༢༠༡༥ ཟླ་ ༥ ཚེས་ ༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༦ ཉིན་ཡུ་རོབ་མཐུན་ཚོགས་ཀྱི་ཆབ་སྲིད་ཚོགས་པ་ཁག་དྲུག་གི་གྲོས་ཚོགས་འཐུས་མི་ ༥༢ ནས་ས་རྟགས་བཀོད་པའི་ཞུ་ཡིག་ཞིག་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་དོན་དང་བདེ་འཇགས་ཀྱི་ཆེས་མཐོའི་སྐུ་ཚབ་ལྕམ་སྐུ་ ཕེ་ཌེ་རི་ཀ་མོ་གེ་ཧེ་རི་ནི་ (Mrs. Federica Mogherini) མཆོག་ལ་ཕུལ་ནས། ལྕམ་སྐུ་མཆོག་ཕྱི་ཟླ་ ༥ ཚེས་ ༥།༦ བཅས་ཉིན་གཉིས་རིང་རྒྱ་ནག་ཏུ། ཡུ་རོབ་མཐུན་ཚོགས་དང་རྒྱ་ནག་མི་མང་སྤྱི་མཐུན་རྒྱལ་ཁབ་གཉིས་དབར་གྱི་འཐབ་བྱུས་གླེང་མོལ་ཐེངས་ལྔ་པ། ཞེས་པའི་ཚོགས་འདུའི་ཆེད་རྒྱ་ནག་གི་རྒྱལ་ས་པེ་ཅིང་དུ་ཕེབས་སྐབས་རྒྱ་ནག་གཞུང་གི་འགོ་ཁྲིད་ཚོ་དང་ལྷན་བོད་ཀྱི་གནད་དོན་གླེང་སློང་གནང་དགོས་པའི་རེ་འདུན་ཞུས་འདུག
དེ་ཡང་ཞུ་ཡིག་ནང་འཁོད་དོན། བོད་ནང་ཞི་བའི་ངོ་རྒོལ་གནང་མཁན་གྱི་བོད་མི་རྣམས་རྒྱ་ནག་གཞུང་གིས་ཁྲིམས་འགལ་དོ་དམ་དང་། འཛིན་བཟུང་། མནར་གཅོད་གཏོང་བ་སོགས་ལ་བློ་འཚབ་ཆེན་པོ་ཡོད་སྐོར་དང་། ཕྱི་ལོ་ ༢༠༡༤ ཕྱི་ཟླ་ ༧ ཚེས་ ༡ ཉིན་ཡུ་རོབ་གྲོས་ཚོགས་གསར་པ་འདེམས་ཐོན་བྱུང་ཉིན་ནས་ད་བར་རྒྱ་ནག་གཞུང་གིས་བོད་མི་ ༢༠༤ འཛིན་བཟུང་ངམ་བཙོན་འཇུག་བྱས་ཡོད་པ་དང་། བོད་མི་ ༦ བཙོན་ཁང་ནང་དང་། ཡང་ན་བཙོན་ཁང་ནས་གློད་བཀྲོལ་ཐོབ་ཀྱང་ལུས་པོ་ནད་གཅོང་ཆགས་ནས་འདས་གྲོངས་སུ་གྱུར་བ། དེ་བཞིན་བོད་མི་ ༧ ནས་རང་ལུས་མེར་སྲེག་གིས་བོད་ནང་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་རྔམ་སྟོན་བྱས་ཡོད་སྐོར་སོགས་ཀྱི་གནད་དོན་ཁག་གཅིག་བཅས་འཁོད་འདུག
འདི་ནི་ལྕམ་སྐུ་ ཕེ་ཌེ་རི་ཀ་མོ་གེ་ཧེ་རི་ནི་ མཆོག་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་དོན་དང་བདེ་འཇགས་ཀྱི་ཆེས་མཐོའི་སྐུ་ཚབ་ཏུ་བདམས་ཐོན་བསྐོ་གཞག་བྱུང་ནས་རྒྱ་ནག་ཏུ་ཕེབས་ཐེངས་དང་པོ་དེ་ཆགས་ཡོད། ཡུ་རོབ་གྲོས་ཚོགས་འཐུས་མི་རྣམས་ཀྱིས་ཞུ་ཡིག་དེའི་ནང་དེ་སྔ་ཕྱི་ལོ་ ༢༠༡༢ ལོར་ཡུ་རོབ་གྲོས་ཚོགས་ནང་བོད་དོན་རྒྱབ་སྐྱོར་གྱི་གྲོས་ཆོད་བཞག་པ་རྣམས་དྲན་སྐུལ་ཞུས་པ་དང་སྦྲགས། གྲོས་ཆོད་དེའི་དོན་ཚན་གཅིག་ནི།
