༢༠༡༥ ཟླ་ ༥ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༡༧ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་ནང་གི་གཞུང་འབྲེལ་ལས་དོན་རྣམས་རེ་ཞིག་ཡོངས་སུ་ལེགས་གྲུབ་ཀྱིས་དེ་ཉིན་ཁེ་ན་ཌའི་གྲོང་ཁྱེར་ཊོ་རོན་ཊོར་ཕྱོགས་ཕེབས་གནང་འདུག ཐེངས་འདིར་སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་ཀྱི་དགོས་དོན་གཙོ་བོ་ནི། ཕྱི་སྡོད་རྒྱ་མི་རིགས་ཚོ་དང་ཐུག་འཕྲད་ཀྱི་འབྲེལ་བ་ཇེ་བཟང་དུ་གཏོང་རྒྱུ་དང་། བོད་དོན་ཐོག་རྒྱལ་སྤྱིའི་རྒྱབ་སྐྱོར་ཤུགས་ཆེ་རུ་གཏོང་རྒྱུ། དེ་བཞིན་ས་གནས་བོད་རིགས་རྣམས་དང་ཐུག་འཕྲད་གནང་རྒྱུ་བཅས་ཡིན་འདུག གཞན་ཡང་སྐབས་དེར་སྲིད་སྐྱོང་མཆོག་གིས་སྐུ་ཚབ་དོན་ཁང་གི་དོན་གཅོད་དང་ལས་བྱེད་ཁག་གཅིག དེ་བཞིན་ཕྱི་དྲིལ་དྲུང་ཆེ་དང་འགན་འཛིན་སོགས་ལ་ཕྱི་འབྲེལ་སྲིད་བྱུས་དང་འབྲེལ་བའི་ཟབ་སྦྱོང་ནང་ཕེབས་ནས་གསུང་བཤད་གནང་བ་མ་ཟད། ཨ་རིའི་རྒྱལ་ཡོངས་མང་གཙོ་སྲུང་སྐྱོབ་ཚན་པས་སྲིད་སྐྱོང་མཆོག་ལ་གསོལ་སྟོན་ཞིག་འབུལ་ལམ་ཞུས་པ་དེར་མཉམ་ཞུགས་གནང་ཡོད་པ་དང་། ཕྱོགས་མཚུངས་ཨ་རིའི་གྲོས་ཚོགས་ཀྱི་འཐུས་མི་རྒན་གྲས་ཁག་གཅིག་དང་ལྷན་མཇལ་འཕྲད་གནང་འདུག དེ་བཞིན་ཝ་ཤིང་ཊོན་ཁུལ་གནས་སྡོད་བོད་རིགས་རྣམས་ལ་གསུང་བཤད་གནང་འདུག
དེ་ཡང་སྲིད་སྐྱོང་མཆོག་གིས་ཨ་རིའི་རྒྱལ་ཡོངས་མང་གཙོ་སྲུང་སྐྱོབ་ཚན་པས་སྲིད་སྐྱོང་མཆོག་ལ་གསོལ་སྟོན་ཞིག་འབུལ་ལམ་ཞུས་པ་དེར་མཉམ་ཞུགས་གནང་སྐབས་ཚོགས་པའི་ལས་བྱེད་རྣམས་ལ་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་ལྷན་ཁང་དེ་དག་གི་ལས་དོན་སྤེལ་ཕྱོགས་སྐོར་འགྲེལ་བརྗོད་གནང་ཡོད་པ་མ་ཟད། བོད་མིའི་འཐབ་རྩོད་སྤྱི་དང་ལྷག་པར་དབུ་མའི་ལམ་གྱི་སྲིད་བྱུས་སྐོར་གསུང་དོན། བོད་མིའི་སྒྲིག་འཛུགས་ནང་ཕྱག་ལས་གནང་མཁན་ལས་བྱེད་གྲངས་ ༡༥༠༠ ཡོད་ཁོངས་ནས་ ༦༠༠ གཏན་འཇགས་སམ་ལས་བྱེད་ངོ་མ་ཡིན་པ་དང་། དེ་ཁོངས་ལྷག་མ་ལས་བྱེད་གྲངས་ ༩༠༠ རྣམས་ཆོད་གན་སོགས་ཀྱི་གནས་བབ་ཐོག་ནས་བསྐོ་གཞག་གནང་ཡོད། གཞི་རྩའི་བོད་མིའི་སྒྲིག་འཛུགས་ཀྱི་སྔོན་རྩིས་གྲངས་འབོར་དེ་སྲིད་གཞུང་གཞན་དང་བསྡུར་བ་ཡིན་ན་མང་པོ་མ་རེད། འོན་ཀྱང་ང་ཚོས་ལས་དོན་སྤེལ་ཕྱོགས་དེ་ནུས་པ་ལྡན་པ་ཞིག་ཡོད། ཅེས་གསུངས།
