༢༠༡༥ ཟླ་ ༣ ཚེས་ ༢༦ རེས་གཟའ་ཕུར་བུ།

༄༅། །ཕྱི་ལོ་ ༢༠༡༥ ཟླ་ ༣ ཚེས་ ༢༣ ཉིན་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་བསྟི་གནས་ཁང་གི་ཚོགས་ཁང་ India International Centre དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག ཨེ་ཤི་ཡའི་ནང་མང་གཙོའི་ལམ་སྲོལ་སྲ་བརྟན་ཡོང་ཐབས། ཞེས་པའི་བརྗོད་གཞིའི་ཐོག་ཉིན་གྲངས་གཉིས་རིང་གི་རྒྱལ་སྤྱིའི་ལྷན་ཚོགས་ཀྱི་དབུ་འབྱེད་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། རྒྱ་གར་གྱི་སྡེ་སྲུང་བློན་ཆེན་ཟུར་པ་སྐུ་ཞབས་ཇོར་ཇི་ཕར་ནན་ཌེ་སི་ Mr. George Fernandes མཆོག་ལ་རྗེས་དྲན་གྱི་གསུང་བཤད་གནང་སྐབས་སྐུ་ཞབས་ཇོར་ཇི་ཕར་ནན་ཌེ་སི་མཆོག་ནི་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིར་སེམས་ཐག་ཧ་ཅང་ཉེ་བའི་གྲོགས་པོ་བློས་ཐུབ་གཅིག་ཡིན་པ་དང་། ཁོང་གིས་དེ་སྔ་རྒྱ་གར་དང་ཨེ་ཤི་ཡ། དེ་བཞིན་རྒྱལ་སྤྱིའི་སྟེང་མང་གཙོའི་རིན་ཐང་སྲུང་སྐྱོབ་དང་གོང་སྤེལ་གཏོང་ཆེད་གཟེངས་སུ་ཐོན་པའི་བྱས་རྗེས་བཞག་གནང་ཡོད་པ་མ་ཟད། ཁོང་ནི་རང་ཉིད་ལ་སྲིད་དབང་ཡོད་མེད་སྐབས་གཉིས་ཀར་མི་དཀྱུས་མ་རང་གནང་ནས་ཕེབས་མཁན་ཞིག་དང་། རང་གི་ལྟ་གྲུབ་ཐོག་གཡོ་ཟོལ་དང་འཇིགས་ཞུམ་གང་ཡང་མེད་པར་ལངས་ཕྱོགས་བརྟན་པོས་ཤར་བསྐྱོད་གནང་མཁན་སྤྱི་ཚོགས་རིང་ལུགས་ཀྱི་དབུ་ཁྲིད་གཅིག་ཡིན། ཞེས་གསུང་པ་མ་ཟད།

དེ་སྔ་ཕྱི་ལོ་ ༡༩༩༠ ནང་རྒྱ་ནག་གི་འགོ་ཁྲིད་རྒྱ་གར་རྒྱལ་ས་ལྡི་ལིར་བསྐྱོད་སྐབས་བོད་མི་ཚོས་ངོ་རྒོལ་རྔམས་སྟོན་བྱས་པར་བོད་མི་ཁག་གཅིག་རྒྱ་གར་ཉེན་རྟོག་མི་སྣས་འཛིན་བཟུང་བཀག་ཉར་བྱས་ཡོད། སྐབས་དེར་སྐུ་ཞབས་ཇོར་ཇི་ཕར་ནན་ཌེ་སི་མཆོག་རང་ཉིད་ངོ་ཕེབས་ཀྱིས་བོད་མི་དེ་དག་གློད་བཀྲོལ་གནང་ཐུབ་པ་བྱུང་ཡོད་སྐོར་དང་། སྐུ་ཞབས་ཇོར་ཇི་ཕར་ནན་ཌེ་སི་མཆོག་གིས་བོད་ཀྱི་གནད་དོན་དེ་ས་ཆའི་ཆགས་བབ་ཀྱི་ཆ་ནས་བོད་མི་ཙམ་གྱི་གནད་དོན་ཞིག་མིན་པར། བོད་ནས་རྒྱུག་ཆུ་མང་དག་གཅིག་ལྷོ་ཤར་ཨེ་ཤི་ཡའི་ཡུལ་གྲུ་དེ་དག་ནང་གི་མང་ཚོགས་ས་ཡ་མང་པོའི་འཚོ་བ་དང་འབྲེལ་སྟབས་ས་ཁུལ་དེ་དག་གི་གནད་དོན་ཞིག་ཀྱང་ཆགས་ཡོད་པར་ཡིད་ཆེས་གནང་བཞིན་ཡོད་སྐོར་གསུངས།