༢༠༡༥ ཟླ་ ༤ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་རྒྱལ་ས་ཊོཀ་ཁྱོའི་ནང་རྟེན་གཞི་བྱས་པའི་ཤོ་ཝ་ཇོ་ཤི་བུད་མེད་མཐོ་སློབ་ Showa Joshi Women’s University ཀྱི་ཚོགས་ཁང་ཆེན་མོའི་ནང་སྒོམ་རིམ་བར་མའི་བཀའ་ཆོས་དང་སྤྱན་རས་གཟིགས་ཀྱི་བཀའ་དབང་སྩལ་ཡོད། དེ་ཡང་སྔ་དྲོ་ཐོག་མར་༸གོང་ས་མཆོག་གིས་རྡུལ་མཚོན་དཀྱིལ་འཁོར་དང་སྤྱན་རས་གཟིགས་ཕྱག་སྟོང་སྤྱན་སྟོང་གི་སྐུ་ཐང་རྟེན་གཙོའི་མདུན་དུ་བསྒྲུབ་བཞག་མཛད། དེ་ནས་ཚོགས་ཁང་ནང་དད་ལྡན་ཆོས་ཞུ་བ་རྣམས་ཀྱིས་ཐོག་མར་ཉི་ཧོང་སྐད་ཐོག་ཤེས་རབ་སྙིང་པོ་གསུང་འདོན་གནང་། དེ་ནས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། སྔ་དྲོ་ཐོག་མར་དབང་བྱེད་རྒྱུ་རེད། སྔགས་ཀྱི་ཉམས་ལེན་བྱེད་མཁན་ཡིན་ན་དབང་དེ་གལ་ཆེན་པོ་རེད།
སྤྱིར་བརྒྱུད་སྡེ་གཞན་དང་གཞན་དུ་དབང་གི་ཐབས་ལམ་འདི་ལྟ་བུ་ཉམས་ལེན་གནང་བཞིན་ཡོད་ཀྱང་ནང་པ་སངས་རྒྱས་པའི་སངས་སྔགས་ཀྱི་ཉམས་ལེན་ནང་ཐུན་མོང་མིན་པའི་ཁྱད་ཆོས་གང་ཡོད་བརྗོད་ན། བྱམས་སྙིང་རྗེ་བྱང་ཆུབ་ཀྱི་སེམས་དང་སྟོང་ཉིད་རྟོགས་པའི་ཤེས་རབ་ཟུང་འབྲེལ་ཐོག་ནས་འགྲོ་དགོས། དེ་བཞིན་སྔགས་ཀྱི་ཉམས་ལེན་ནང་ཤེས་པ་ཕྲ་མོའི་རྣམ་གཞག་སྐོར་གསུང་བཞིན་ཡོད། ཤེས་པ་ཕྲ་ཤོས་ནི་གདོད་མའི་སེམས་རང་བཞིན་གྱི་འོད་གསལ་བ་དེ་ཡིན། དེར་ཁམས་བདེ་གཤེགས་སྙིང་པོ་ཡང་བརྗོད། དེ་ལྟ་བུའི་གཉུག་མའི་སེམས་དེ་མཐར་སངས་རྒྱས་ཀྱི་གཟུགས་སྐུའི་ངོ་བོར་གྱུར་རྒྱུ་རེད། རྒྱུད་ཀྱི་ཐེག་པའམ་རྡོ་རྗེའི་ཐེག་པ་དེར་ཡིད་ཀྱི་ཐེག་པའང་གསུང་བཞིན་ཡོད། གང་ཡིན་བརྗོད་ན་ཐེག་པ་དེས་ཡིད་སྐྱོབ་པ་བྱེད་ཀྱི་ཡོད། ཅེས་སོགས་ཀྱི་བཀའ་ཆོས་སྩལ་གྲུབ་རྗེས་རྡོ་རྗེ་དྲིལ་བུ་གཉིས་ཀྱི་མཚོན་དོན་སྐོར་བཀའ་སློབ་སྩལ་དོན། རྡོ་རྗེས་ཐབས་བདེ་བ་ཆེན་པོའི་ཡེ་ཤེས་དང་། དྲིལ་བུས་སྟོང་ཉིད་རྟོགས་པའི་ཤེས་རབ་མཚོན། ཞེས་སོགས་ཀྱི་བཀའ་སློབ་སྩལ་བསྟུན་དབང་དངོས་གཞི་སྩལ།
