༢༠༡༥ ཟླ་ ༥ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༡༡ རེས་གཟའ་ཟླ་བའི་ཉིན་དགུང་ཆུ་ཚོད་ ༡༢ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ལྡན་སྟོད་རྒྱུད་གྲྭ་ཚང་དུ་དད་ལྡན་སེར་སྐྱ་ཕོ་མོ་སྟོང་ཕྲག་བརྒལ་བའི་དབུས་རྡུལ་ཚོན་དཀྱིལ་འཁོར་དང་འབྲེལ་བའི་དཔལ་གསང་བ་འདུས་པའི་དབང་གི་སྔོན་འགྲོའི་སྟ་གོན་མཛད། དེ་ཡང་མགོན་པོ་གང་ཉིད་མཆོག་གིས་ཐོག་མར་གསང་སྔགས་ཐེག་པ་སྤྱིའི་སྐོར་བཀའ་སློབ་སྩལ་རྗེས་བྱམས་བརྩེའི་ཉམས་ལེན་གལ་ཆེ་ཡིན་སྐོར་བཀའ་སློབ་སྩལ་དོན།
སེམས་ཅན་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་ཆགས་ཡོད། དེ་བསམ་བློ་གཏོང་དགོས། བྱེ་བྲག་ཏུ་འཛམ་གླིང་འདིའི་སྟེང་ཡོད་པའི་མི་དུང་ཕྱུར་བདུན་ཅུ་ཡོད་པ་ཚང་མ་མི་གཅིག་གྱུར་ཆགས་ཡོད། འཛམ་གླིང་གི་དངོས་ཡོད་གནས་སྟངས་ལ་ཆ་བཞག་ན་མི་དུང་ཕྱུར་བདུན་ཅུས་མི་གཅིག་གྱུར་གྱི་འདུ་ཤེས་བཟུང་ན་གཅིག་གིས་གཅིག་ལ་གསོད་རེ་གཏོང་གི་མ་རེད། ང་ཚོས་མི་གཅིག་མཚུངས་ཡིན་པའི་གལ་ཆེའི་གནད་དོན་དེ་ཕར་བཞག་ནས། ང་ཚོའི་དབར་མི་རིགས་དང་། ལུང་ཚན། ཆོས་ལུགས། སྐད་ཡིག་སོགས་མི་འདྲ་བ་ཡོད་པའི་རིམ་པ་གཉིས་པའི་གནས་སྟངས་དེའི་ཐོག་ཕྱིན་ནས་ང་ཚོ་དང་ཁོ་པ་ཚོ། ཞེས་དབྱེ་མཚམས་ཆེན་པོ་ཕྱེ་ནས་རྙོག་གྲ་བཟོ་བཞིན་ཡོད།
ཆོས་ཡོད་རུང་མེད་རུང་དངོས་ཡོད་གནས་ཚུལ་ལ་ད་ལྟ་འཛམ་གླིང་འདིའི་སྟེང་ཡོད་པའི་རྙོག་གྲ་ཉུང་དུ་གཏོང་རྒྱུར་དཀོན་མཆོག་ལ་སྨོན་ལམ་རྒྱོབས་ཅེས་པ་དེ་ཡག་པོ་རེད། འོན་ཀྱང་དེ་ཙམ་གྱིས་ཕན་རྒྱུ་མེད། སྨོན་ལམ་བརྒྱབས་པ་ཙམ་གྱི་རྙོག་གྲ་སེལ་ཐུབ་ཟེར་རྒྱུ་ཧ་ཅང་ཁག་པོ་རེད། གལ་ཏེ་རྙོག་གྲ་བཟོ་མཁན་དེ་དཀོན་མཆོག་ཡིན་ན་རྙོག་གྲ་མི་ཡོང་བ་ཞིག་གནང་རོགས་ཞེས་བརྗོད་ཆོག་ཀྱང་། རྙོག་གྲ་ཚང་མ་ང་ཚོ་མིས་བཟོས་པ་ཤ་སྟག་རེད། དེར་བརྟེན་དཀའ་ངལ་དེ་ང་ཚོས་སེལ་དགོས་པ་རེད། ང་རང་ཚོའི་དཀའ་ངལ་དེ་སེལ་རྒྱུར་རང་བཞིན་གྱིས་བསམ་བློ་རྒྱ་ཆེ་ས་ནས་བཏང་ན། ང་ཚོ་ཚང་མ་མི་གཅིག་པ་ཡིན། སྡུག་བསྔལ་མི་འདོད་པ་དང་བདེ་བ་འདོད་པ་གཅིག་པ་རེད། ཅེས་བསམ་པ་ཞིག་བྱུང་བ་ཡིན་ན། སོ་སོའི་བློར་མི་འདོད་པའི་མི་གཅིག་བྱུང་བ་ཡིན་ནའང་། ངས་ཁོ་པར་མི་དགའ་བ་བྱེད་རྒྱུ་དེ་གནས་ཚུལ་ཆུང་ཚགས་རེད། གཞི་རྩའི་ཁོ་པ་ཡང་རང་ཉིད་དང་མཚུངས་པར་སྡུག་བསྔལ་མི་འདོད་པ་དང་བདེ་བ་འདོད་མཁན་གཅིག་པ་རེད། བསམ་པའི་བསམ་བློ་འཁོར་བ་ཡིན་ན། མིས་མི་ལ་གནོད་པ་དང་གསོད་རེས་བྱེད་ཀྱི་མ་རེད། འདི་ཧ་ཅང་གལ་ཆེན་པོ་རེད།
ཆོས་ཡོད་རུང་མེད་རུང་གང་ལྟར་སྐྱེས་ནས་ཚེ་རིང་ན་ལོ་བརྒྱ་རེད། ལོ་བརྒྱ་ཙམ་བསྡད་པའི་རིང་ང་ཚོ་འཛམ་གླིང་འདིའི་ནང་སྡོད་རྒྱུ་ལས་གཞན་ཞིག་ལ་འགྲོ་ས་མེད། དེར་བརྟེན་སྡོད་པའི་རིང་དེར་འཆམ་པོ་དང་སྐྱིད་པོ་བྱས་ནས་བསྡད་ན་སྐྱིད་ཀྱི་རེད། ཆུང་ཚགས་གཅིག་གི་ཐོག་ནས་མི་གཅིག་གྱུར་དེ་བརྗེད་ནས་ང་དང་ཁྱོད་ཟེར་ན་ཕན་ཐོགས་གང་ཡང་མེད། དཔེར་ན། འཇིག་རྟེན་བཀོད་པ་པོ་འདོད་མཁན་ཚོར་ཆ་བཞག་ནའང་། འཇིག་རྟེན་བཀོད་པ་པོ་དཀོན་མཆོག་གིས་བཀོད་སྐབས་རྙོག་གྲ་བཟོ་ཆེད་བཀོད་པ་ཞིག་མིན། མིར་རང་བཞིན་ལྷན་སྐྱེས་ཀྱི་བྱམས་བརྩེ་ཡོད་པ་ཞིག་དཀོན་མཆོག་གིས་བཀོད་པ་ཡིན་སྟབས། ང་ཚོས་བྱམས་བརྩེའི་ཉམས་ལེན་བྱས་ཏེ་བྱམས་བརྩེ་ལྡན་པའི་མི་གཅིག་བྱས་ན་དཀོན་མཆོག་གི་དགོངས་པ་སྒྲུབ་ཀྱི་ཡོད། འཇིག་རྟེན་བཀོད་པ་པོའི་རྣམ་གཞག་བཤད་བཞིན་སོ་སོ་རང་ཉིད་ཀྱིས་འཇིག་རྟེན་བཀོད་པ་པོས་གདམས་པའི་བྱམས་བརྩེ་ཉམས་ལེན་མ་བྱས་ན་དོན་གྱིས་དཀོན་མཆོག་ལ་མ་རྩིས་ལྟ་བུ་རེད། འཇིག་རྟེན་བཀོད་པ་པོ་འདོད་མཁན་གྱི་ཆོས་བརྒྱུད་ཚོར་ཆ་བཞག་ནའང་བྱམས་བརྩེའི་ཉམས་ལེན་དེ་གཙོ་བོ་རེད། དེ་ཧ་ཅང་ཕན་ཐོགས་ཆེན་པོ་ཡོད། འཇིག་རྟེན་བཀོད་པ་པོ་མི་འདོད་མཁན་གྱིས་ནང་པ་སངས་རྒྱས་པའི་ཆོས་ལུགས་ཀྱིས་མཚོན་པས་ཁག་གཅིག་གིས་རྒྱུ་དང་འབྲས་བུའི་རྣམ་གཞག་ཐོག་ནས་རང་གིས་གཞན་ལ་ཕན་ཐོགས་ན་རང་ལ་བདེ་སྐྱིད་ཡོང་རྒྱུ་དང་། གཞན་ལ་གནོད་པ་བྱས་ན་རང་ལ་སྡུག་བསྔལ་ཡོང་རྒྱུ་ཡིན་པར་འདོད་བཞིན་ཡོད། དེ་དངོས་ཡོད་གནས་ཚུལ་ཡང་ཡིན། རྒྱུ་མཚན་དེ་ལ་བརྟེན་ནས་གཞན་ལ་བརྩེ་བ་དང་ཕན་སེམས་སྐྱེ་དགོས་ཀྱི་རེད་ཅེས་བརྗོད་བཞིན་ཡོད། གང་ལྟར་ཕན་པའི་བསམ་བློ་ཞེས་པ་དེ་བདེ་སྐྱིད་ཀྱི་རྩ་བ་རེད། ཕན་པའི་བསམ་བློ་ཟེར་དུས་གཞན་ལ་ཕན་པ་ཙམ་མ་རེད། སོ་སོ་ཡང་སྐྱིད་པ་ཡོང་གི་ཡོད།
ཇི་ཙམ་གྱིས་ང་བསམས་ནས་རང་གཅེས་འཛིན་བསམས་ནས་བསྡད་ན་ཁ་ཆག་སྣ་རལ་གྲ་མ་འགྲིག་ཧ་ཅང་མང་པོ་ཡོང་གི་ཡོད། བདེ་སྡུག་ལ་གཙོ་བོ་ལུས་ཤེས་དང་འབྲེལ་བའི་ལུས་ཚོར་གྱི་བདེ་སྡུག་གཅིག དེ་ལྟ་བུའི་སྡུག་བསྔལ་ཉུང་དུ་དང་བདེ་བ་མང་དུ་གཏོང་རྒྱུ་དེ་དངོས་པོ་ཡར་རྒྱས་ཀྱི་ཐོག་ནས་ཡོང་བཞིན་ཡོད། ཡིད་བློའི་སྟེང་ནས་བདེ་སྡུག་གི་ཚོར་བ་ཤུགས་དྲག་པོ་ཡོད་པ་དེ་ཡིད་བློ་ཁོ་ནའི་སྟེང་ནས་སེལ་ཐབས་བྱེད་དགོས་པ་རེད་མ་གཏོགས། ཕྱི་དངོས་པོས་ཡིད་བློའམ་བསམ་བློའི་ནང་གི་སྡུག་བསྔལ་ཉུང་དུ་གཏོང་རྒྱུ་དང་བདེ་བ་མང་དུ་གཏོང་ཐུབ་ཐབས་མེད། དངོས་པོ་ཇི་ཙམ་གྱི་ཡར་རྒྱས་ཕྱིན་པ་དེ་ཚོད་ཀྱིས་འདོད་རྔམ་ཆེ་རུ་ཕྱིན་པ་དང་། འདོད་རྔམ་ཇི་ཙམ་ཆེ་རུ་ཕྱིན་པ་དེ་ཚོད་ཀྱི་ཕྲག་དོག་དང་འདོད་རྔམ། འགྲན་སེམས་ཤུགས་ཆེ་རུ་ཕྱིན། ཕྲག་དོག་དང་འགྲན་སེམས། ཆོག་ཤེས་མེད་པའི་བློས་ག་དུས་ཡིན་རུང་མ་འགྲིག་པ་ཤ་སྟག་བློར་འཁོར་བསྡད་པ་ཞིག་དང་མ་སྐྱིད་པ་ཡོང་གི་ཡོད། དེར་བརྟེན་ང་ཚོས་ཡིད་བློའི་བདེ་སྡུག་དང་། སྒོ་ལྔའི་ཤེས་པའི་སྟེང་གི་བདེ་སྡུག་གཉིས་བསྡུར་ན་ཡིད་བློའི་སྟེང་གི་སྡུག་བསྔལ་དེ་ཞེ་དྲག་ཤུགས་ཆེ་བ་ཡོད། སེམས་ཀྱི་དཀའ་ངལ་ཡོད་ན་ལུས་པོའི་མཐུན་རྐྱེན་གྱིས་དཀའ་ངལ་དེ་སེལ་ཐུབ་ཀྱི་མེད། སེམས་ལྷོད་ལྷོད་སྡོད་རྒྱུ་ཡོད་པ་དང་། སྤྲོ་བ་དང་སྤོབས་པ་ཡོད་ན་ལུས་པོའི་དཀའ་ངལ་ཡོན་ནའང་སྐབས་རེ་དཀའ་ངལ་དྭང་དུ་བླངས་ཐུབ། སྡུག་བསྔལ་དང་ལེན་ཞེས་པ་དེ་བསམ་བློ་གཏོང་སྟངས་ཤིག་གི་ཐོག་ནས་ཡིད་བློ་ཚིམ་པ་གཅིག་ཡོང་དུས་སྡུག་བསྔལ་དྭང་དུ་བླངས་རྒྱུ་དང་རྐྱེན་ངན་གྲོགས་སུ་ཤར་བ་སོགས་ཡོང་གི་ཡོད། ང་ཚོ་མིར་དལ་བ་དང་འབྱོར་བ་ཞེས་བཤད་པ་བཞིན། མིར་རྣམ་དཔྱོད་ཡོད་པ་དེས་བསམ་བློ་རླབས་ཆེན་པོ་དང་རྒྱ་ཆེན་པོ་ཡོད་པ་དེ་དུད་འགྲོ་གཞན་གྱིས་བསམ་བློ་འཁོར་མ་ཐུབ་པ་དེ་ང་ཚོས་བྱེད་ཐུབ་རྒྱུ་ཞིག་ཡོད། དེ་བྱེད་དགོས་པ་ཞིག་རེད། དེར་བརྟེན་ཆོས་ཡོད་མཁན་དང་མེད་མཁན་སུ་ཡིན་རུང་འདི་ནི་ཀུན་ལ་ཁྱབ་པ་དང་ཀུན་ལ་དགོས་མཁོ་ཡོད་བསྡད་པ་ཞིག་རེད། ད་ལྟ་ཞུ་རྒྱུ་འདི་ཐེག་ཆེན་སེམས་བསྐྱེད་ཟེར་ཡག་འདི་རེད། དེ་འདྲའི་བསམ་བློ་དེ་གཅིག་ནས་ཀུན་ལ་ཕན་བདེ་བསྒྲུབ་རྒྱུའི་བློ་དང་།
གཉིས་ནས་ཤེས་རབ་ཀྱི་གྲོགས་བྱས་ནས་བྱང་ཆུབ་ཟེར་རྒྱུ་དེ་ཤེས་རབ་ཀྱིས་བྱང་ཆུབ་ལ་དམིགས། སྙིང་རྗེས་སེམས་ཅན་ལ་དམིགས། བྱང་ཆུབ་དེ་ད་གིན་ཞུས་བསྡད་པ་དེ་རེད། དེ་ལྟ་བུའི་བྱང་ཆུབ་དེར་ཤེས་རབ་ཀྱི་ངོ་ཆ་འཕྲོད་པའི་ཐོག་ནས་སྡུག་བསྔལ་མནར་ནས་ཡོད་པ་དེ་སྡུག་བསྔལ་རྒྱུ་དང་བཅས་ལ་ལས་བྲལ་ནས་གཏན་དུ་བདེ་བ་ཡོང་ཐུབ་པ་བྱེད་ཨང་། བསམས་པའི་བློ་ཞིག་ཡོད། འདིས་རང་གཅིག་པུར་བསམས་པ་མིན་པར་མཐའ་ཡས་སེམས་ཅན་མཐའ་དག་ལ་ཕན་པ་བསྒྲུབ་འདོད་ཀྱི་བློ་ཞིག་བྱུང་ན། ཕན་པ་བསྒྲུབ་ཟེར་རྒྱུ་དེ་འཕྲལ་སེལ་གྱི་ལྟོ་གོས་དང་བཀྲེས་སྐོམ་གྱི་སྡུག་སྔལ་མི་ཡོང་བ་དང་། དེ་བཞིན་ནད་ན་ཚ་མི་ཡོང་བ་དེ་ཁོ་ན་མིན་པར། གང་ལྟར་སེམས་ཀྱི་ཞི་བདེ་ཡག་པོ་ཡོང་ཐུབ་པ་ཞིག་དགོས། སེམས་ཀྱི་ཞི་བདེ་ཡོང་རྒྱུར་གཙོ་བོ་བྱམས་བརྩེ་དེ་རེད་འདུག བྱམས་བརྩེ་ཡོད་ན་ཞི་བདེ་ཡོང་རྒྱུ་རེད། ཞི་བདེ་དཀྲུག་མཁན་དེ་ཕྲག་དོག་དང་ཞེ་སྡང་། འཇིགས་སྣང་རེད། འཇིགས་སྣང་ཡོང་རྒྱུ་དེ། ང་། ཞེས་པ་དེར་ཧ་ཅང་གཙིགས་ཆེན་པོར་འཛིན་པ་དེས་འཇིགས་སྣང་ཡོང་གི་ཡོད། ཅེས་སོགས་ཀྱི་བཀའ་སློབ་སྩལ་རྗེས་དགེ་བསྙེན་གྱི་སྡོམ་པ་འབོགས་ཆོག་མཛད། དེ་རྗེས་རྡུལ་ཚོན་དཀྱིལ་འཁོར་དང་འབྲེལ་བའི་དཔལ་གསང་བ་འདུས་པའི་དབང་གི་སྔོན་འགྲོའི་སྟ་གོན་མཛད།།
