༢༠༡༥ ཟླ་ ༣ ཚེས་ ༡༢ རེས་གཟའ་ཕུར་བུ།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
༄༅། །འདི་ག་བོད་ཡིག་ཚན་པའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཕགས་ཡུལ་གདན་ས་དཔལ་སྤུངས་ཤེས་རབ་གླིང་གི་དབུ་བླ་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། ཕྱི་ལོ་ ༢༠༡༥ ཟླ་ ༣ ཚེས་ ༡༡ ཉིན་གྱི་སྔ་དྲོ་ཆུ་ཚོད་ ༩།༡༥ ཙམ་ལ་དཔལ་སྤུངས་ཤེས་རབ་གླིང་དུ་༸ཞབས་སོར་འཁོད་སྐབས་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་དང་ཁྲིམས་ཞིབ་པ་གཞན་གཉིས། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོོག ཆོས་རིག་བཀའ་བློན་པདྨ་ཆོས་འབྱོར་མཆོག ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག ནང་སྲིད་བཀའ་བློན་རྒྱ་རི་སྒྲོལ་མ་མཆོག འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག སྤྱི་ཁྱབ་རྩིས་ཞིབ་འགན་འཛིན་མགོན་པོ་ཕུན་ཚོགས་མཆོག སྤྱི་འཐུས་རྒྱུན་ལས་ཁག་གཅིག གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ། ཕྱི་རྒྱལ་རོགས་ཁག ཕྱོགས་མཐའ་ཁག་ནས་བཅར་བ་བཅས་ཁྱོན་མི་གྲངས་ ༤༠༠༠ ལྷན་འཛོམས་ཀྱིས་དབུས་སུ། དགོན་པའི་མཁན་བླ་སྤྲུལ་དང་གྲྭ་དམངས་སོགས་ནས་སེར་སྦྲེངས་གཟབ་རྒྱས་ཀྱིས་དཔལ་སྤུངས་བྱང་ཆུབ་ཆེན་པོའི་གཙུག་ལག་ཁང་དུ་གདན་ཞུས་ཀྱིས་སྣང་གསལ་ཞལ་ཕྱེ་དང་རྟེན་གསུམ་ལ་རབ་གནས་མཛད་དེ་བཞུགས་ཁྲིར་འཁོད་བསྟུན།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་མཎྜལ་སྐུ་གསུང་ཐུགས་རྟེན་འདེགས་འབུལ་ཞུས་རྗེས་དབུ་མཛད་འཕྲིན་ལས་འགྱུར་མེད་ལགས་ཀྱིས་མཛད་རིམ་ངོ་སྤྲོད་དང་། བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་འཚམས་འདྲིའི་གསུང་བཤད་གནང་སྐབས། ༸གོང་ས་མཆོག་གིས་དུས་ནས་དུས་སུ་ལམ་སྟོན་བཀའ་སློབ་སྩལ་བར་བརྟེན་བོད་དང་རྒྱ་བལ་འབྲུག་གསུམ་གྱིས་གཙོས་འཛམ་གླིང་གི་རྒྱལ་ཁབ་མང་པོའི་ནང་ཆོས་ཀྱི་འཁོར་ལོ་རྒྱ་ཆེ་བསྐོར་ཐུབ་པ་བྱུང་ཡོད་ལ།༸གོང་ས་མཆོག་གིས་འགྲོ་བ་ཀུན་གྱི་བདེ་སྐྱིད་ཀྱི་གཞི་མ་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་དང་། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ། འཛམ་གླིང་ཁྱོན་ཡོངས་དང་དམིགས་བསལ་ཁ་བ་རི་བའི་ཆོས་རིག་གཅིག་ཏུ་འདྲེས་པའི་སྐྱེས་བོ་སྤྱི་བྱེ་བྲག་ཡོངས་ལ་ཡ་རབས་སྤྱོད་ཚུལ་དང་མཐུན་པའི་ཀུན་སྤྱོད་དང་། གཞན་ཕན་གྱི་ལྷག་བསམ་ལྡན་པའི་ཀུན་སློང་། རྒྱལ་ཁབ་དང་ལུང་ཚན། ཆོས་དང་མི་རིགས་ཕན་ཚུར་བར་བརྩི་བཀུར་སྐྱོང་རེས་དང་མཛའ་མཐུན་ཡོང་བར་ཐུགས་ཁུར་ཆེར་བཞེས་ཀྱིས་བླ་ན་མེད་པའི་མཛད་འཕྲིན་བསྐྱངས་དང་སྐྱོང་བཞིན་པར་ཐུགས་རྗེ་ལེགས་གསོལ་ཞུ་རྒྱུ་དང་། ༸མགོན་པོ་གང་གི་ཐུགས་རྗེ་སྐྱབས་འོག་ནས་ནམ་ཡང་མི་འདོར་བའི་གསོལ་འདེབས་ཞུས་ཡོད།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
དེ་ནས་མཁན་པོ་གཡུལ་རྒྱལ་ལགས་ཀྱིས་ཕུན་ཚོགས་ལྔ་ལྡན་གྱི་བཤད་པ། མཁན་པོ་རྒྱལ་མཚན་ཕུན་ཚོགས་ལགས་ཀྱིས་གདན་སའི་ངོ་སྤྲོད། སློབ་དཔོན་ཀརྨ་གྲགས་པ་ལགས་ཀྱིས་མདོ་དང་འབྲེལ་བའི་ཆོས་བཤད། དཔལ་སྤུངས་རིག་གནས་མཐོ་སློབ་ཀྱི་སློབ་མ་ཆོས་དབྱིངས་ཀུན་ཁྱབ་ལགས་ཀྱིས་གསོ་བ་རིག་པའི་བྱུང་རིམ་བཤད་པ། སློབ་མ་ངག་དབང་ལགས་ཀྱིས་རྩིས་རིག་པའི་བྱུང་རིམ་བཤད་པ། སློབ་མ་ཤེས་རབ་དྲི་མེད་ལགས་ཀྱིས་སྒྲ་རིག་པའི་བྱུང་རིམ་བཤད་པ་བཅས་རེ་རེ་བཞིན་སྙན་སྒྲོན་ཞུས་རྗེས་ཆོས་རིག་བཀའ་བློན་མཆོག་གིས་གསུང་བཤད་གནང་དོན། འཛམ་གླིང་ཞི་བདེའི་དེད་དཔོན་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་ཕུལ་ནས་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་དབུས་བསྟན་འཛིན་གྱི་སྐྱེས་ཆེན་རྣམ་པ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་སེར་སྐྱ་མི་མང་ཡོངས་ལ་དབུས་བོད་མིའི་སྒྲིག་འཛུགས་བཀའ་ཤག་གི་ཚབ་ཞུས་ཏེ་དགའ་སྤོབས་ཆེན་པོའི་ཐོག་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
ཚང་མས་མཁྱེན་གསལ་རེད་བོད་གངས་ཅན་གྱི་ནང་པའི་ཆོས་འདི་ཐུན་མོང་མ་ཡིན་པའི་སྒྲུབ་པ་ཉམས་ལེན་དང་བསླབ་པ་སློབ་གཉེར་བྱེད་སྟངས་དེ་ཧ་ཅང་རྩ་ཆེན་པོ་དང་། གཟི་བརྗིད་ཆེན་པོ། གཏིང་ཟབ་པོ་རེད་འདུག ཕྱི་ལོ་ ༡༩༧༨ ལོར་བོད་ཀྱི་གཞོན་ནུ་ལྷན་ཚོགས་ཐེངས་དང་པོ་ཚོགས་པའི་སྐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོས་འཛམ་བུ་གླིང་ལ་ངོམ་རྒྱུ་གཅིག་ཡོད་པ་དེ་ནི། ནང་པའི་ཆོས་ཀྱི་ཐུན་མོང་མ་ཡིན་པའི་སྒྲུབ་པ་ཉམས་ལེན་བྱེད་སྟངས་དེ་འཛམ་གླིང་ལ་ངོམ་ཆོག་གི་རེད། དེ་མིན་ང་ཚོར་གང་ཡང་ངོམ་རྒྱུ་མེད་ཅེས་བཀའ་ཕེབས་ཡོད། སྐབས་དེ་དུས་སོ་སོ་རང་ཉིད་ལ་མཚོན་ན་ལོ་ན་གཞོན་པའི་དབང་གི་དོ་སྣང་དང་ཚོར་སྣང་གང་ཡང་མ་བྱུང་། ལོ་མང་པོའི་རྗེས་སུ་རྒྱབ་ཤིག་བརྒྱབ་ནས་ལྟ་སྐབས་ཐུགས་རྗེ་ཆེན་པོའི་གསུངས་པ་དེ་ཐུགས་རྗེ་ཆེན་པོ་རེད་འདུག་བསམས་ནས་ཚོར་བ་ཆེ་རུ་དང་དོ་སྣང་ཆེ་རུ་རང་བཞིན་གྱི་ཆགས་ཡོང་གི་འདུག ནང་ཆོས་འདི་བཞིན་འཛམ་གླིང་གིས་རྩ་ཆེན་ཞིག་དང་དོ་སྣང་བྱེད་ས་ཞིག་ཆགས་ཡོད་སྟབས། ང་ཚོས་ད་ལྟའི་གནས་སྟངས་འདིའི་ཐོག་ནས་དེ་ཡར་རྒྱས་ཇི་ལྟར་གཏོང་དགོས་མིན་ཐད་དགོངས་པ་བཞེས་རྒྱུ་གལ་ཆེན་པོ་ཆགས་ཀྱི་འདུག ངས་ནམ་རྒྱུན་དུ་འདི་ལྟར་ཞུ་བཞིན་ཡོད། ང་ཚོའི་ཆོས་བརྒྱུད་ཆེན་པོ་སོ་སོའི་ནང་གྲུབ་པ་ཉམས་ལེན་བྱེད་ཕྱོགས་དེ་བསྲེས་ལྷད་དང་འགྱུར་བ་མེད་པ་སོགས་ཀྱི་གནའ་སྲོལ་བཟང་པོ་ཞིག་ཡོད་སྟབས། དེ་དག་གཞིར་བཞག་ཐོག་དེང་གི་དུས་རབས་དང་མཚུངས་པའི་བསླབ་པ་སློབ་གཉེར་བྱེད་སྟངས་ཀྱིས་གཙོས་གང་ཅིའི་ཐད་བསྐྱར་ཞིབ་དང་གསར་གཏོད། དེ་བཞིན་ཡར་རྒྱས་ཇི་ལྟར་གཏོང་དགོས་ཀྱི་ཡོད་མེད་སྐོར་དགོངས་པ་བཞེས་པ་བརྒྱུད་ང་ཚོས་དུས་རབས་ ༢༡ པའི་ནང་པ་ཞིག་ཆགས་ཐབས་བྱེད་དགོས། ཞེས་སོགས་ཀྱི་གསུང་བཤད་གནང་།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
དེ་ནས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་འཕགས་ཡུལ་གདན་ས་དཔལ་སྤུངས་ཤེས་རབ་གླིང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸ཞབས་སོར་འཁོད་པའི་མཛད་སྒོའི་ཐོག་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་དབུས་པའི་མཆོག་གི་སྤྲུལ་སྐུ་རྣམ་པ། མཁན་པོ་རྣམ་པ་དང་དགེ་འདུན་གྱི་སྡེ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ཕྱི་ནང་གི་སྐུ་མགྲོན་ཡོངས་ལ་ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་དགའ་དད་སྤྲོ་གསུམ་གྱི་ངང་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ང་རང་ཚོའི་འབྱུང་རབས་ལོ་རྒྱུས་ནང་ཉམས་སྨད་པའི་དུས་ཚོད་སོ་སོའི་ལུང་པ་བཞག་ནས་བཙན་བྱོལ་དུ་ཡོང་དགོས་པའི་གནས་སྟངས་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཟི་བྱིན་འོག་ཏཱའི་སི་ཏུ་རིན་པོ་ཆེ་ནང་བཞིན་བསྟན་འཛིན་གྱི་སྐྱེས་བུ་དམ་པ་མང་པོ་ཞིག་གིས་གདན་ས་སོགས་བཙུགས་གནང་སྟེ་ནང་ཆོས་སློབ་གཉེར་གནང་སའི་གོ་སྐབས་སྐྲུན་གནང་བར་རྗེས་སུ་ཡི་རང་ཞུ་དགོས་པའི་གནས་སྟངས་རེད། གོང་དུ་དགོན་པའི་ལོ་རྒྱུས་ངོ་སྤྲོད་གནང་བའི་སྐབས་སུ་གསུངས་པ་བཞིན། འདས་པའི་ལོ་ ༣༨ སྔོན་ཕྱི་ལོ་ ༡༩༧༧ ནས་ད་བར་ཏཱའི་སི་ཏུ་རིན་པོ་ཆེ་མཆོག་གིས་སྐུ་ངལ་མང་པོ་བསྐྱོན་ནས་གཙུག་ལག་ཁང་བཞེངས་གནང་བ་དང་། དེ་བརྒྱུད་ནས་བཤད་གྲྭ་དང་སྒྲུབ་གྲྭ་བཙུགས་གནང་བ་མ་ཟད། རིག་གནས་ཀྱི་མཐོ་སློབ་དང་། སྔོན་འགྲོའི་སློབ་གྲྭ་བཅས་ཆ་རྐྱེན་ཆ་ཚང་གྲུབ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དངོས་སུ་༸ཞབས་སོར་འཁོད་ཐུབ་པ་འདི་ང་ཚོ་ཚང་མར་ཧ་ཅང་གི་བསྐལ་པ་བཟང་པོ་རེད་བསམ་གི་འདུག ང་རང་སྒེར་ལ་ཆ་བཞག་ན་ལོ་གཉིས་ཀྱི་སྔོན་ལ་སྒྲ་བསྒྱུར་གྱི་རྒྱལ་པོ་མར་པ་ལོ་ཙཱ་བ་འགྲོ་བའི་དོན་དུ་འཛམ་གླིང་འདིར་བྱོན་ནས་ལོ་ཆིག་སྟོང་འཁོར་བའི་དུས་སྟོན་དང་སྦྲགས་ཐེངས་དང་པོ་བཅར་རྒྱུའི་གོ་སྐབས་བྱུང་། ད་རེས་ཚོགས་གཙོའི་མིང་འཁུར་ཏེ་སླར་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་གར་དངོས་སུ་ཐེངས་དང་པོ་༸ཞབས་སོར་འཁོད་པའི་སྐབས་ལ་སྐལ་བཟང་གི་གོ་སྐབས་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་། དེ་ནས་མགོན་པོ་གང་ཉིད་མཆོག་གི་བཀའ་སློབ་སྩལ་དོན། ཏཱའི་སི་ཏུ་རིན་པོ་ཆེ་དབུས་པའི་མཁས་དབང་རྣམ་པ་ཚོ་དང་། དེ་བཞིན་དགེ་འདུན་པ་དང་མི་དམངས་ཡོངས་ལ། ལོ་རྒྱུས་ཀྱི་ཐོག་ནས་བྱས་རྗེས་ཆེན་པོ་ཡོད་པའི་སི་ཏུ་སྐུ་ཕྲེང་རིམ་བྱོན་གྱིས་བསྟན་པ་དང་འགྲོ་བའི་དོན་དུ་མཛད་འཕྲིན་ཆེན་པོ་བསྐྱངས་ཡོད་པ་དེའི་རྗེས་སུ་བཟུང་སྟེ་རིན་པོ་ཆེ་ཆུང་ཆུང་སྐབས་སུ་རུམ་གཏེགས་ནས་རྡ་རམ་ས་ལར་ཕེབས་སྐབས་སློབ་གཉེར་སྐོར་དམིགས་བསལ་ཐུགས་སྣང་གནང་སོང་། རིན་པོ་ཆེ་སློབ་གཉེར་ཐོག་ཐུགས་སྣང་ཡོད་པ་བཞིན་དངོས་སུ་ལག་ལེན་བསྟར་ནས་གཞི་མེད་ས་ཞིག་ལ་རྟེན་གཞི་འདི་ལྟ་བུ་འཛུགས་སྐྲུན་གནང་། སྤྱིར་དགོན་པ་དང་ལྷ་ཁང་བརྒྱབ་མཁན་མང་པོ་འདུག