༢༠༡༥ ཟླ་ ༤ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་རྒྱལ་ས་ཊོཀ་ཁྱོའི་ནང་རྟེན་གཞི་བྱས་པའི་ཤོ་ཝ་ཇོ་ཤི་བུད་མེད་མཐོ་སློབ་ Showa Joshi Women’s University 
ཀྱི་ཚོགས་ཁང་ཆེན་མོའི་ནང་རྒྱ་རིགས་དང་སོག་རིགས། ཀོ་རི་ཡ། དེ་བཞིན་ཉི་ཧོང་པ་བཅས་ཁྱོན་མི་གྲངས་ ༢༡༠༠ བརྒལ་བར་ཤེས་རབ་སྙིང་པོ་དང་། བྱམས་ཆུབ་སེམས་འགྲེལ། དེ་བཞིན་སྒོམས་རིམ་བར་པ་སོགས་ཀྱི་ཆོས་འབྲེལ་སྩལ་འདུག དེ་ཡང་དེ་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཀོ་རི་ཡ་ནས་དད་ལྡན་ཆོས་ཞུ་བ་གྲངས་ ༣༧༠ དང་། ཐེ་ཝན་དང་རྒྱ་ནག་སྐམ་ས་ནས་རྒྱ་རིགས་གྲངས་ ༡༠༠༠ ཙམ། དེ་བཞིན་སོག་རིགས་གྲངས་ ༡༢༠ དང་ཉི་ཧོང་པ་བཅས་ཀྱིས་ཇི་ལྟར་སྔོན་ནས་གསོལ་འདེབས་ཞུས་པ་ལྟར་བཀའ་བཞེས་བཟང་པོ་སྨིན་སྩལ་གྱིས་ཆོས་འབྲེལ་དབུ་འཛུགས་མཛད།
སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། ང་ཚོ་མང་པོ་ཞིག་གིས་ཤེས་རབ་སྙིང་པོ་འདོན་གྱི་ཡོད། དེ་རིང་ང་ཚོས་ཤེས་རབ་སྙིང་པོ་ཀོ་རི་ཡའི་སྐད་ནང་འདོན་རྒྱུ་དང་སང་ཉིན་ཉི་ཧོང་སྐད་ནང་འདོན་རྒྱུ་ཡིན། ཞེས་བཀའ་སློབ་སྩལ་རྗེས་ཤེས་རབ་སྙིང་པོ་གསུང་འདོན་མཛད། 
དེ་རྗེས་༸གོང་ས་མཆོག་གིས་བཀའ་སློབ་ལམ་སྟོན་མཛད་པ་ལྟར་རྒྱ་རིགས་ཚོས་རྒྱ་སྐད་ཐོག་ཤེས་རབ་སྙིང་པོ་བཏོན། དེ་ནས་༸གོང་ས་མཆོག་གིས་བསྟན་ཆོས་མངོན་རྟོགས་རྒྱན་དང་དབུ་མ་རྩ་བ་ཤེས་རབ་ནས་གསུང་པའི་སྟོན་པའི་བསྟོད་ཕྱག་མངོན་དུ་མཛད་བསྟུན། བཀའ་ཆོས་དབུ་འཛུགས་མཛད་དོན། དེ་རེས་ཉིན་གཉིས་རིང་གི་ཆོས་འབྲེལ་སྐབས་འདིར་ཉི་ཧོང་པ་དང་ཀོ་རི་ཡ། དེ་བཞིན་སོག་རིགས་དང་ཐེ་ཝན་སོགས་ནས་རྒྱ་རིགས་ཆོས་གྲོགས་ཕོ་མོ་ཚོ་དང་མཇལ་བར་དགའ་པོ་བྱུང་། ཚོགས་ཁང་འདི་ཤོ་ཝ་ཇོ་ཤི་བུད་མེད་མཐོ་སློབ་གཅིག་གི་ཡིན་སྟབས་ཤེས་རབ་སྙིང་པོའི་ཆོས་འབྲེལ་བྱེད་ཡུལ་གྱི་གནས་རན་པོ་ཞིག་མཐོང་བྱུང་། གང་ཡིན་བརྗོད་ན་ཤེར་ཕྱིན་ལ་ཡུམ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བརྗོད་ཀྱི་ཡོད། རྒྱལ་བ་ཐམས་ཅད་ཀྱི་ཡུམ་ལྟ་བུར་ཤེར་ཕྱིན་དེར་ངོས་འཛིན་ཞུ་བཞིན་ཡོད། ཆོས་འབྲེལ་འདི་ཚོགས་ཁང་འདི་ཙམ་མ་ཟད། ཉི་ཧོང་གི་གློག་བརྙན་སྟོན་སའི་ཚོགས་ཁང་ཁྱོན་ ༣༩ ནང་ཐད་ཀར་དྲ་རྒྱའི་ལམ་ནས་རྒྱང་སྲིང་ཞུ་བཞིན་ཡོད་པ་ངོས་ཀྱིས་ཤེས་རྟོགས་བྱུང་།
དེར་བརྟེན་ཁྱེད་ཚོ་ཚང་མར་དགའ་བསུའི་འཚམས་འདྲི་ཞུ་རྒྱུ་ཡིན། སངས་རྒྱས་ཀྱིས་ཆོས་ཐམས་ཅད་སྒྱུ་མ་ལྟ་བུ་ཡིན་པ་གསུངས་ཡོད། དེ་དྲན་གསོ་གཏོང་མཁན་ལྟ་བུ་ཁྱེད་ཚོས་ངོས་ཀྱི་གཟུགས་བརྙན་སྒྱུ་མ་ལྟ་བུ་དེར་གཟིགས་ནས་ཡག་པོ་ཉོན་ཤོག་ཨང་། ཞེས་བཀའ་སྩལ་བ་དང་སྦྲགས་ཆོས་འབྲེལ་དབུ་འཛུགས་མཛད། ཕྱི་ཚེས་ ༡༣ ཉིན་༸གོང་ས་མཆོག་གིས་སྤྱན་རས་གཟིགས་ཀྱི་བཀའ་དབང་སྩལ་རྒྱུ་ཡིན་འདུག
