༢༠༡༥ ཟླ་ ༤ ཚེས་ ༧ རེས་གཟའ་མིག་དམར།
གྲོས་ཚོགས་འཐུས་མི་རྣམས་དང་ལྷན།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༦ ཉིན་ཉི་ཧོང་གི་རྒྱལ་ས་ཊོཀ་ཁྱོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཡུལ་དེའི་གྲོས་ཚོགས་འཐུས་མི་ཁག་གཅིག་དང་མཇལ་མོལ་མཛད། ཉིན་དགུང་ལྗགས་སྨིན་
གྲུབ་བསྟུན་མགོན་པོ་གང་ཉིད་མཆོག་གིས་འབྱུང་འགྱུར་མི་རབས་རྣམས་ཀྱི་ཆེད་གོ་ལ་སྲུང་སྐྱོབ་ཀྱི་རྒྱལ་སྤྱིའི་ཁོར་ཡུག་ལྷན་ཚོགས་ཀྱི་གླེང་སྟེགས་ Global Environmental Forum for the Next Generation ཐོག་ཆིབས་སྒྱུར་བསྐྱངས་ནས་བཀའ་སློབ་སྩལ་འདུག ལྷན་ཚོགས་དེ་རྒྱལ་ས་ཊོཀ་ཁྱོའི་ཡོ་མིའོ་རི་ཚོགས་ཁང་ Yomiuri Hall ནང་དུ་ཚོགས་ སྐབས་མི་གྲངས་ ༡༡༠༠ ཆེད་ཕེབས་གནང་འདུག སྐབས་དེར་ཐོག་མར་ངོ་སྤྲོད་ཀྱི་ལས་རིམ་ཡོངས་སུ་གྲུབ་རྗེས་༸གོང་ས་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་སློབ་སྩལ་དོན། ཐེངས་འདིར་སླར་ཡང་ཆོས་གྲོགས་རྙིང་པ་ཁག་གིས་གཙོས་གཅེན་གཅུང་ཕོ་མོ་རྣམས་ཐུག་རྒྱུ་བྱུང་བར་ངོས་རང་ལ་ཆེད་མཐོང་ཧ་ཅང་ཆེན་པོ་ཐོབ་པའི་ཚོར་སྣང་ཞིག་བྱུང་། བོད་མིའི་གོམས་གཤིས་ལ་ཐེངས་གཅིག་ངོ་ཤེས་གྲོགས་པོ་ཆགས་ཟིན་རྗེས་མ་འཆི་བར་དུ་བརྗེད་ཀྱི་མ་རེད། ཉི་ཧོང་པ་ཁྱེད་ཚོ་ལའང་གོམས་གཤིས་དེ་ཡོད་རེད་བསམ་པ་དྲན་གྱི་འདུག དེར་བརྟེན་ཁྱེད་ཚོ་མང་པོ་ཞིག་དེ་རིང་འདིར་སླར་ཡང་ཐུག་སྐབས་སེམས་ནང་དགའ་སྤྲོའི་གཡོ་འགུལ་ཆེན་པོ་ཞིག་ཐེབ་བྱུང་།
