༢༠༡༥ ཟླ་ ༥ ཚེས་ ༢༥ རེས་གཟའ་ཟླ་བ།
༄༅། །འདི་གར་བལ་ཡུལ་བོད་མིའི་ས་ཡོམ་ཛ་དྲག་ཚོགས་ཆུང་ནས་ཕྱི་ལོ་ ༢༠༡༥ ཟླ་ ༥ ཚེས་ ༢༥ ཉིན་བཏང་གནས་ནང་འཁོད་དོན།
བལ་ཡུལ་དང་བོད་དེ་བཞིན་རྒྱ་གར་བྱང་ཕྱོགས་ས་ཁུལ་སོགས་ཀྱི་ནང་ཕྱི་ལོ་ ༢༠༡༥ ཟླ་ ༤ ཚེས་ ༢༥ ཉིན་གློ་བུར་དུ་བསམ་ཡུལ་ལས་འདས་པའི་ས་ཡོམ་ཤུགས་ཚད་ ༧།༩ ཅན་ཞིག་བརྒྱབས་རྗེས་སླར་ཡང་དེ་ལས་ཤུགས་ཆད་ཏོག་ཙམ་ཆུང་བའི་ས་འགུལ་རིམ་པ་མང་པོ་ཞིག་བསྟུད་མར་བརྒྱབས་ཏེ། མི་གྲངས་སྟོང་ཕྲག་མང་པོ་རྐྱེན་འདས་སུ་གྱུར་བ་མ་ཟད། སྡོད་ཁང་དང་ལྷ་ཁང་སོགས་ལ་གནོད་སྐྱོན་ཚབས་ཆེན་ཕོག་པར་བརྟེན།
བལ་ཡུལ་བོད་མིའི་ས་ཡོམ་ཛ་དྲག་ངལ་སེལ་ཚོགས་ཆུང་གིས་ཚོགས་ཐེངས་གསུམ་པའི་གྲོས་ཆོད་དགོངས་དོན་ད་ལྟ་ཛ་དྲག་གི་གནས་སུ་གྱར་ནས་ཧ་ཅང་གཉན་འཕྲང་ཆེ་བའི་དུས་སྐབས་འདིར་བལ་ཡུལ་རྒྱལ་སའི་ཁུལ་དུ་གནས་སྡོད་བོད་མི་སེར་སྐྱ་མི་མང་དྲུག་བརྒྱ་ལྷག་ཙམ་མ་བསྐུལ་དང་དུ་བླངས་ནས་ཕྱི་ལོ་ ༢༠༡༥ ཟླ་ ༥ ཚེས་ ༢༣ རེ་གཟའ་སྤེན་པའི་ཉིན་ཞོགས་པ་ཆུ་ཚོད་ ༩ ཐོག་མཆོད་འཇོར་ས་གནས་འགོ་འཛིན་ཚོགས་ཁང་དུ་འདུ་འཛོམས་ཀྱིས་ས་ཡོམ་འོག་རྐྱེན་འདས་སུ་གྱུར་བ་རྣམས་ལ་མྱ་ངན་ཞུས་པ་དང་རྗེས་ཤུལ་ནང་མི་སྤུན་མཆེད་རྣམས་ལ་གདུང་སེམས་མཉམ་སྐྱེ་དང་རྨས་སྐྱོན་ཕོག་པ་རྣམས་མགྱོགས་མྱུར་དྲག་སྐྱེད་ཡོང་ཆེད་སྔོ་སྨོན་དང་གསོལ་འདེབས་སྨིན་རྒྱས་ཤིག་གནང་ཡོད། སྐབས་དེར་དོན་གཅོད་རྟ་མགྲིན་རྡོ་རྗེ་ལགས་ཀྱིས་མཆོད་འབུལ་སྨོན་ལམ་དང་འབྲེལ་བའི་གསུང་བཤད་གནང༌ཡོད་པ་མ་ཟད། བལ་ཡུལ་བོད་མིའི་ས་ཡོམ་ཛ་དྲག་ཚོགས་ཆུང་ནས་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་ཉིན་དགུང་གསོལ་ཚིགས་དང་དགེ་བཙུན་སྔགས་གསུམ་ལ་སྐུ་འགྱེད་བལ་སྒོར་ ༡༠༠ རེར་ཕུལ་ཡོད། འདས་པོའི་ཞགས་ཞེ་དགུའི་ཉིན་ཡང་མཆོད་འབུལ་སྨོན་ལམ་གསུང་འདོན་གནང་རྒྱུ་ཡིན་འདུག་པ་བཅས།།