གཞན་ཡང་སྲིད་སྐྱོང་མཆོག་གིས་སྐབས་དེར་སྤྱིར་བོད་མི་རྣམས་ནི་རང་བཞིན་གྱི་སེམས་པ་བཟང་པོ་དང་ཞི་བདེར་དགའ་བའི་མི་རིགས་ཤིག་ཡིན་པ་གསུངས་པ་དང་སྦྲགས། ཉེ་ལམ་བལ་ཡུལ་དུ་ས་འགུལ་གྱི་གནོད་འཚེ་ཕོགས་སྐབས་ས་གནས་བོད་རྣམས་དང་དེ་བཞིན་ཕྱོགས་མཐའ་ནས་ཕེབས་པའི་བོད་མི་རྣམས་ཀྱིས་ལྷག་བསམ་རྣམ་དག་དང་བྱམས་བརྩེའི་བསམ་པའི་ཐོག་ནས་རང་ནུས་གང་ཐུབ་ཀྱི་ངལ་སེལ་རོགས་སྐྱོབ་ཀྱི་ལས་གཞིར་མཐུན་རྐྱེན་རྒྱ་མི་ཆུང་བ་ཞིག་གནང་ཡོད་སྐོར་གསུང་དོན། རྩ་བའི་ང་ཚོ་བོད་མི་ཚོ་སྐྱབས་བཅོལ་བ་ཞིག་ཡིན་ནའང་། ངལ་སེལ་རོགས་སྐྱོབ་ཀྱི་ལས་གཞིའི་ཐོག་ཟས་གོས་གནས་མལ་སོགས་སྦྱིན་པ་བཏང་ནས་ནད་པར་སྨན་བཅོས་དང་མགོན་མེད་རྣམས་ལ་གཟིགས་རྟོག་རྒྱ་ཆེ་གནང་དང་གནང་མུས་ཡིན་པ་ནི། དཔེར་ན་ཞི་ཆེན་དགོན་པ་ལྟ་བུར་མཚོན་ན། གོད་ཆག་འོག་ཕམ་ཉེ་བྱུང་བའི་བལ་པོའི་ཡུལ་མི་གྲངས་ ༢༠༠༠ ལྷག་ལ་དགོན་པས་ཟས་གོས་དང་སྡོད་ཁང་སོགས་གོ་སྒྲིག་གནང་ནས་ངལ་སེལ་ཆེད་ཞབས་འདེགས་རྒྱ་ཆེ་ཞུས་ཡོད། ཅེས་གསུངས།
གཞན་ཡང་ཐེངས་འདིར་སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱི་འཐུས་མི་ལྕམ་སྐུ་ནེན་སི་པི་ལོ་སི་ Ms. Nancy Pelosi མཆོག་དང་། དེ་བཞིན་གྲོས་ཚོགས་གོང་མའི་འཐུས་མི་སྐུ་ཞབས་ཊོམ་ཀོ་ཊོན་ Mr. Tom Cotton མཆོག་བཅས་དང་མཇལ་འཕྲད་གནང་འདུག སྐབས་དེར་སྲིད་སྐྱོང་མཆོག་གིས་གྲོས་ཚོགས་འཐུས་མི་རྣམས་ལ་དེང་སྐབས་བོད་ནང་གི་གནས་སྟངས་ཛ་དྲག་ཡོད་སྐོར་ངོ་སྤྲོད་ཞུས་ཡོད་པ་དང་། ལྷག་པར་བོད་ནང་དུ་རང་ལུས་མེར་སྲེག་གི་ལམ་ནས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་གནང་བའི་སྐོར། དེ་བཞིན་བོད་མི་རྣམས་ཀྱིས་བོད་དོན་འཐབ་རྩོད་སྐབས་མཐའ་གཅིག་ཏུ་འཚེ་མེད་ཞི་བའི་ལམ་དུ་བསྐྱོད་རྒྱུའི་ལྷག་བསམ་དང་ཆོད་སེམས་བརྟན་པོ་རྒྱུན་སྐྱོང་བྱེད་བཞིན་ཡོད་སྐོར་དང་། གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་ཀྱི་གནད་དོན་དེ་འཚེ་མེད་ཞི་བ་གྲོས་མོལ་གྱི་ལམ་ནས་སེལ་ཐབས་བྱེད་བཞིན་ཡོད་སྐོར་སོགས་གསལ་བཤད་གནང་འདུག དེ་རྗེས་སྲིད་སྐྱོང་མཆོག་གིས་ཝ་ཤིང་ཊོན་ཌི་སི་ཁུལ་དུ་ས་གནས་བོད་རིགས་རྣམས་ལ་གསུང་བཤད་གནང་ཡོད་པ་བཅས།།
