༢༠༡༠ ཕྱི་ཟླ་ ༣ ཚེས་ ༡༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༡༠ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་གིས་གསུམ་བཅུའི་དུས་དྲན་ཐེངས་ ༥༡ ཉིན་འཕྲིན་ཡིག་གཅིག་གནང་ཡོད་པའི་ནང་འཁོད་དོན། དེ་རིང་ང་ཚོས་བོད་མིའི་གསུམ་བཅུའི་དུས་དྲན་ཐེངས་ ༥༡ ཐོག་རང་དབང་དང་ཞི་བའི་འཚོ་གནས་བྱེད་རྒྱུའི་བོད་མིའི་མངོན་འདོད་ཀྱི་ཆེད་དུ་རང་སྲོག་བློས་གཏོང་བྱེད་མཁན་དཔའ་བོ་དཔའ་མོ་མང་དག་ཅིག་ཡོད་པ་རྣམས་ལ་གུས་བརྩི་ཞུ་རྒྱུ་ཡིན། མི་ལོ་ ༥༡ གོང་ལྷ་སར་བོད་མི་ཚོས་ཞི་བའི་ངང་འདུ་འཛོམས་ཀྱིས་གདུག་རྩབ་ཅན་གྱི་རྒྱ་དམར་གྱི་སྲིད་བྱུས་མཚམས་འཇོག་དགོས་པའི་རེ་འདུན་བཏོན་པར་རྒྱ་ནག་གཞུང་གིས་དྲག་གནོན་བྱས་མཐར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་བཙན་བྱོལ་དུ་ཕེབས་དགོས་བྱུང་ཡོད། ལོ་ངོ་བཅུ་ཕྲག་ལྔ་ལྷག་གི་རིང་བོད་དང་རྒྱ་ནག་ནང་འཚེ་མེད་ཞི་བའི་ཐོག་མང་གཙོའི་བཅོས་བསྒྱུར་ཡོང་བར་རྒྱལ་ཁབ་གཉིས་པོའི་མ་འོངས་མདུན་ལམ་གསར་པ་ཞིག་ཡོང་རྒྱུར་བོད་མི་ཚོས་རེ་བ་དང་ངང་སྒུུག་བྱས་ཡོད། བོད་རྒྱ་གཉིས་དབར་འབྲེལ་མོལ་བྱུང་ཡོད་ཀྱང་གྲུབ་འབྲས་དོན་ཕན་སོན་པ་ཞིག་བྱུང་མེད། འོན་ཀྱང་གྲོས་མོལ་གྱི་ལམ་ནས་ཕན་ཚུན་ཞི་འགྲིག་ཡོང་ཐུབ་ཚེ་རྒྱ་ནག་ནང་ཁུལ་གྱི་བརྟན་ལྷིང་དང་འཛམ་གླིང་ནང་རྒྱ་མིའི་ཆེ་མཐོང་དང་སྙན་གྲགས་གོང་འཕེལ་ཡོང་ངེས་ཡིན།
དུས་ཚོད་དེའི་རིང་རྒྱ་ནག་གཞུང་གིས་བོད་མི་ཚོའི་བློ་བཀུག་ཐུབ་མེད། རྒྱ་ནག་གཞུང་གིས་བོད་མི་ཚོ་དང་༸གོང་ས་ཏཱ་ལའི་བླ་མའི་དབར་འགལ་ཟླ་བཟོ་རྒྱུའི་ཐབས་ཤེས་དེས་རྒྱ་ནག་གཞུང་ལ་ངན་འབྲས་བྱུང་ཡོད། བོད་མི་ཚོས་རང་གི་ཆོས་ལ་སྔར་བཞིན་འགྱུར་མེད་ཀྱི་དད་པ་བརྟན་པོ་འཆང་བཞིན་ཡོད་པ་དང་། བོད་མི་ཚོས་༸གོང་ས་མཆོག་དང་དད་དམ་གྱི་འབྲེལ་བ་དེ་འགྱུར་བ་མེད་པར་གནས་ཡོད། རྒྱ་ནག་གཞུང་གིས་བོད་མི་ཚོར་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་བའི་ཐོག་བོད་ཀྱི་གནད་དོན་སེལ་རྒྱུའི་དུས་ཚོད་རན་ཐག་ཆོད་ཡོད། ཟླ་བ་སྔོན་མར་སྲིད་ཛིན་སྐུ་ཞབས་ཨོ་བྷ་མ་མཆོག་གིས་ཕོ་བྲང་དཀར་པོའི་ནང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་བར་བསྔགས་བརྗོད་ཞུ་རྒྱུ་དང་། མཇལ་འཕྲད་དེས་ཨ་རི་དང་བོད་མི་ཚོའི་དབར་ཡུན་རིང་ནས་ཡོད་པའི་སེམས་ཐག་ཉེ་བའི་མཛའ་བརྩེའི་འབྲེལ་ལམ་གྱི་ལེའུ་གསར་པ་ཞིག་ཁ་སྣོན་གནང་ཡོད། འཛམ་གླིང་ཁྱོན་ཡོངས་ཀྱི་མི་མང་ཚོས་རང་དབང་ལ་ལོངས་སུ་སྤྱོད་ཐུབ་སླད་ཁོང་ཚོའི་རང་དབང་གོང་འཕེལ་དང་སྲུང་སྐྱོབ་བྱེད་རྒྱུར་༸གོང་ས་ཏཱ་ལའི་བླ་མ་མཆོག་ལ་ང་ཚོས་མུ་མཐུདརྒྱབ་སྐྱོར་ཞུ་རྒྱུ་ཡིན། ༸གོང་ས་མཆོག་བཙན་དབང་འོག་སྐྱབས་བཅོལ་དུ་ཕེབས་དགོས་བྱུང་སྟེ་ལོ་ ༥༡ འཁོར་བའི་དུས་དྲན་འདི་དང་བསྟུན་ང་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཚེ་མེད་ཞི་བའི་ལམ་སྟོན་བཀའ་སློབ་དེར་དོ་སྣང་ཞུ་རྒྱུ་དང་། བོད་མི་ཚོས་འཐབ་རྩོད་རྒྱུན་ཁྱོངས་གནང་བཞིན་པ་དེར་ང་ཚོས་དྲན་གསོ་ཞུ་རྒྱུ་ཡིན།
ཡིག་ཆ་ངོ་མ་དབྱིན་ཡིག་ཐོག་ཡོད་པ་འདི་ག་བོད་ཡིག་ཚན་པས་ཕབ་བསྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་དབྱིན་ཡིག་ལ་རྩ་འཛིན་ཡོང་བ་ཞུ།།