དེ་རིང་སྐབས་བབ་བརྗོད་གཞི་ནི་ཁོར་ཡུག་སྐོར་ལ་ཡིན་སྟབས་ངོས་རང་ད་དུང་ཁོར་ཡུག་སྐོར་སློབ་སྦྱོང་བྱེད་བཞིན་ཡོད། ངོས་རང་ཐོག་མར་རྒྱ་གར་དུ་འབྱོར་སྐབས་ཁོར་ཡུག་གི་གལ་གནད་སྐོར་བསམ་བློ་གང་ཡང་མེད། དེ་ནས་རིམ་བཞིན་ཁོར་ཡུག་གི་གལ་གནད་སྐོར་ཤེས་རྟོགས་བྱུང་། ཁོར་ཡུག་ཐོག་འཕྲད་བཞིན་པའི་དཀའ་ངལ་དེ་དག་གི་རྒྱུ་རྐྱེན་གཅིག་ནི་མི་འབོར་འཕེལ་རྒྱས་རེད། ད་ལྟའི་འཆར་འཛམ་གླིང་མི་འབོར་ཐེར་འབུམ་བདུན་ཡོད་པ་བརྗོད་བཞིན་ཡོད། ཉམས་ཞིབ་པ་འགའ་རེས་ལོ་ངོ་བརྒྱ་ཕྲག་འདིའི་མཇུག་མཚམས་སུ་མི་འབོར་ཐེར་འབུམ་བཅུ་ལ་འཕར་རྒྱུ་ཡིན་སྐོར་བརྗོད་བཞིན་ཡོད། མི་འབོར་དེ་དག་ཁྲོད་མང་པོ་ཞིག་དབུལ་ཞིང་ཕོངས་པའི་འཚོ་བ་སྐྱེལ་བཞིན་ཡོད་སྟབས། དབུལ་ཕྱུག་གི་བར་ཁྱད་ཧ་ཅང་ཆེ་རུ་འགྲོ་བཞིན་ཡོད། བར་ཁྱད་ཆེན་པོ་དེ་ང་ཚོས་འབད་བརྩོན་བྱས་ནས་ཆུང་དུ་བཏང་ནས་རིམ་བཞིན་དབུལ་ཕྱུག་འཁོད་སྙོམ་ཐུབ་པ་བྱེད་དགོས། དེ་ནས་མྱུར་ཚད་ཧ་ཅང་མཐོ་པོའི་ཐོག་ནས་གོ་ལའི་གནམ་གཤིས་འགྱུར་ལྡོག་གི་གནས་སྟངས་དང་། རང་བྱུང་གོད་ཆག་གི་དཀའ་ངལ་ཇེ་ཆེར་འགྲོ་བཞིན་པར་བརྟེན་ཁོར་ཡུག་སྲུང་སྐྱོབ་ཀྱི་གནད་དོན་འདི་ཁ་ཚ་དགོས་གཏུག་གི་གནད་དོན་ཧ་ཅང་ཛ་དྲག་པོ་ཞིག་ཆགས་
ཡོད། དེ་ནི་འགྲོ་བ་མི་རིགས་འཚོ་གནས་ཐུབ་དང་མ་ཐུབ་ཀྱི་གནས་སྟངས་ཤིག་ཆགས་ཡོད།
འཛམ་གླིང་ས་གོ་ལ་འདི་ཁོ་ན་ང་ཚོའི་ནང་ཟེར་ནའང་རེད། ཁྱིམ་ཟེར་ནའང་འདི་ལས་གཞན་པ་ཞིག་ཏུ་ང་ཚོ་འགྲོ་སྡོད་བྱེད་ས་མེད། རྒྱུ་མཚན་དེས་ང་ཚོས་ཁོར་ཡུག་གི་དཀའ་ངལ་དེ་དག་ཧ་ཅང་ཛ་དྲག་པོ་ཞིག་ལ་བརྩི་དགོས། སྤྱིར་སྟངས་རང་བྱུང་ཁོར་ཡུག་དེ་རང་བཞིན་གྱིས་འགྱུར་ལྡོག་འགྲོ་བཞིན་ཡོད། འོན་ཀྱང་ཉེ་ལམ་ནས་བཟུང་རང་བྱུང་ཁོར་ཡུག་མྱུར་ཚད་མཐོ་པོ་དང་ཚབས་ཆེན་པོས་འགྱུར་ལྡོག་འགྲོ་བཞིན་པའི་གནས་སྟངས་འདི་ནི་རང་བཞིན་གྱི་འགྱུར་ལྡོག་གཅིག་མིན་པར་མིའི་བྱས་ལས་ལ་བརྟེན་ནས་བྱུང་བ་ཞིག་རེད། དེའི་སྐོར་ང་ཚོས་ཤེས་པའི་ཐོག་ནས་སློབ་སྦྱོང་བྱས་ནས་གདོང་ལེན་ཇི་ལྟར་བྱེད་དགོས་ཐོག་བསམ་བློ་གཏོང་དགོས། དམག་འཐབ་དང་འཁྲུག་རྩོད་བྱུང་ན་དཀའ་ངལ་ལམ་སེང་ཚོར་ཐུབ། འོན་ཀྱང་ཁོར་ཡུག་འགྱུར་ལྡོག་དེ་དུས་ཚོད་རིམ་སོང་གི་ཡོང་གི་ཡོད་སྟབས་དཀའ་ངལ་དེ་འཕྲལ་དུ་ཐད་ཀར་ཚོར་ཐུབ་ཀྱི་མེད། དཀའ་ངལ་འཕྲད་སྐབས་ཕྱི་དྲག་པའི་གནས་སྟངས་དེ་འདྲ་ཡོང་གི་ཡོད། དཀའ་ངལ་འཕྲད་ཟིན་རྗེས་དེར་བཟོ་བཅོས་བྱས་དགོས་ན་ཧ་ཅང་དཀའ་ལས་ཁག་པོ་ཆགས་རྒྱུ་རེད། དེར་བརྟེན་ང་ཚོས་ཁོར་ཡུག་སྲུང་སྐྱོབ་ཀྱི་གལ་གནད་སྐོར་མི་རབས་རྒན་པས་གཞོན་པ་ཚོར་བརྒྱུད་སྤྲོད་བྱས་ནས་གོ་རྟོགས་རྒྱ་ཆེ་སྤེལ་ཐབས་བྱེད་དགོས། མཐའ་ན་ལས་དོན་ཆུང་ཚགས་རིགས་དཔེར་ན། རང་ཉིད་ཁང་པའི་ནང་ནས་ཕྱི་ལ་འགྲོ་སྐབས་ནང་གི་གློག་གསོད་རྒྱུ་དེ་གོམས་གཤིས་ལྟ་བུར་འཇགས་ཐབས་བྱེད་དགོས། ཞེས་བཀའ་སློབ་སྩལ་བ་མ་ཟད།
དབུལ་ཕོངས་རྣམས་ཀྱི་འཚོ་བ་ཕྲན་བུ་ཡར་རྒྱས་གཏོང་ཆེད་ང་ཚོས་རང་གི་མི་ཚེ་སྐྱེལ་སྟངས་ལ་འགྱུར་བ་ཞིག་བཏང་ནས་གོ་ལའི་ཐོན་སྐྱེད་དེ་དག་ཆ་སྙོམས་སུ་ལོངས་སྤྱོད་ཐུབ་པ་བྱེད་དགོས། དཔེར་ན། དེང་སྐབས་རྒྱལ་ཁབ་མང་པོ་ཞིག་གིས་དམག་གི་གོ་མཚོན་ཆེད་འགྲོ་སོང་ཧ་ཅང་ཕོན་ཆེ་གཏོང་བཞིན་ཡོད་ཀྱང་དམག་རྒྱག་འདོད་སུ་ལའང་མེད། གང་ཡིན་བརྗོད་ན་དམག་འཁྲུག་བརྗོད་སྐབས་མི་གསོད་ཁྲག་སྦྱོར་ཡོང་རྒྱུ་རེད། དེ་འདྲ་སུས་ཀྱང་མི་འདོད། དམག་ནི་མེ་སྤུངས་ཆེན་པོ་ཞིག་ཡིན་པ་འདྲ་ལ་མེ་སྤུངས་དེ་མུ་མཐུད་ནས་འབར་ཆེད་བུད་ཤིང་གསོག་དགོས། བུད་ཤིང་ལྟ་བུ་དེ་ནི་མི་ཆགས་ཡོད། དམག་འཁྲུག་སྐབས་མི་དེ་མེའི་བུད་ཤིང་ལྟ་བུ་ཡིན། དེར་བརྟེན་མེས་བུད་ཤིང་ཚང་མ་ཚིགས་འགྲོ་བ་བཞིན་དམག་ཐབས་འོག་ང་ཚོ་ཚང་མ་གསོད་རྒྱུ་རེད། སྤྱིར་དམག་འཁྲུག་དེ་འགྲོ་བ་མིའི་ལོ་རྒྱུས་ཀྱི་ཆ་ཤས་ཤིག་ཡིན་ཡང་དམག་འཁྲུག་རྒྱག་དགོས་པའི་རྒྱུ་རྐྱེན་དེ་ང་ཚོ་དང་ཁོ་པ་ཚོ། ང་ཚོའི་རྒྱལ་ཁབ་དང་ཁོ་པ་ཚོའི་རྒྱལ་ཁབ། ཅེས་པས་བཟོས་ཡོད། དཆ་ང་ཚོ་དང་ཁོ་པ་ཚོ་ཟེར་ནས་ས་མཚམས་བཟུང་ནས་སྡོད་རྒྱུའི་དུས་ཚོད་འདི་ཡོལ་ཟིན་པ་ཞིག་ཡིན། ད་ཆ་གོ་ལ་གཅིག་འགྱུར་གྱི་གནས་སྟངས་ཤིག་ཆགས་ཡོད་སྟབས་ང་ཚོ་ཚང་མ་ཕན་ཚུན་གཅིག་ལ་གཅིག་བརྟེན་ནས་འཚོ་གནས་བྱེད་དགོས་པ་ཆགས་ཡོད། ང་ཚོ་ཚང་མ་འགྲོ་བ་མི་རིགས་གཅིག་འགྱུར་ཞིག་ཡིན་སྟབས་རང་ཉིད་ལ་བདེ་བ་འདོད་པ་ལྟར་གཞན་ལའང་བདེ་བ་འདོད་ཀྱི་ཡོད། ཉི་ཧོང་རྒྱལ་ཁབ་འདིར་རྡུལ་ཕྲན་མཚོན་ཆའི་གནོད་འཚེ་ཕོག་མྱོང་ཡོད་སྟབས་ད་ཆ་རྡུལ་ཕྲན་མཚོན་ཆའི་ཐོག་དགག་པ་རྒྱག་མཁན་གཙོ་བོ་ཞིག་ཆགས་ཡོད། དེར་ངོས་ཀྱིས་མཐའ་གཅིག་ཏུ་རྒྱབ་སྐྱོར་གཙང་མ་ཞུ་རྒྱུ་མ་ཟད། ཁྱེད་ཚོས་དེའི་ཐོག་མུ་མཐུད་འབད་བརྩོན་གནང་རོགས་ཞུ་རྒྱུ་ཡིན། ཞེས་བཀའ་སློབ་སྩལ།
དེ་རྗེས་ཊོཀ་ཁྱོ་གཙུག་ལག་སློབ་གྲྭའི་སློབ་དཔོན་ཆེན་མོ་སྐུ་ཞབས་རི་ཡུ་ཅི་ཡ་མ་མོ་ཊོ་ Professor Ryuichi Yamamoto ལགས་ཀྱིས་གོ་ལའི་གནམ་གཤིས་འགྱུར་ལྡོག་གི་རྗེས་འབྲས་དཔེར་ན། ཁོར་ཡུག་སྦགས་གཙོག་དང་། གནམ་གཤིས་ཚ་དྲོད་ཀྱི་མྱུར་ཚད་ཇེ་ཆེར་འགྲོ་བཞིན་པ་སོགས་ལ་བརྟེན་ནས་རྒྱལ་ཁབ་འདྲ་མིན་ནང་དེ་སྔ་མ་གྲགས་པའི་རང་བྱུང་ཁོར་ཡུག་གི་དཀའ་ངལ་བྱུང་ཡོད་དཔེར་ན། དབྱིན་ཡུལ་དུ་ཆུ་ལོག་དང་། ཨོ་སི་ཊོ་ལི་ཡར་ཐན་པ་བཏང་བ། དེ་བཞིན་ཨིན་དོ་ནེ་ཤི་ཡར་མཚོ་རླབས་བྱུང་བ་སོགས་ལུང་འདྲེན་གནང་བ་མ་ཟད། མཐར་བགྲོ་གླེང་མཇུག་བསྡོམས་སྐབས་ཁོང་ནས་ཁོར་ཡུག་སྲུང་སྐྱོབ་ཐོག་དོན་ཚན་གསུམ་ཅན་གྱི་བསྒྲགས་གཏམ་ཞིག་སྤེལ་འདུག་པ་བཅས།།
