༢༠༡༠ ཟླ་ ༨ ཚེས་ ༢༧ རེས་གཟའ་པ་སངས།
༄༅། ཨ་རིའི་ཕྱི་སྲིད་ལས་ཁུངས་ནས་ཕྱི་ལོ་ ༢༠༠༩ ཟླ་ ༣ ནས་ཕྱི་ལོ་ ༢༠༡༠ ཟླ་ ༢ བར་བོད་རྒྱ་འབྲེལ་མོལ་གྱི་ལོ་འཁོར་སྙན་ཐོ་ཞིག་བཏོན་ཡོད། དོན་ཚན་བཞི་ཅན་གྱི་ལོ་འཁོར་སྙན་ཐོ་དེའི་ནང་ཨ་རི་གཞུང་གིས་བོད་རྒྱ་འབྲེལ་མོལ་ཐེངས་དགུ་པ་ཕྱི་ལོ་ ༢༠༡༠ ཟླ་ ༡ ཟླ་མཇུག་ཏུ་སླར་གསོ་བྱུང་བར་དགའ་བསུ་ཡོད་སྐོར་འཁོད་ཡོད། དེ་ཡང་དོན་ཚན་བཞི་པོ་ནི། ༡༽འཛིན་སྐྱོང་གི་ལས་དོན་སྙིང་བསྡུས། ༢༽བོད་ཐོག་འཛིན་པའི་སྲིད་བྱུས། ༣༽སྲིད་འཛིན་དང་ཕྱི་སྲིད་དྲུང་ཆེས་སྤེལ་བའི་བྱེད་སྒོ། ༤༽རྒྱ་ནག་མི་དམངས་སྤྱི་མཐུན་རྒྱལ་ཁབ་དང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དབར་གྲོས་མོལ་གྱི་གནས་བབ་བཅས་ཡིན་འདུག དེ་ཡང་སྙན་ཐོའི་དོན་ཚན་དང་པོ་འཛིན་སྐྱོང་གི་ལས་དོན་སྙིང་བསྡུས་ནང་འཁོད་དོན།
ཕྱི་ལོ་ ༢༠༠༨ ཟླ་ ༡༡ ནས་བོད་རྒྱ་འབྲེལ་མོལ་མཚམས་འཇོག་བྱས་རྗེས་སླར་ཡང་ཕྱི་ལོ་ ༢༠༡༠ ཟླ་བ་དང་པོའི་ཟླ་མཇུག་ཏུ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་། རྒྱ་ནག་གཞུང་གི་དབུས་འཐབ་ཕྱོགས་གཅིག་གྱུར་གྱི་མི་སྣ་ངོ་འཕྲད་ཀྱིས་བོད་རྒྱ་འབྲེལ་མོལ་ཐེངས་དགུ་པ་དེ་གནང་བར་ཨ་རིའི་གཞུང་ཕྱོགས་ནས་དགའ་བསུ་ཞུ་བཞིན་ཡོད། བོད་རྒྱ་འབྲེལ་མོལ་ཐེངས་དགུ་པའི་སྐབས་དོན་ཕན་སོན་པའི་གྲུབ་འབྲས་གང་ཡང་ཐོན་མེད་ནའང། སྐབས་དེའི་འབྲེལ་མོལ་གྱི་འཁོར་ཡུག་གི་རྣམ་པ་དེ་ནི་ཇེ་བཟང་དུ་ཕྱིན་ཡོད། ཨ་རིའི་སྲིད་གཞུང་གིས་རྒྱ་བོད་གཉིས་དབར་དོན་ཕན་སོན་པའི་གྲུབ་འབྲས་ཡོང་ཆེད་གྲོས་མོལ་རྒྱུན་འཁྱོངས་ཡོང་བའི་བསྐུལ་མ་མུ་མཐུད་ཞུ་རྒྱུ་ཡིན། རྒྱ་ནག་གཞུང་ལ་བོད་སའི་ཁུལ་དུ་མུ་མཐུད་དཀའ་ངལ་འཕྲད་བཞིན་པ་དེ་སེལ་རྒྱུར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་མཐུན་འགྱུར་ཞུ་ཐུབ་རྒྱུ་ཡིན་པར་ཨ་རིའི་སྲིད་གཞུང་གིས་ཡིད་ཆེད་ཞུ་བཞིན་ཡོད། ༸གོང་ས་ཏཱ་ལའི་བླ་མ་མཆོག་གི་དགོངས་ཚུལ་དེ་བོད་མིའི་སྤྱི་ཚོགས་ཀྱི་ཁྲོད་མངོན་པར་གསལ་བཞིན་ཡོད་པ་མ་ཟད། ཁོང་ལ་བོད་མི་མང་ཆེ་བས་གུས་བརྩི་ཞུ་བཞིན་ཡོད། ཁོང་གིས་མཐའ་གཅིག་ཏུ་འཚེ་མེད་ཞི་བར་རྒྱབ་སྐྱོར་གནང་བ་དེས་མཐའ་མའི་གྲུབ་འབྲས་ཐོབ་རྒྱུར་ལྟ་གྲུབ་གལ་ཆེ་ཞིག་ཆགས་ཡོད། རྒྱ་ནག་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་བོད་མི་རྣམས་ལ་འཕྲད་བཞིན་པའི་དཀའ་ངལ་སེལ་ཆེད་གྲོས་མོལ་གནང་རྒྱུ་དེ་རྒྱ་ནག་གཞུང་དང་བོད་མི་གཉིས་ཀར་གཉིས་སྨན་ཞིག་ཡིན། དཀའ་ངལ་དེ་སེལ་མ་ཐུབ་ཚེ་རྒྱ་ནག་ནང་དཀའ་ངལ་ཆེ་རུ་འགྲོ་རྒྱུ་དང་དེས་རྒྱ་ནག་གི་སྤྱི་ཚོགས་དང་དཔལ་འབྱོར་ཡར་རྒྱས་ལ་འགོག་རྐྱེན་ཡོང་ངེས་ཡིན་ཞེས་སོགས་འཁོད་ཡོད།།
སྙན་ཐོ་ངོ་མ་དབྱིན་ཡིག་ནང་ཡོད་པ་ནས་ཕབས་བསྒྱུར་ཞུས་པས་དེར་རྩ་འཛིན་ཞུ།
