༢༠༡༥ ཟླ་ ༡ ཚེས་ ༡༩ རེས་གཟའ་ཟླ་བ།

༄༅། །ཐེ་ཝན་ Taiwan སྐུ་ཚབ་དོན་ཁང་གི་དྲུང་འཕར་དོན་གྲུབ་རྒྱལ་པོ་ལགས་ཀྱིས་བཏང་གནས་ནང་འཁོད་དོན། ཐེ་ཝན་ཡུང་ཧོའི་གྲོང་ཚོའི་སློབ་གྲྭ་ཆེན་མོར་ Yungho Community University བོད་དོན་སྐོར་གྱི་སློབ་ཁྲིད་ཐེངས་དང་པོ་དེ་ཕྱི་ལོ་ ༢༠༡༥ ཟླ་ ༡ ཚེས་ ༡༧ རེས་གཟའ་སྤེན་པའི་ཉིན་མཇུག་སྒྲིལ་གནང་འདུག དེ་ཡང་མཇུག་བསྡོམས་མཛད་སྒོ་འཚོགས་ཡུལ་ནི། ཟླ་བརྒྱད་པའི་ཚེས་ཉེར་གསུམ་གྱི་ དྲན་རྟེན་སྐྱེད་མོས་ཚལ། August 23 Memorial Park ཞེས་པ་དེར་ཚོགས་འདུག སྤྱིར་བོད་དོན་སྐོར་གྱི་སློབ་ཁྲིད་ཐེངས་དང་པོ་དེ་ཕྱི་ལོ་ ༢༠༡༤ ཟླ་ ༩ ཚེས་ ༡༧ རེས་གཟའ་ལྷག་པ་ཉིན་དངོས་སུ་འགོ་འཛུགས་གནང་འདུག་པ་དང་སློབ་ཁྲིད་སྐབས་སློབ་ཕྲུག་གྲངས་ ༣༦ ཀྱིས་བོད་ཀྱི་རྒྱལ་རབས་ཆོས་འབྱུང་དང་། བོད་ཀྱི་རིག་གཞུང་སྐོར་ལ་སློབ་ཁྲིད་གནང་འདུག སློབ་ཁྲིད་ཀྱི་དུས་ཚོད་ནི་བདུན་ཕྲག་རེར་ཆུ་ཚོད་ ༣ ཡིན་པ་དང་། བདུན་ཕྲག་རེར་ཆུ་ཚོད་བཅོ་བརྒྱད་ཚོགས་འདུག ད་ལྟ་སློབ་ཕྲུག་ཡོད་བཞིན་པའི་ཁྲོད་ལོ་ན་རྒན་ཤོས་དགུང་གྲངས་ ༨༩ སོན་པ་ཞིག་ཡོད་པ་དང་། སློབ་ཕྲུག་ཁོང་རྣམས་ཀྱིས་རང་ཉིད་ཙམ་མ་ཟད། ཐེ་ཝན་མང་ཚོགས་གཞན་ལའང་བོད་ཀྱི་ཆོས་དང་རིག་གཞུང་། རྒྱལ་རབས་ལོ་རྒྱུས་སོགས་ལ་དོ་སྣང་སྤེལ་སླད། དྲན་བརྟེན་སྐྱེད་མོས་ཚལ་དེའི་ནང་ཆེད་མངགས་གུར་བརྒྱབ་ནས་ཐེ་ཝན་སྐུ་ཚབ་དོན་ཁང་གིས་འགྲེམས་སྤེལ་གནང་བའི་བོད་དོན་དྲིལ་བསྒྲགས་ཀྱི་དཔེ་དེབ་དང་དུས་དེབ་སོགས་འགྲེམས་སྤེལ་གང་ཐུབ་གནང་འདུག་པ་མ་ཟད། ད་ཡོད་སློབ་ཕྲུག་ཁོངས་ནས་མང་དག་གཅིག་གིས་འདི་ལོའི་ཕྱི་ཟླ་ ༣ ཟླ་འགོ་ནས་སློབ་ཁྲིད་ཀྱི་དུས་ཚོད་གསར་པ་འགོ་འཛུགས་སྐབས་འཛུལ་ཞུགས་ཆེད་མིང་ཐོ་བཀོད་ཟིན་འདུག སློབ་ཁྲིད་ཚན་པ་གསར་པ་དེ་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་སློབ་ཁྲིད་གནང་རྒྱུ་ཡིན་འདུག སློབ་ཁྲིད་གསར་པ་དེའི་ནང་བོད་ཀྱི་རྒྱལ་རབས་ཆོས་འབྱུང་དང་། རིག་གཞུང་ཙམ་མ་ཟད། རྩིས་ཀྱི་སྐོར་ལའང་སློབ་ཁྲིད་གནང་རྒྱུ་ཡིན་འདུག སྔ་ལོར་སྐུ་ཚབ་དོན་གཅོད་ཁོང་དང་སྐུ་ཚབ་དོན་ཁང་གི་དྲུང་ཡིག་བསོད་ནམས་རྡོ་རྗེ་ལགས། དེ་བཞིན་སྐུ་ཚབ་དོན་ཁང་གི་ཆོས་དགེ་དགེ་བཤེས་འཇམ་དཔལ་ཆོས་འཛིན་ལགས། དེ་བཞིན་ལྕམ་ལིའུ་ Ms. Lu བཅས་ཡིན་འདུག