2༠༡༠ ཕྱི་ཟླ་ ༤ ཚེས་ ༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༡ ཉིན་རྡ་སའི་ཉེ་འགྲམ་ཤེས་རབ་དགའ་ཚལ་སློབ་གླིང་དབུ་བརྙེས་ནས་ལོ་ ༡༧ འཁོར་བའི་དུས་དྲན་སྲུང་བརྩི་ཞུས་པ།
དེ་ཉིན་སྔ་དྲོ་ཆུ་ཚོད་ ༩།༠༠ ཐོག་སྐུ་མགྲོན་གཙོ་བོ་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་དང་། སློབ་གྲྭའི་འགན་འཛིན་གྱིས་གཙོས་དགེ་ལས་སློབ་ཕྲུག་རྣམས་སློབ་གྲྭའི་ཐང་ཆེན་དུ་ལྷན་འཛོམས་ཀྱིས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་། དེ་ནས་སློབ་གྲྭའི་འགན་འཛིན་གྱིས་དུས་དྲན་དང་འབྲེལ་བའི་ངོ་སྤྲོད་གསུང་བཤད་གནང་རྗེས་སློབ་ཕྲུག་བུ་དང་བུ་མོ་ཚོ་ཁག་གཅིག་གིས་རྟེན་འབྲེལ་མཚོན་པའི་གླུ་གཞས་ཤིག་འཁྲབ་སྟོན་ཞུས་རྗེས་མན་སྤར་ཕན་བདེ་གླིང་ལྷ་མོའི་ཚོགས་པ་ནས་འདི་ལོའི་ཞོ་སྟོན་སྐོར་བསྐྱོད་ཀྱི་ལས་རིམ་ལྟར་སློབ་གྲྭ་དེར་ཕེབས་ཏེ་གཟུགས་ཀྱི་ཉི་མའི་ལྷ་གཞུང་འཁྲབ་སྟོན་ཞུས། སློབ་གླིང་འདི་ནི་བོད་ནས་གསར་དུ་འབྱོར་བ་རང་ལོ་ ༡༨ ནས་ ༣༠ བར་གྱི་སློབ་མ་རྣམས་ཀྱི་ཆེད་དུ་བཙུགས་པ་ཞིག་ཡིན་པ་དང་། ཕྱི་ལོ་ ༢༠༠༢ ལོ་ནས་བོད་གཞུང་ཤེས་རིག་ལས་ཁུངས་ཀྱི་འཛིན་སྐྱོང་འོག་ལག་ཤེས་སྡེ་ཚན་དང་ཤེས་ཡོན་གྱི་སྡེ་ཚན་གཉིས་སུ་དབྱེ་ནས་ལག་ཤེས་ཁོངས་འཚེམ་བཟོ་དང་། ལྷ་བྲིས་སོགས་ཡོད།
ཤེས་ཡོན་སྡེ་ཚན་ཁོངས་དབྱིན་བོད་དང་གློག་ཀླད་སློབ་ཁྲིད་བྱེད་བཞིན་ཡོད། ད་བར་བོད་ཡིག་འཛིན་གྲྭ་བཅུ་གཉིས་དང་། དབྱིན་ཡིག་འཛིན་གྲྭ་བརྒྱད་པ། གློག་ཀླད་བཅས་སློབ་མཐར་ཕྱིན་པ་ ༦༥༧ དང་ལག་ཤེས་ཁོངས་འཚེམ་བཟོ་མཐར་ཕྱིན་པ་ ༦༨ ལྷ་བྲིས་མཐར་ཕྱིན་པ་ ༢༠ ཁྱོན་བསྡོམས་སློབ་མ་སློབ་མཐར་ཕྱིན་པ་གྲངས་ ༧༤༣ བྱུང་ཡོད། ད་ཆ་སློབ་གྲྭ་འདིར་དགེ་རྒན་གྲངས་ ༣༨ དང་ལས་བྱེད་གྲངས་ ༡༥ སློབ་མ་གྲངས། ༥༢༦ བཅས་ཡོད་འདུག