ཡུ་རོབ་མཐུན་ཚོགས་ཀྱི་ཕྱི་འབྲེལ་ལས་དོན་གྱི་ཆེས་མཐོའི་སྐུ་ཚབ་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་བཀའ་མོལ་ནམ་བྱུང་སྐབས་བོད་ཀྱི་གནད་དོན་གླེང་སློང་དགོས་པ་དེ་ཡིན། གྲོས་ཚོགས་འཐུས་མི་ ༥༢ ནས་ད་དུང་ལྕམ་སྐུ་མཆོག་ལ་ཕུལ་བའི་ཞུ་ཡིག་དེའི་ནང་བོད་རྒྱའི་དཀའ་རྙོག་ཞི་བའི་ཐོག་ནས་སེལ་ཐབས་ཆེད་ལྕམ་སྐུ་མཆོག་ནས་རྒྱ་ནག་གཞུང་ལ་བོད་རྒྱ་ཞི་མོལ་སླར་གསོ་ཡོང་བའི་རེ་འདུན་འདོན་རྒྱུ་དང་། རྒྱ་ནག་གཞུང་གིས་༸གོང་ས་མཆོག་གི་སྐུ་ཚབ་དང་ལྷན་དུ་ཞི་མོལ་བསྐྱར་འཛུགས་དགོས་པའི་རེ་འདུན་ཡང་བཏོན་འདུག
ཕྱོགས་མཚུངས་བོད་མིའི་ཐུན་མིན་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་སླད་དོན་ཕན་ལྡན་པའི་འབྲེལ་མོལ་གནང་དགོས་པ་རྒྱ་ནག་གཞུང་ལ་རེ་འདུན་འདོན་རོགས། ཞེས་ཞུ་ཡིག་དེའི་ནང་གསལ་འདུག ཕྱི་ལོ་ ༢༠༡༠ ལོར་བོད་རྒྱ་འབྲེལ་མོལ་མཐའ་མ་བྱུང་བ་ནས་ཟུང་ད་བར་གཞུང་འབྲེལ་གྱི་འབྲེལ་མོལ་འགོ་འཛུགས་བྱེད་ཐུབ་མེད་པ་དང་། གྲོས་ཚོགས་འཐུས་མི་རྣམ་པས་ཞུ་ཡིག་དེའི་ནང་རྒྱ་ནག་གཞུང་གིས་བོད་མིའི་གཞི་རིམ་གྱི་ཐོབ་ཐང་སྨྲ་བརྗོད་རང་དབང་དང་། ཞི་བའི་འདུ་འཛོམས། ཆོས་ལུགས་རང་དབང་བཅས་སྲུང་སྐྱོབ་བྱེད་དགོས་པ་དང་། བོད་ནང་དམ་བསྒྲགས་ཅན་གྱི་སྲིད་བྱུས་མུ་མཐུད་ལག་བསྟར་བྱེད་བཞིན་པ་དེ་དག་འཕྲལ་མར་མཚམས་འཇོག་དགོས་པ་དང་། དེ་བཞིན་ཕྱི་ལོ་ ༡༩༩༥ ཟླ ༥ ཚེས་ ༡༧ ཉིན་རྒྱ་ནག་གཞུང་གིས་བཙན་འཁྲིད་བྱས་པའི་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གིས་དབུས་པའི་བོད་མི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་གཏོང་དགོས་སྐོར་སོགས་འཁོད་འདུག
སྤྱིར་ཕྱི་ལོ་ ༢༠༡༢ ལོར་སྲིད་སྐྱོང་མཆོག་གིས་ལྕམ་སྐུ་ཕེ་ཌེ་རི་ཀ་མོ་གཧེ་རི་ནི་མཆོག་གི་ལས་ཁུངས་ སུ་བཅར་ནས་མཇལ་འཕྲད་གནང་ཡོད་པ་མ་ཟད།
ཕྱི་ལོ་ ༢༠༡༤ ཟླ་ ༡༠ ཚེས་ ༣༠ ཉིན་སྲིད་སྐྱོང་བློ་བཟང་སེང་གེ་མཆོག་གིས་ལྕམ་སྐུ་ ཕེ་ཌེ་རི་ཀ་མོ་གཧེ་རི་ནི་ (Mrs. Federica Mogherini) མཆོག་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་དོན་དང་བདེ་འཇགས་ཀྱི་ཆེས་མཐོའི་སྐུ་ཚབ་ཏུ་བསྐོ་གཞག་བྱུང་བར་དགའ་བསུའི་འཚམས་འདྲི་ཡང་ཞུས་ཡོད་འདུག
