༢༠༡༠ ཕྱི་ཟླ་ ༣ ཚེས་ ༢༦ རེས་གཟའ་པ་སངས།
༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་དགོངས་དོན་ལྟར་རང་རེའི་གནའ་བོའི་རྩ་ཆེའི་ལྷ་མོའི་རིག་གཞུང་འདི་དག་བོད་མི་གཞོན་སྐྱེས་ཚོར་དོ་དབྱིངས་སླེབས་ཆེད་འདི་ལོ་བོད་གཞུང་ཟློས་གར་དབུ་བརྙེས་ནས་མི་ལོ་ ༥༠ ཧྲིལ་པོ་འཁོར་བའི་དུས་དྲན་དང་སྟབས་བསྟུན་བོད་ཀྱི་ཞོ་སྟོན་རྒྱས་པ་ཐེངས་ ༡༥ ཕྱི་ལོ་ ༢༠༡༠ ཟླ་ ༣ ཚེས་ ༢༧ ཉིན་དབུ་འཛུགས་ཀྱིས་ཕྱི་ཟླ་ ༤ ཚེས་༦ བར་སྲུང་བརྩི་ཞུ་རྒྱུ་ཡིན་འདུག དེ་ཡང་ལྷ་གཞུང་འཁྲབ་སྟོན་དབུ་འབྱེད་ཉིན་སྔ་དྲོ་ཆུ་ཚོད་ ༩།༠༠ ཐོག་སྒྲུབ་རྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ལ་གདན་ཞུའི་གསོལ་འདེབས་ཞུས་པ་ལྟར་ཆིབས་སྒྱུར་བསྐྱངས་མཚམས་སུ་བོད་གཞུང་ཟློས་གར་གྱི་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ནས་མལ་རྟེན་གསུམ་འདེགས་འབུལ་ཞུ་རྒྱུ་དང་། དེ་ནས་བོད་ཀྱི་ལྷ་མོའི་སྲོལ་འབྱེད་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་དོ་རའི་ནང་དུ་གདན་འདྲེན་ཞུ་རྒྱུ། དེ་རྗེས་ཟློས་གར་གྱི་སྤྱི་ཁྱབ་འགན་འཛིན་ནས་དུས་སྟོན་ངོ་སྤྲོད་དང་སྦྲགས་ལས་བསྡོམས་སྙན་སེང་ཞུ་རྒྱུ་རེད་འདུག ཐེངས་འདིའི་ལྷ་གཞུང་འཁྲབ་སྟོན་གནང་མཁན་ཁོངས་སུ་བོད་གཞུང་ཟློས་གར་ཚོགས་པས་དབུས་མ་སུ་རི་བོད་ཁྱིམ་སློབ་གྲྭ་དང་། ཀ་སྦུག་ལྷ་མོའི་ཚོགས་པ། བལ་ཡུལ་ལྷ་མོའི་ཚོགས་པ། མན་སྤར་ལྷ་མོའི་ཚོགས་པ། སྦན་དྷ་ར་ལྷ་མོའི་ཚོགས་པ། མོན་གྷོ་ལྷ་མོའི་ཚོགས་པ། སྦེལ་ཀོབ་ལྷ་མོའི་ཚོགས་པ། ཨོ་རི་ས་ལྷ་མོའི་ཚོགས་པ་བཅས་ཡོད། འཁྲབ་སྟོན་ཉིན་དང་པོ་དང་མཐའ་མའི་ཉིན་བོད་གཞུང་ཟློས་གར་དུ་འཁྲབ་སྟོན་གནང་རྒྱུ་དང་། དེ་མིན་རྡ་སའི་ཉེ་འཁོར་དུ་བོད་པའི་སློབ་གྲྭ་ཁག་ཡོད་སར་ཕེབས་ཏེ་མཛད་རིམ་གཞིར་བཟུང་རིན་མེད་ཐོག་ལྷ་གཞུང་འཁྲབ་སྟོན་གནང་རྒྱུ་ཡིན་པ་བཅས་ཀྱི་གནས་བསྡུས་སུ།།
