༢༠༡༥ ཟླ་ ༥ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༢༧ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྡ་ས་བོད་ཁྱིམ་སློབ་གྲྭའི་སིལ་སྤོལ་རྩེད་ཐང་དུ་བོད་ཀྱི་གཞོན་སྐྱེས་གཙོ་བོར་གྱུར་པའི་དོན་གཉེར་ཅན་རྣམས་ལ་ནང་ཆོས་ངོ་སྤྲོད་ཐེངས་དགུ་པ་བསྐྱངས་ཆེད་ཆིབས་སྒྱུར་བཀའ་དྲིན་བསྐྱངས་ཡོད། སྐབས་དེར་རྒྱ་གར་མཐོ་སློབ་ཁག་ ༩༢ ནས་ཁྱོན་སློབ་མ་གྲངས་ ༣༨༢ དང་ཕྱི་རྒྱལ་མཐོ་སློབ་ཁག་ ༡༡ ནས་སློབ་མ་གྲངས་ ༡༠ དེ་བཞིན་བོད་ཁྱིམ་སློབ་གྲྭ་སོགས་ནས་བཅར་བའི་སློབ་ཕྲུག་གྲངས་ ༡༦༠༠ ཙམ་དང་དགེ་རྒན། སེར་སྐྱ་མི་མང་བཅས་ཁྱོན་ཆོས་ཞུ་བ་མི་གྲངས་སྟོང་ཕྲག་གསུམ་ལྷག་བརྒལ་བ་འདུ་འཛོམས་གནང་འདུག
དེ་ཡང་གོང་ཚེས་ཉིན་ཐོག་མར་བོད་ཕྲུག་ཁྱིམ་སྡེའི་འགན་འཛིན་རྣམ་པ་དང་རྡ་ས་ནང་ཆོས་ངོ་སྤྲོད་ཚོགས་ཆུང་གི་རྒྱུན་ལས་རྣམ་པས་༸གོང་ས་མཆོག་ལ་སྤོས་སྣེས་སྔོན་བསུས་ཏེ་བཞུགས་ཁྲིར་༸ཞབས་སོར་འཁོད་མཚམས། སློབ་མ་རྣམས་ནས་ཕར་ཕྱིན་གྱི་གཞུང་ཆེན་ཐོག་བགྲོ་གླེང་སྐར་མ་ ༡༠ རིང་གནང་རྗེས་ཤེས་རབ་དགའ་ཚལ་སློབ་གླིང་གི་སློབ་མ་ཁག་གཅིག་ནས་བདེན་བཞིའི་སྐོར་སྐར་མ་ ༡༠ རིང་རྟགས་བསལ་གྱི་བགྲོ་གླེང་སྤྱན་འབུལ་ཞུས།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་ངོ་སྤྲོད་བཀའ་སློབ་སྩལ་དོན། དེ་རིང་སློབ་གྲྭ་ཁག་མང་པོ་ཞིག་ནས་ཆོས་ཞུར་ཕེབས་མཁན་གྲྭངས་འབོར་ཆེན་པོ་འདུག དགེ་རྒན་ཡང་མང་པོ་ཞིག་ཕེབས་འདུག དེ་རིང་འདིར་ཁྱེད་རྣམས་དགའ་བཞིན་སྤྲོ་བཞིན་ངང་ནས་འདིར་འཛོམས་པ་རེད། ད་ལྟ་སྔོན་དུ་རྩོད་པ་རྩོད་མཁན་ཁྱེད་རང་ཚོར་དམིགས་བསལ་བཀྲ་ཤིས་བདེ་ལེགས་ཞུ་རྒྱུ་ཡིན།