ཉིན་དགུང་ལྗགས་སྨིན་གྲུབ་བསྟུན། ༸གོང་ས་མཆོག་གིས་རྒྱ་རིགས་ནང་པ་རྣམས་ལ་མཇལ་ཁ་དང་བཀའ་སློབ་སྩལ་དོན། དེང་སྐབས་རྒྱ་ནག་ནང་རྒྱ་རིགས་ནང་པ་ས་ཡ་བཞི་བརྒྱ་ཙམ་ཡོད་པའི་ཚོད་དཔག་བྱེད་བཞིན་ཡོད། རྒྱ་ནག་ནི་ནང་པའི་རྒྱལ་ཁབ་གཅིག་ཡིན། ངོས་རང་རྒྱ་ནག་ཏུ་ཕྱི་ལོ་ ༡༩༥༤།༡༩༥༥ ལོར་སྡོད་རིང་ནང་པའི་དགོན་པ་མང་པོ་མཇལ་རྒྱུ་འདུག དེ་རྗེས་དམར་ཤོག་དབང་འཛིན་པ་ཚོས་ཆོས་རྩ་མེད་བཟོ་ཐབས་བྱས་ཀྱང་ལམ་ལྷོང་བྱུང་མེད། ཆོས་ཀྱིས་མིའི་སེམས་ལ་ཞི་བདེ་སྐྲུན་རྒྱུར་ཕན་ཐོགས་ཡོད། ཆོས་ལུགས་མང་པོ་ཞིག་དད་པ་གཙོ་བོ་བྱས་ནས་འགྲོ་གི་ཡོད། ནང་པ་སངས་རྒྱས་པ་ལ་དམིགས་བསལ་ཁྱད་ཆོས་གང་ཡོད་བརྗོད་ན་དད་པ་གཙོ་བོར་མིན་པར་རྒྱུ་མཚན་གཙོ་བོར་བྱས་ནས་འགྲོ་གི་ཡོད། ངོས་ཀྱིས་འདས་པའི་ལོ་ ༣༠ ལྷག་གི་རིང་ཚན་རིག་པ་དང་ལྷན་བགྲོ་གླེང་བྱས་པ་དེས་ཕྱོགས་གཉིས་ཀར་ཕན་ཐོག་ཧ་ཅང་འདུག དཔེར་ན། ཆོས་མངོན་པའི་ནང་འཇིག་རྟེན་ཁམས་ཀྱི་རྣམ་གཞག་སྐོར་གསུངས་པ་དེ་དག་ནོར་བ་ཞིག་ཡིན་པ་དེང་སྐབས་ཚན་རིག་པས་ར་སྤྲོད་གསལ་པོ་བྱེད་བཞིན་ཡོད། ངོས་རང་གནད་དོན་དེའི་ཐོག་ཚན་རིག་པས་གང་འགྲེལ་བཤད་བརྒྱབ་པ་དེར་ཡིད་ཆེས་བྱེད་བཞིན་ཡོད། ཚན་རིག་པ་ཚོས་ནང་པ་སངས་རྒྱས་པའི་གཞུང་ནས་བློའི་རྣམ་གཞག་སྐོར་དཔེར་ན། ཤེས་པའི་ངོ་བོ་དང་བྱེད་ལས་སོགས་ཀྱི་གསུངས་པ་དེར་ཧ་ཅང་ཡིད་དབང་འཕྲོག་བཞིན་ཡོད། ཅེས་སོགས་ཀྱི་བཀའ་སློབ་སྩལ།
ཕྱེད་ཡོལ་༸གོང་ས་མཆོག་གིས་ཆོས་འབྲེལ་འཕྲོ་སྐྱོང་མཛད་པ་མ་ཟད། སྤྱན་རས་གཟིགས་ཞལ་གཅིག་ཕྱག་གཉིས་ཀྱི་བཀའ་དབང་སྩལ། ཕྱོགས་མཚུངས་སྐབས་དེར་༸གོང་ས་མཆོག་གིས་སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་མའི་བཀའ་ཆོས་སྩལ་མཐར་མགོན་པོ་གང་ཉིད་མཆོག་གིས་༸རྒྱལ་མཆོག་སྐུ་ཕྲེང་གཉིས་པ་དགེ་འདུན་རྒྱ་མཚོ་མཆོག་གིས་མཛད་པའི་སྙིང་པོ་དོན་གསུམ་གྱི་འགྲེལ་བཤད་མཛད་ནས་ཐེངས་འདིར་ཉི་ཧོང་གི་མཛད་འཕྲིན་རྣམས་རེ་ཞིག་ལེགས་པར་མཇུག་སྒྲིལ་མཛད་ནས་ཕྱི་ཚེས་ ༡༤ ཉིན་རྒྱ་གར་ལ་ཆིབས་ཞལ་བསྒྱུར་ཡོད།