འོན་ཀྱང་བསླབ་པ་སློབ་གཉེར་ཐོག་དམིགས་བསལ་ནུས་ཤུགས་སྒྲིམ་གནང་མཁན་ཉུང་ཉུང་རེད། ནམ་རྒྱུན་ངོས་ཀྱིས་འདི་ལྟར་ཞུ་བཞིན་ཡོད། དཔེར་ན། ནང་པ་ཚོ་བཤད་མི་དགོས་པར། སྤྱིར་བཏང་རྒྱ་གར་ནང་གི་ཤེས་ཡོན་ཅན་ཚོའི་རྣ་ལྕོག་ལ་ནཱ་ལེནྡྲ་བརྗོད་པ་ཡིན་ན། འདི་ཤེས་ཡོན་གྱི་བསྟི་གནས་ཤིག་ཡིན་པ་བློ་ལ་འཆར་གྱི་རེད་མ་གཏོགས་དགེ་འདུན་པ་གང་ཙམ་ཚོགས་ནས་ཞལ་འདོན་གནང་བཞིན་པ་བློ་ལ་ཤར་གྱི་མེད་པ་བཞིན་བོད་པའི་དགོན་པ་ཞེས་མིང་འཐོན་པའི་སྐབས་སུ་འདི་ཤེས་ཡོན་གྱི་བསྟི་གནས་ཤིག་ཡིན་བསམས་པ་བློ་ལ་ཤར་ཐུབ་པ་བྱ་དགོས། འདིར་རིན་པོ་ཆེས་ཐུགས་ཁུར་བཞེས་ཏེ་དངོས་འབྲེལ་བསླབ་པ་སློབ་གཉེར་ཡོད་པ་མ་ཟད། རྒྱ་ཆེ་ཆུང་ལ་མ་ལྟོས་པར་རིག་པའི་གནས་ལྔ་ལ་སློབ་སྦྱོང་བྱེད་རྒྱུ་ཡོད་པ། དེ་བཞིན་སངས་རྒྱས་ཀྱི་བསྟན་པ་བཤད་སྒྲུབ་ཟུང་འབྲེལ་ཐོག་ནས་ལུང་རྟོགས་ཀྱི་བསྟན་པ་ཉམས་པ་སོར་ཆུད་དང་། མི་ཉམས་གོང་འཕེལ་ཡོང་རྒྱུར་རིན་པོ་ཆེས་ཁ་ཡོད་ལག་ཡོད་ལག་ལེན་ཐོག་བསྟར་བ་བྱུང་འདུག་ཧ་ཅང་ཡག་པོ་རེད་ཐུགས་རྗེ་ཆེ་ཞུ་རྒྱུ་ཡིན།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
གོང་དུ་ཆོས་རིག་བཀའ་བློན་གྱིས་གསུང་པ་བཞིན། ངོས་ཀྱིས་མགོ་སྟོད་ནས་རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་ཞེས་རྟག་པར་བཤད་ཀྱི་ཡོད། རྟེན་གཞི་འདི་ལྟ་བུ་ཡོད་པ་ནི། ང་ཚོས་ལས་ཀ་མང་པོ་ཞིག་མགོ་སྟོད་ལ་འཆར་གཞི་ལྡན་པ་ཡག་པོ་ཞིག་ཡོད་ནའང་། རིམ་པས་འཆར་ཅན་ཐོག་ཕྱིན་པ་དེ་འདྲ་ཡོང་གི་འདུག དེ་འདྲ་མི་ཡོང་བར་མུ་མཐུད་སྤུས་ཀ་ཞན་དུ་མི་འགྲོ་བ་སྤུས་ཀ་བཟང་དུ་འགྲོ་བར་ཐུགས་ཁུར་སྐྱེད་དགོས།
སྐུ་དཔར་གྱི་བདག་དབང་དགའ་ལྡན་ཕོ་བྲང་།
ང་ཚོར་མེས་པོ་ཚོས་སྐུ་ལས་བསྐྱོན་ནས་ཤེས་ཡོན་རིགས་མི་འདྲ་བ་མང་པོ་ཡོད་པའི་ནང་ནས་འཛམ་གླིང་སྤྱི་ལ་ཞབས་འདེགས་སྒྲུབ་ཐུབ་རྒྱུའི་ཆ་རྐྱེན་གང་ཙམ་ཡོད་པ་དེ་དག་ལག་ལེན་བསྟར་ནས་མི་ལ་ཕན་པ་སྒྲུབ་དགོས། ཞེས་སོགས་ཀྱི་བཀའ་སློབ་སྩལ། གོང་ཚེས་ཉིན་གྱི་ཕྱེད་ཡོལ་༸གོང་ས་མཆོག་དབུ་བཞུགས་ཐོག་དཔལ་སྤུངས་བཤད་གྲྭ་ལུང་རིགས་འཇམ་དཔལ་གླིང་གི་སློབ་མ་ཁག་གཅིག་གིས་དབུ་མ་དང་ཤེར་ཕྱིན་གྱི་གཞུང་དང་འབྲེལ་བའི་རྟགས་གསལ་གཟིགས་འབུལ་དང་། དཔལ་སྤུངས་རིག་གནས་མཐོ་སློབ་ཀྱི་སློབ་མ་ཁག་གཅིག་གིས་བརྡ་སྤྲོད་རིག་པའི་བགྲོ་གླེང་། དཔལ་སྤུངས་ཡེ་ཤེས་རབ་དར་རྒྱས་གླིང་གི་བཙུན་མ་ཁག་གཅིག་གིས་བསྡུས་གཞུང་བློ་གསལ་ཉེར་མཁོ་ལས་རྒྱུ་འབྲས་ཆུང་ངུའི་རྣམ་གཞག་གི་རྟགས་གསལ་གཟིགས་འབུལ་གནང་ཡོད་པ་བཅས།།
