༢༠༡༥ ཟླ་ ༣ ཚེས་ ༡༢ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༡༠ ཉིན་ཨུ་རུ་སུའི་རྒྱལ་ས་མོ་སི་ཁོའི་ནང་རྟེན་གཞི་བྱས་པའི་ནི་ཁོ་ལ་སི་རོ་རི་ཆི་འགྲེམས་སྟོན་ཁང་ Nicholas Roerich Museum ནང་ཨུ་རུ་སུ་སྐུ་ཚབ་དོན་ཁང་དང་འབྲས་སྤུངས་སྒོ་མང་གྲྭ་ཚང་ཐེབས་རྩ་ཁང་། དེ་བཞིན་རྒྱལ་ས་མོ་སི་ཁོའི་ནང་རྟེན་གཞི་བྱས་པའི་བོད་སྐྱོབ་དགེ་རྩ་ཚོགས་པ་བཅས་ཀྱིས་གོ་སྒྲིག་འོག བོད་མིའི་གསུམ་བཅུའི་དུས་དྲན་ཐེངས་ ༥༦ སྲུང་བརྩི་ཞུས་འདུག སྐབས་དེར་འབྲས་སྤུངས་སྒོ་མང་གྲྭ་ཚང་ཐེབས་རྩ་ཁང་གི་འགན་འཛིན་ལྕམ་སྐུ་ན་ཏཱ་ལི་ཡ་བྷེ་སི་པ་ལོ་ཝ་ Mrs. Natalia Bespalova ལགས་ཀྱིས་ལས་འགུལ་ནང་མཉམ་ཞུགས་གནང་མཁན་ཚོགས་བཅར་བ་རྣམས་ལ་རུ་སུའི་ནང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དོན་གཅོད་གསར་པ་ཏེ་ལོ་རིན་པོ་ཆེ་མཆོག་ངོ་སྤྲོད་གནང་འདུག
དེ་རྗེས་ཏེ་ལོ་རིན་པོ་ཆེ་མཆོག་གིས་ཐོག་མར་བོད་མིའི་གསུམ་བཅུའི་དུས་དྲན་ནང་མཉམ་ཞུགས་གནང་མཁན་ཡོངས་ལ་བོད་མིའི་སྒྲིག་འཛུགས་ཀྱི་ཚབ་ཞུས་ནས་ཐུགས་རྗེ་ཆེ་གསུང་པ་དང་སྦྲགས། ད་ལྟའི་བོད་ནང་གི་ཛ་དྲག་གི་གནས་སྟངས་དང་། བོད་ཀྱི་ཆོས་དང་རིག་གཞུང་སྐད་ཡིག་སོགས་ནི་འཛམ་གླིང་སྤྱི་ལ་ཧ་ཅང་གལ་གནད་ཆེན་པོ་ཆགས་ཡོད་པ་མ་ཟད། ལྷག་པར་ཐུ་ཝ་དང་བྷུར་ཡ་ཏི། ཁལ་མུཀ་བཅས་ཨུ་རུ་སུ་སྤྱི་མཐུན་རྒྱལ་ཁབ་གྱི་ནང་པའི་རྒྱལ་ཁབ་གསུམ་ནང་མི་ལོ་བརྒྱ་ཕྲག་རིང་ནས་བོད་བརྒྱུད་ནང་བསྟན་ཉམས་ལེན་བྱེད་བཞིན་ཡོད་སྟབས་དེ་བས་གནད་དགག་ཆགས་ཡོད་པ་དང་། དེང་སྐབས་འཛམ་གླིང་ནང་འཚེ་བའི་ལས་འགུལ་སྤེལ་མཁན་ཇེ་མང་དུ་འགྲོ་བཞིན་པའི་དུས་སྐབས་འདིར་བྱམས་བརྩེ་དང་བཟོད་སྲན། འཁོན་འཛིན་སྤངས་པའི་འདུ་ཤེས་སོགས་ནང་སེམས་རྒྱུད་དང་འབྲེལ་བའི་རིན་ཐང་དེ་དག་རྩིགས་ཆེར་འཛིན་བཞིན་པའི་བོད་ཀྱི་རིག་གཞུང་འདི་ཧ་ཅང་རྩ་ཆེན་པོ་ཞིག་ཆགས་ཡོད། ཅེས་གསུངས།
སྤྱིར་འབྲས་སྤུངས་སྒོ་མང་གྲྭ་ཚང་ཐེབས་རྩ་ཁང་གིས་གོ་སྒྲིག་འོག་དེང་སྐབས་ནི་ཁོ་ལ་སི་རོ་རི་ཆི་འགྲེམས་སྟོན་ཁང་ Nicholas Roerich Museum ནང་བོད་ཀྱི་ཆོས་དང་རིག་གཞུང་ངོ་སྤྲོད་ཀྱི་ལས་འགུལ་སྤེལ་བཞིན་ཡོད་པ་ལྟར། སྐབས་དེར་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་གི་དགེ་འདུན་པ་ཁག་གཅིག་ཕེབས་འདུག