ཁྱེད་རང་ཚོས་མཚན་ཉིད་ལྟ་རྒྱུར་དོ་སྣང་བྱེད་བཞིན་ཡོད་པ་དང་། སྤྱིར་མཚན་ཉིད་ལྟ་རྒྱུ་ལས་སླ་པོ་ཞིག་མིན། འོན་ཀྱང་ཁྱེད་རང་ཚོས་དེར་དོ་སྣང་དང་དོན་གཉེར་བྱས་ཏེ་སློབ་སྦྱོང་གནང་བ་ཧ་ཅང་ཡག་པོ་རེད། དེ་སྔ་བོད་ནང་ལ་མཚོན་ན་མི་སྐྱ་ཕོ་མོའི་ནང་ལ་གཞུང་ཆེན་ལྟ་མཁན་ཧ་ལམ་མེད། བཙུན་མ་ཚོའི་ནང་ལའང་ཧ་ལམ་མཚན་ཉིད་ལྟ་མཁན་མེད། རབ་བྱུང་ཡོད་པའི་དགོན་པ་དེ་ཚོའི་ནང་བཤད་གྲྭ་ཡོད་པའི་དགོན་པ་དེ་ཚོ་རེད་མ་གཏོགས་གཞན་དགོན་པ་ཆེ་ཆུང་འདྲ་མིན་ཡོད་ཀྱང་གཞུང་ཆེན་དཔེ་ཆར་སློབ་སྦྱོང་བྱེད་པ་ཉུང་ཉུང་རེད།
དེ་སྔ་བོད་ཀྱི་གནས་སྟངས་དེ་འདྲ་ཞིག་ཡིན་དུས་ཧི་མཱ་ལ་ཡ་ངོས་སུ་ཡིན་ནའང་སྤྱིར་དགོན་པ་མང་པོ་ཡོད། འོན་ཀྱང་དཔེ་ཆ་ལྟ་མཁན་ཧ་ཅང་ཉུང་ཉུང་རེད་འདུག དེ་ནི་ང་ཚོར་སྔར་ནས་ཡོད་པའི་ལོ་བརྒྱ་ཕྲག་མང་པོའི་གོམས་གཤིས་ཤིག་རེད་དམ་ཟེར་ན་རེད། གོམས་གཤིས་དེ་བཟང་པོ་ཞིག་རེད་དམ་ངན་པ་ཞིག་རེད་ཟེར་ན། གོམས་གཤིས་དེ་ངན་པ་ཞིག་རེད། རྗེས་ལུས་ཀྱི་གོམས་གཤིས་ཤིག་ཆགས་ཡོད། རྗེས་ལུས་ཀྱི་གོམས་གཤིས་དེ་རྗེས་ལུས་ཀྱི་གོམས་གཤིས་རེད་ཟེར་ནས་བཞག་པ་ཡིན་ན་འགྲིག་གི་རེད་དམ་ཟེར་ན། རྗེས་ལུས་ཀྱི་གོམས་གཤིས་དེ་འགྲིག་མེད། གོམས་གཤིས་ཡིན་ནའང་རྗེས་ལུས་ཀྱི་རང་བཞིན་ཞིག་ཡིན་ན་དེ་ང་ཚོས་སེལ་དགོས་པ་རེད། ཡར་རྒྱས་གཏོང་དགོས་པ་རེད། ཅེས་སོགས་ཀྱི་ལམ་སྟོན་བཀའ་སློབ་སྩལ། དེ་ཡང་ཐེངས་འདིར་མགོན་པོ་གང་ཉིད་མཆོག་གིས་བོད་ཁྱིམ་སློབ་གྲྭར་ཕྱི་ཚེས་ ༢༧ ནས་ ༢༩ བར་ཉིན་གསུམ་རིང་བློ་རིག་རྣམ་གཞག་ཐོག་དམིགས་བསལ་ནང་ཆོས་ངོ་སྤྲོད་མཛད་རྒྱུ་དང་། ཐུགས་རྗེ་ཆེན་པོའི་ཕྱག་སྟོང་སྤྱན་སྟོང་གི་བཀའ་དབང་། བོད་ཁྱིམ་སྤྱི་མགྲིན་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་པ་རེད།།
