༢༠༡༠ ཕྱི་ཟླ་ ༣ ཚེས་ ༢༩ རེས་གཟའ་ཟླ་བ།
སྐུ་ཞབས་མ་རོས་སེབ་ཀོ་བིཁ་མཆོག
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༥ རེས་གཟའ་ཕུར་བུའི་ཉིན་བྷ་ར་སེལ་ (Brussels) ནང་རྟེན་གཞི་བྱས་པའི་ཡུ་རོབ་གྲོས་ཚོགས་ཀྱི་ཚོགས་ཆུང་ལྷན་ཚོགས་ནང་ཡུ་རོབ་གྲོས་ཚོགས་ཀྱི་འཐུས་མི་རྣམས་པས་བོད་ནང་ཕྱི་ལོ་ ༢༠༠༨ ལོར་ཞི་རྒོལ་བྱུང་བའི་གནས་ཚུལ་དེར་བསྐྱར་ཞིབ་ཀྱིས་ད་ལྟའི་བོད་ནང་གི་གནས་སྟངས་ཐོག་བགྲོ་གླེང་ཚོགས་འདུ་ཞིག་ཚོགས་ཡོད། བགྲོ་གླེང་དེའི་སྐབས་ཡུ་རོབ་སྤྱི་མཐུན་ཚོགས་པའི་འགན་འཛིན་དང་ཡུ་རོབ་ལྷན་ཚོགས་ཀྱི་སྲིད་འཛིན་གཞོན་པ་སྐུ་ཞབས་མ་རོས་སེབ་ཀོ་བིཁ་ (Maros Sefcovic) ལགས་ཀྱིས་གསུང་དོན། བོད་ནང་རྒྱལ་སྤྱིའི་གསར་འགྱུར་བརྒྱུད་ལམ་དང་། གཞུང་འབྲེལ་མི་སྣ། རོགས་རམ་ཚོགས་པ་ཁག་ལ་དམ་བསྒྲགས་བྱེད་བཞིན་ཡོད་པ་དང་། དེ་བཞིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་རྒྱ་ནག་དཔོན་རིགས་དབར་གྱི་འབྲེལ་ལམ་དེར་བཟང་ཕྱོགས་ཀྱི་རྣམ་པ་གང་ཡང་མེད་པའི་དངོས་ཡོད་ཀྱི་གནས་སྟངས་འོག་ང་ཚོར་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཐོག་དངོས་ནས་སེམས་འཚབ་ཡོད།
ཡུ་རོབ་གྲོས་ཚོགས་སྤྱི་མཐུན་ཚོགས་པའི་ལངས་ཕྱོགས་དེར་གོ་བ་ལོག་གྲུབ་བྱེད་རྒྱུའི་གནས་སྟངས་གང་ཡང་མེད། དེར་བརྟེན་ངས་ནན་བཤད་ཞུ་རྒྱུར། ཡུ་རོབ་སྤྱི་མཐུན་ཚོགས་པས་བོད་ཐེ་བའི་རྒྱ་ནག་གི་མངའ་དབང་དང་ས་ཁྱོན་བདག་དབང་ལ་གུས་བརྩི་ཞུ་བཞིན་ཡོད། ང་ཚོས་རྒྱ་ནག་གོང་བུ་གཅིག་གྱུར་གྱི་ལངས་ཕྱོགས་དེར་གུས་བརྩི་ཞུ་བཞིན་ཡོད། འོན་ཀྱང་ང་ཚོས་དུས་རྟག་ཏུ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་རྒྱ་ནག་དཔོན་རིགས་ཚོའི་དབར་འབྲེལ་མོལ་གྱི་ལམ་ནས་ཞི་བའི་མཐུན་འགྲིག་ཡོང་རྒྱུར་རྒྱབ་སྐྱོར་ཞུ་བཞིན་ཡོད། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་ཀྱི་ཐུན་མིན་ལེགས་བྱང་དང་། ཆོས། ཡུལ་གོམས་གཤིས་ལུགས་ལ་སོགས་པའི་གནད་དོན་གཙོ་གྲས་ཡོངས་སུ་རྫོགས་པའི་དཀའ་ངལ་དེ་དག་སེལ་ཆེད་དངོས་འབྲེལ་དོན་ཕན་སོན་པའི་བོད་རྒྱ་འབྲེལ་མོལ་ཞིག་བྱེད་དགོས། བོད་ནང་ལས་དོན་ཐག་གཅོད་བྱེད་སྐབས་བོད་མི་ཚོས་ཆ་ཤས་ལེན་ཐུབ་པ་བྱེད་རྒྱུའི་དཀའ་ངལ་གང་ཡོད་པ་དེ་དག་ཀྱང་བོད་རྒྱ་འབྲེལ་མོལ་སྐབས་སེལ་ཐབས་གནང་དགོས། ཡུ་རོབ་སྤྱི་མཐུན་ཚོགས་པར་བོད་དེ་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་ཞིག་ཆགས་ཡོད། གནས་ཚུལ་དེ་ང་ཚོས་རྒྱ་ནག་དཔོན་རིགས་ཚོར་རྡ་ལན་བསྟུད་མར་སྤྲོད་བཞིན་ཡོད་པ་མ་ཟད། ཁོང་ཚོའི་བསམ་ཚུལ་ཇི་ཡིན་ལ་ཉན་ཞིབ་གཟབ་ནན་བྱེད་པ་དང་། ཕན་ཚུན་གུས་ཞབས་ཐོག་ཁོང་ཚོའི་ལངས་ཕྱོགས་དེ་དག་ལ་བསམ་ཤེས་བྱེད་རྒྱུའི་འབད་བརྩོན་ཞུ་བཞིན་ཡོད། འོན་ཀྱང་འགྲོ་བ་མིའི་ཐོབ་ཐང་ནི་ཀུན་ཁྱབ་ཀྱི་གནད་དོན་ཞིག་ཡིན་པ་དང་། རྒྱལ་སྤྱིའི་སྤྱི་ཚོགས་ནང་དངོས་ཡོད་ཁྲིམས་མཐུན་ཐོག་ནས་བལྟས་པ་ཡིན་ན། བོད་ནང་གི་གནས་སྟངས་དེ་སེམས་འཚབ་སྐྱེ་དགོས་པ་ཞིག་ཆགས་ཡོད། གནས་སྟངས་དེར་ང་ཚོས་རྒྱ་ནག་དཔོན་རིགས་ཚོ་དང་ཕན་ཚུན་ཡང་ཡང་བགྲོ་གླེང་བྱེད་ཀྱི་ཡོད། བོད་རྒྱ་འབྲེལ་མོལ་སྐབས་བོད་ཕྱོགས་ནས། མ་འོངས་བོད་ལ་རང་སྲིད་རང་སྐྱོང་ཚད་ལྡན་ཞིག་ཡོང་རྒྱུའི་བསམ་འཆར་གྱི་ཡིག་ཆ་གཅིག་རྒྱ་ནག་དཔོན་རིགས་ཚོར་ཕུལ་ཡོད། བོད་ཕྱོགས་ནས་རྒྱ་ནག་དང་ཁ་བྲལ་གྱིས་རང་བཙན་རྩོད་ཀྱི་མེད་པའི་ཆོད་སེམས་བརྟན་པོ་བཅངས་པ་དེར་ང་ཚོས་དགའ་བསུ་ཞུ་རྒྱུ་ཡིན། ༸གོང་ས་ཏཱ་ལའི་བླ་མས་དབུས་མའི་ལམ་གྱི་སྲིད་བྱུས་དེར་འགྱུར་བ་མེད་པར་ཆོད་སེམས་བཅངས་པའི་ཐོག་བོད་རྒྱའི་གནད་དོན་སེལ་རྒྱུའི་ཐབས་ལམ་དེ་འབྲེལ་མོལ་གྱི་ལམ་ཁོ་ན་ཡིན་པར་ཡིད་ཆེས་མཛད་པ་དེར་ཡང་ང་ཚོ་དགའ་པོ་བྱུང་། བོད་རྒྱ་འབྲེལ་མོལ་དེར་བཟང་ཕྱོགས་ཀྱི་རྣམ་པ་གང་ཡང་བྱུང་མེད་ནའང་ཡུ་རོབ་སྤྱི་མཐུན་ཚོགས་པས་བོད་རྒྱ་གཉིས་མུ་མཐུད་འབྲེལ་མོལ་གནང་བ་དེར་དགའ་བསུ་ཞུ་རྒྱུ་ཡིན། མཐའ་སྡོམ་དེར་ངས་བོད་རྒྱའི་ཕྱོགས་གཉིས་ཀ་ནས་བསམ་བློ་གུ་ཡངས་བཏང་སྟེ་འབྲེལ་མོལ་དེ་ཤུགས་ཆེ་རུ་གཏོང་རྒྱུ་དང་ཕུགས་རྒྱང་རིང་པོའི་ཐོག་བོད་ཀྱི་དཀའ་ངལ་སེལ་དགོས་པའི་རེ་འདུན་ཞུ་རྒྱུ་ཡིན། ང་ཚོའི་ཕྱོགས་ནས་དེ་ལྟར་ཡོང་བར་མཐའ་གཅིག་ཏུ་རྒྱབ་སྐྱོར་ཡོད་ཅེས་གསུངས། སྐབས་དེར་ཡུ་རོབ་སྤྱི་མཐུན་ཚོགས་པའི་སྐུ་ཚབ་རྣམ་པས་ད་ལྟའི་བོད་ཀྱི་གནས་སྟངས་ཐོག་སེམས་འཚབ་ཡོད་སྐོར་གསུངས་པ་དང་སྦྲགས་ཡུ་རོབ་སྤྱི་མཐུན་ཚོགས་པའི་དམིགས་བསལ་བོད་དོན་སྐུ་ཚབ་གཅིག་བསྐོ་བཞག་གནང་དགོས་པ་དང་། བོད་ནང་ཉམས་ཞིབ་ཚོགས་པ་གཏོང་དགོས་པའི་རེ་འདུན་ཡང་བཏོན་ཡོད་པ་བཅས།།