གཞན་ཡང་རྒྱལ་ས་མོ་སི་ཁོའི་ནང་རྟེན་གཞི་བྱས་པའི་བོད་སྐྱོབ་ཐེབས་རྩ་ཁང་གི་འགའ་འཛིན་ཡུ་ལི་ཡ་ཛི་རོན་ཀི་ན་ Yulia Zhironkina ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་གི་གསུམ་དུས་ཐེངས་ ༥༦ ཐོག་སྤེལ་བའི་གསུམ་དུས་གསུང་བཤད་ཨུ་རུ་སུའི་སྐད་ཡིག་ནང་ཕབ་བསྒྱུར་ཞུས་པ་དེ་སྒྲོགས་སྦྱང་གནང་འདུག་པ་མ་ཟད། གསུང་བཤད་དེའི་འདྲ་བཤུས་རྣམས་ཐུ་ཝ་ Tuva དང་བྷུར་ཝ་ཏི། Buryatia ཁལ་མུཀ Kalmykia དེ་བཞིན་སན་པི་ཊར་སི་བྷག་ St. Petersburgh ཏུ་འགྲེམས་སྤེལ་གནང་ནས་ས་ཁུལ་དེ་དག་ནང་བོད་མིའི་གསུམ་དུས་ཐེངས་ ༥༦ སྲུང་བརྩི་ཞུ་སྐབས་སྒྲོགས་སྦྱང་གནང་འདུག
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་བསྟན་འཛིན་གྱི་སྐྱེས་ཆེན་དམ་པ་རྣམས་ཀྱི་སྐུ་ཚེ་ཡུན་རིང་བརྟན་ཅིང་ཐུགས་བཞེད་མ་ལུས་ལྷུན་གྱིས་འགྲུབ་པ་དང་། བོད་དོན་བདེན་མཐའ་ཉུར་དུ་གསལ་བའི་སྨོན་ལམ་གསུང་འདོན་གནང་།
དེ་བཞིན་ཁལ་མུཀ་སྤྱི་མཐུན་རྒྱལ་ཁབ་ཀྱི་རྒྱལ་ས་ཨེ་ལི་སི་ཏའི་ Elista ནང་ཁལ་མུཀ་བོད་རིགས་མཐུན་ཚོགས། ཞེས་ས་གནས་བོད་དོན་རྒྱབ་སྐྱོར་ཚོགས་པས་གོ་སྒྲིག་འོག་ས་ཁུལ་དེར་རྟེན་གཞི་བྱས་པའི་ནང་པའི་དགོན་པ་ཆེན་པོ་ཞིག་ཡོད་པ་དེར་སྨོན་ལམ་གསུང་འདོན་དང་སྦྲགས་གསུམ་དུས་སྲུང་བརྩི་ཞུས་འདུག སྐབས་དེར་ཁལ་མུཀ་བོད་རིགས་མཐུན་ཚོགས་ཀྱི་ཚོགས་གཙོ་ལྕམ་སྐུ་ཨེན་ཊོ་ནི་ན་ཀོ་ཀུ་ཝ་ Mrs. Antonina Kookueva ལགས་ཀྱིས་དེང་སྐབས་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་བ་མ་ཟད། སྲིད་སྐྱོང་བློ་བཟང་སེང་གེ་མཆོག་གི་གསུམ་དུས་གསུང་བཤད་སྒྲོགས་སྦྱང་གནང་ཡོད།
སྤྱིར་བོད་དོན་རྒྱབ་སྐྱོར་ཚོགས་པ་དེས་ལོ་ཤས་རིང་ནས་ཁལ་མུཀ་སློབ་གྲྭ་ཆེ་བ་མང་པོའི་ནང་བོད་ཀྱི་འགྲེམས་སྟོན་བཙུགས་ནས་བོད་ཀྱི་ཆོས་དང་རིག་གཞུང་། སྐད་ཡིག་སོགས་ངོ་སྤྲོད་གཞི་རྒྱ་ཆེ་བ་ཞིག་གནང་ཐུབ་པ་བྱུང་འདུག
