༢༠༡༥ ཟླ་ ༤ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༢༢ ཕྱེད་ཡོལ་ཆུ་ཚོད་ ༦ ཙམ་ལ་བོད་མིའི་སྒྲིག་འཛུགས་བཀའ་ཤག་གིས་ལྷོ་ཨ་ཕི་རི་ཀ་ནས་ཕེབས་པའི་ཡི་ཤུའི་བླ་ཆེན་སྐུ་ཞབས་ཌེ་སི་མོན་ཊུ་ཊུ་མཆོག་ལ་གསོལ་སྟོན་དང་གཞས་སྣ་འཁྲབ་སྟོན་གཟིགས་འབུལ་ཞུས་འདུག
སྐབས་དེར་བླ་ཆེན་མཆོག་དང་ཁོང་གི་སྲས་མོ་ལྕམ་མ་པུ་མཆོག དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། དགའ་ལྡན་ཕོ་བྲང་ཡིག་ཚང་གི་དྲུང་ཆེ་དང་། ༸གོང་ས་མཆོག་གི་སྐུའི་གསུང་བསྒྱུར་བ་སོགས་ཀྱང་ཕེབས་འདུག སྐབས་དེར་བོད་ཀྱི་ཟློས་གར་ཚོགས་པའི་སློབ་ཕྲུག་རྣམས་ཀྱིས་ཐོག་མར་བླ་ཆེན་མཆོག་ལ་བོད་ལུགས་ལྟར་གྲོ་གསོ་ཕྱེ་མར་དང་ཆང་ཕུད་ལམ་ནས་ཕེབས་བསུ་གཟབ་རྒྱས་ཞུས།
དེ་རྗེས་ཚོགས་ཁང་ནང་བོད་ཀྱི་སྲོལ་རྒྱུན་གྱི་གཞས་སྣ་ཁག་གཅིག་དང་གངས་སེང་སོགས་འཁྲབ་སྟོན་གཟིགས་འབུལ་ཞུས་པར། བླ་ཆེན་མཆོགནང་མི་འཁོར་དང་བཅས་པ་ཐུགས་ཧ་ཅང་དགྱེས་གནང་མཛད་པ་མ་ཟད། བླ་ཆེན་ཊུ་ཊུ་མཆོག་སྡིངས་ཆའི་ཐོག་ཕེབས་ནས་བོད་མི་ཚོས་འདས་པའི་མི་ལོ་ལྔ་བཅུ་ལྷག་རིང་རང་གི་སྲོལ་རྒྱུན་མི་ཉམས་རྒྱུན་འཛིན་གནང་ནས་མི་རབས་ནས་མི་རབས་བརྒྱུད་འཛིན་ཐུབ་པ་ནི་བློ་སློབས་བྱ་ཡུལ་ཞིག་ཡིན་སྐོར་གསུངས་པ་དང་སྦྲགས། ཡིད་རང་བསྔགས་བརྗོད་གནང་འདུག
གཞས་སྣ་འཁྲབ་སྟོན་ལེགས་པར་གྲུབ་བསྟུན། བླ་ཆེན་མཆོག་དང་སྲིད་སྐྱོང་མཆོག གཞས་སྣ་འཁྲབ་སྟོན་པ། དེ་བཞིན་ཟློས་གར་འགན་འཛིན་བཅས་ལྷན་རྒྱས་སྐུ་པར་ལྷན་སྒྲོན་གནང་། དེ་ནས་སྐུ་མགྲོན་རྣམ་པར་ཟློས་གར་ཚོགས་པའི་གཟིམ་སྦུག་ཏུ་གསོལ་སྟོན་འབུལ་ལམ་ཞུས་འདུག་པ་བཅས།།
