཅེས་བརྗོད་པ་གཞིར་བཞག་ཐོག་རྒྱ་ནག་གཞུང་ཕྱོགས་ཀྱིས་ཕྱི་ལོ་ ༢༠༠༨ ཟླ་ ༧ ནང་འབྲེལ་མོལ་བྱ་རྒྱུའི་བཟང་ཕྱོགས་ཀྱི་བརྡ་ལན་བཏང་བ་དེར་ཕྱི་ལོ་ ༢༠༠༨ ཟླ་ ༡༡ ནང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམ་པས་རྒྱ་ནག་གཞུང་ལ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་ཞིག་ཕུལ་ཡོད།
འོན་ཀྱང་རྒྱ་ནག་གཞུང་ཕྱོགས་ནས་བསམ་འཆར་ཡིག་ཆ་དེ་ནི་མངོན་པར་མི་གསལ་བའི་རང་བཙན་རྩོད་ཀྱི་ཡོད་སྐོར་བརྗོད་ནས་ཡ་ལན་བྱས་མེད། འདི་ལོའི་ཕྱི་ཟླ་ ༢ ནང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམ་པས་རྒྱ་ནག་གཞུང་ཕྱོགས་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དེར་གསལ་བཤད་ཀྱི་ཆེད་འགྲེལ་བརྗོད་དོན་ཚན་བདུན་ཅན་ཞིག་ཕུལ་ཡོད་ཀྱང་སྟབས་མ་ལེགས་པ་ཞིག་ལ་རྒྱ་ནག་གཞུང་ཕྱོགས་ཀྱིས་དེར་ཡ་ལན་གང་ཡང་བྱས་མེད། འོན་ཀྱང་བཙན་བྱོལ་བོད་གཞུང་གིས་རྒྱ་ནག་གཞུང་དང་མ་འོངས་པར་འབྲེལ་མོལ་བྱ་རྒྱུའི་འདུན་པ་དང་ཆོད་སེམས་བརྟན་པོ་འཆང་བཞིན་ཡོད་ཅེས་གསུངས་ཡོད། དེ་རྗེས་བཀའ་བློན་མཆོག་གིས་གསར་འགོད་པ་ཁག་གཅིག་གིས་དྲི་བར་ལན་འདེབས་གནང་ཡོད། དེ་བཞིན་བཀའ་ཟུར་རྗེ་བཙུན་པདྨ་མ་མཆོག་གིས་གསར་འགོད་པ་ཞིག་གིས་སྐད་ཡིག་གི་གནད་དོན་ཐོག་དྲི་བ་ཞིག་ལ་ལན་འདེབས་གནང་དོན། འབྲི་ཀློག་དང་ཁ་སྐད་ཀྱི་མཚོན་པའི་སྐད་ཡིག་ནི་རིག་གཞུང་ཚང་མའི་སྲོག་རྩ་ལྟ་བུ་ཡིན། བཙན་བྱོལ་ནང་བོད་མི་ཚོས་རིག་གཞུང་གི་ཆ་ཤས་གལ་ཆེ་དེ་ངལ་བ་ཁྱད་བསད་ཐོག་བདག་གཅེས་བྱེད་རྒྱུར་འབད་བརྩོན་ཆེན་པོ་བྱས་དང་བྱེད་མུས་ཡིན་པ་མ་ཟད། རྒྱ་གར་ནང་བོད་མིའི་སློབ་གྲྭ་ཁག་གི་ནང་བོད་སྐད་སློབ་ཁྲིད་བྱ་རྒྱུའི་སྐད་ཡིག་གི་བརྒྱུད་ལམ་འཇོག་རྒྱུར་འབད་བརྩོན་ཇི་འདྲ་གནང་ཡོད་སྐོར་ཞིབ་ཕྲ་འགྲེལ་བརྗོོད་གནང་ཡོད། ད་རེས་ཉི་ཧོང་གི་རྒྱལ་ས་ཊོཀ་ཁྱོའི་ནང་གསར་འགོད་ལྷན་ཚོགས་དེའི་སྐབས་ཕྱི་ནང་གསར་འགོད་པ་མི་གྲངས་ ༢༥ ཙམ་འདུ་འཛོམས་བྱུང་འདུག་པ་བཅས།།
